ފާއިތުވި 24 ގަޑިއިރު ޕޮޒިޓިވްވީ އެންމެ 24 މީހުން!
28 އޮކްޓޯބަރު 2020 | ބުދަ 17:29މާލެ ސަރަހައްދުން 22 މީހަކު ވަނީ ޕޮޒިޓިވް ވެފައި
ކޮވިޑް-19 އަށް ރެންޑަމް ސާމްޕަލް ނަގަނީ
ރާއްޖެއިން ކޮވިޑް-19 އަށް ފާއިތުވި 24 ގަޑިއިރު ޕޮޒިޓިވް ވެފައިވަނީ އެންމެ 24 މީހުން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން ބުނީ ޕޮޒިޓިވްވި މީހުންގެ ތެރޭގައި ހިމެނެނީ 20 ދިވެހިންނާއި 4 ބިދޭސީން ކަމަށެވެ. އޭގެ ތެރެއިން 22 މީހުން ޕޮޒިޓިވްވެފައި ވަނީ ގްރޭޓަރ މާލެ ސަރަހައްދުންނެވެ.
ރިސޯޓްތައް ހިމެނޭ ގޮތަށް އަތޮޅު ތެރެއިން ޕޮޒިޓިވްވެފައި ވަނީ 02 މީހުންނެވެ. އެއާއި އެކު ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު ވަނީ 11،591 އަށް އަރާފައެވެ.
އެޗްޕީއޭއިން ހާމަކޮށްފައިވާ ގޮތުން ފާއިތުވި 24 ގަޑިއިރު ތެރޭގައި 1409 ސާމްޕަލްއެއް ނަގާފައިވާ އިރު މި ވަގުތު އެކްޓިވް ކޭސްގެ ގޮތުގައި 862 ކޭސްއެއް ވަނީ ރެކޯޑް ކުރެވިފައެވެ. އަދި އައިސޮލޭޝަން ފެސިލިޓީސްތަކުގައި 227 މީހަކު ތިބިއިރު 52 މީހަކަށް ހޮސްޕިޓަލުގައި ދަނީ ފަރުވާދެމުންނެވެ.
ރާއްޖެއިން މިހާތަނަށް ބަލިން ފަސޭހަވި މީހުންގެ އަދަދަކީ 10،685 ކަމަށް އެޗްޕީއޭއިން މައުލޫމާތު ދެއެވެ. މިހާތަނަށް ކޮވިޑް ޖެހިގެން މަރުވި މީހުން އަދަދަކީ 37 އެވެ.
