ބަންގްލަދޭޝްގެ އިތުރު 152 މީހަކު އަނބުރާ ގައުމަށް ފޮނުވާލައިފި
އަމާޒަކީ މި އަހަރުގެ ތެރޭގައި 20،000 ބިދޭސީން ފުރުވާލުން
ބަންގްލަދޭޝްގެ އިތުރު ބަޔަކު އަނބުރާ ގައުމަށް ފޮނުވާލުން
ބަންގްލަދޭޝްގެ އިތުރު 152 މީހަކު އަނބުރާ ގައުމަށް ފޮނުވާލައިފިއެވެ.
ރާއްޖޭގައި ދިރިއުޅެމުންދާ ބިދޭސީންގެ ތެރެއިން ބަންގްލަދޭޝްގެ އިތުރު 152 މީހަކު ފުރުވާލާފައިވަނީ ގައުމީ އެއާލައިން މޯލްޑިވިއަންގެ ފްލައިޓެއްގައި ބުދަ ދުވަހު އެގަމުގެ ވެރިރަށް ޑާކާ އަށެވެ. މިއަދާއެކު މިހާތަނަށް 8000 ވުރެ ގިނަ ބަންގްލަދޭޝް ރައްޔިތުން އަނބުރާ ޤައުމަށް ވަނީ ފޮނުވާލެވިފިއެވެ.
ކޮވިޑް-19 އާ ގުޅިގެން މާލެ ލޮކްޑައުން ކުރި ހިސާބުން ރާއްޖޭގައި ގަވާއިދާ ހިލާފަށް ދިރިއުޅެމުންދާ ބިދޭސީން ގަވާއިދުގެ ތެރެއަށް ވައްދާ އޭގެތެރެއިން އަނބުރާ ގައުމަށް ދާން ބޭނުންވާ ފަރާތްތަކަށް އެ ފުރުސަތު މި ސަރުކާރުން އަންނަނީ ދެމުންނެވެ.
އެގޮތުން ރާއްޖޭގައި ދިރިއުޅޭ ގިނަ އަދަދެއްގެ ބިދޭސީން ފޮނުވާލުމުގެ މަސައްކަތް އަންނަނީ ކުރަމުންނެެވެ. މީގެ ތެރޭގައި ބަންގްލަދޭޝަށް ނިސްބަތްވާ މީހުންގެ އަދަދު ނިސްބަތުން ގިނައެވެ.
އިކޮނޮމިކް މިނިސްޓަރ ފައްޔާޒު އިސްމާއީލް މީގެ ކުރިން ވިދާޅުވެފައިވަނީ އެ މިނިސްޓްރީގެ އަމާޒަކީ މި އަހަރުގެ ތެރޭގައި 20،000 އެއްހާ ބިދޭސީން އެ މީހުންގެ ރުހުމުގައި އަނބުރާ ގައުމަށް ފޮނުވާލުން ކަމަށެވެ.
ޤަވާއިދާ ހިލާފަށް އުޅެމުން އަންނަ ބިދޭސީން ގައުމަށް ފޮނުވާލުމުގައި ބަންގްލަދޭޝްގެ ހައި ކޮމިޝަނާއި ގައުމީ އެއާލައިން މޯލްޑިވިއަން އަދި އިކޮނިމިކް މިނިސްޓްރީ އާއި ފޮރިން މިނިސްޓްރީ ގުޅިގެން ދަނީ މަސައްކަތްތަކެއް ކުރަމުންނެވެ.
