ރެއާލް އެއްވަރު، ޗެމްޕިއަން ބަޔާނަށް މޮޅެއް

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ކުޅުނު މެޗުތަކުން ރެއާލް މެޑްރިޑް އެއްވަރުވިރު، އެންމެ ފަހުގެ ޗެމްޕިއަން ބަޔާން މިއުނިކުން މޮޅެއް ހޯދައިފިއެވެ.

ގްރޫޕް ބީގައި ހިމެނޭ މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް އެއްވަރުވީ ރަށުން ބޭރުގައި ބޮރޫޝިއާ މޮންޗެންގްލަޑްބަކާ 2-2 ގެ ނަތީޖާއަކުންނެވެ. މި މުބާރާތުގައި ކުޅުނު ދެވަނަ މެޗުން ރެއާލް އެއްވަރުވިއިރު، ފުރަތަމަ މެޗުން އެ ޓީމު ވަނީ ޝަޚްތަރު ޑޮނެސްކް އަތުން 3-2 ން ބަލިވެފައެވެ.

މޮންޗެންގްލަޑްބަކުގެ ދަނޑުގައި އަންގާރަ ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެ ޓީމުންނެވެ. މެޗުގެ 33 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މާކަސް ތުރާމެވެ. އަދި ދެވަނަ ހާފު ފަށައިގެން 13 ވަނަ މިނެޓުގައި ތުރާމް ވަނީ އިތުރު ލަނޑެއް ޖަހާ މޮންޗެންގްލަޑްބަކަށް ލީޑު ފުޅާކޮށްދީފައެވެ.

މި މެޗުގައި ރެއާލުން ނަތީޖާ އެއްވަރުކޮށްފައިވަނީ މެޗުގެ ފަހު ވަގުތު ކޮޅުގެ ތެރޭގައެވެ. އެގޮތުން މެޗު ނިމެން ތިން މިނެޓަށް ވެފައި ވަނިކޮށް ކަރިމް ބެންޒެމާ ރެއާލަށް ފަރަގު ކުޑަކޮށްދިންއިރު، އިތުރު ވަގުތުގައި އެ ޓީމަށް ނަތީޖާ އެއްވަރުކޮށްދިނީ ކަސެމީރޯއެވެ.

ގްރޫޕް ބީގައި ހިމެނޭ ރެއާލުން ކުޅުނު ދެވަނަ މެޗު އެއްވަރުވެގެން ނިމުނުއިރު، މި ގްރޫޕްގައި ދެން ހިމެނޭ އިންޓަ މިލާނުންވެސް އަންގާރަ ދުވަހުގެރޭ ކުޅުނު މެޗު ވަނީ އެއްވަރުވެފައެވެ. އިންޓަ އެއްވަރުވީ ރަށުން ބޭރުގައި ޝަޚްތަރާ ބައްދަލުކޮށް 0-0 ންނެވެ.

މި ނަތީޖާތަކާއެކު މި ގްރޫޕުގެ އެއްވަނައިގައި ޝަޚްތަރު އޮތީ ކުޅުނު ދެ މެޗުން ލިބުނު ހަތަރު ޕޮއިންޓާއެކުއެވެ. ދެވަނައިގައި އޮތް މޮންޗެންގްލަޑްބަކާއި ތިންވަނައިގައި އޮތް އިންޓައަށް ދެ މެޗުން ދެ ޕޮއިންޓް ލިބިފައިވާއިރު، ފުލުގައި ރެއާލަށް ދެ މެޗުން ލިބިފައިވަނީ އެންމެ ޕޮއިންޓެކެވެ.

މީގެ އިތުރުން މި މުބާރާތުގައި އަންގާރަ ދުވަހުގެރޭ އެންމެ ފަހުގެ ޗެމްޕިއަން ބަޔާން މޮޅުވީ ރަށުން ބޭރުގައި ލޮކޮމޯޓިވް މޮސްކޯ އަތުން 2-1 ގެ ނަތީޖާއަކުންނެވެ. މި މޮޅާއެކު ޗެމްޕިއަންސް ލީގުގައި އެންމެ ފަހުން ކުޅުނު 13 މެޗުންވެސް ބަޔާން ވަނީ މޮޅުވެފައެވެ.

އަންގާރަ ދުވަހުގެރޭ ކުޅުނު މެޗުގެ ވަރަށް ކުރީކޮޅު ބަޔާނުން ވަނީ ލީޑު ނަގާފައެވެ. މެޗު ފަށައިގެން 13 ވަނަ މިނެޓުގައި ބަޔާނަށް ލީޑު ނަގައިދިނީ ލެއޮން ގޮރެޓްޒްކާއެވެ. މި މެޗުގެ 70 ވަނަ މިނެޓުގައި އެންޓޮން މިރަންޗަކް މޮސްކޯއަށް ނަތީޖާ އެއްވަރުކޮށްދިން ނަމަވެސް، އޭގެ ނުވަ މިނެޓު ފަހުން ޖޯޝުއާ ކިމިޗް ކާމިޔާބުކުރި ލަނޑާއެކު ބަޔާނުން ވަނީ މެޗުން މޮޅެއް ހޯދާފައެވެ.

އަންގާރަ ދުވަހުގެރޭ ކުޅުނު މެޗުން ގްރޫޕް އޭގައި ހިމެނޭ ބަޔާން މޮޅުވިއިރު، މި ގްރޫޕުގައި ދެން ހިމެނޭ އެތުލެޓިކޯ މެޑްރަިޑް ވަނީ އަމިއްލަ ދަނޑުގައި ސަލްޒްބާގް އަތުން 3-2 ން މޮޅުވެފައެވެ.

މި ނަޓިޖާތަކާއެކު ގްރޫޕް އޭގެ އެއްވަނައިގައި ބަޔާން އޮތީ ކުޅުނު ދެ މެޗުން ލިބުނު ހަ ޕޮއިންޓާއެކުއެވެ. ދެވަނައިގައި އޮތް އެތުލެޓިކޯއަށް ދެ މެޗުން ތިން ޕޮއިންޓް ލިބިފައިވާއިރު، ތިންވަނައިގައި އޮތް ސާލްޒްބާގާއި ފުލުގައި އޮތް މޮސްކޯއަށް ދެ މެޗުން ލިބިފައިވަނީ އެންމެ ޕޮއިންޓެކެވެ.