ޕޮމްޕެއޯގެ ދަތުރުފުޅާއި ގުޅިގެން ހުޅުމާލެ-ހުޅުލެ ބަހުގެ ހިދުމަތް ވަގުތު ކޮޅަކަށް މެދުކަނޑާލަނީ
27 އޮކްޓޯބަރު 2020 | އަންގާރަ 17:17ދަތުރުތައް މެދުކަނޑާލާނީ މާދަމާ 12:30 އިން ފެށިގެން 14:00 އަށް
ހުޅުމާލޭގައި ޕަބްލިކް ޓްރާންސްޕޯޓަށް އެމްޓީސީސީން ބޭނުން ކުރާ ބަހެއް
އެމްޓީސީސީއިން ހުޅުމާލެއާއި ހުޅުލެއާ ދޭތެރޭ ކުރަމުން އަންނަ ދަތުރުތައް ބުދަ ދުވަހުގެ 12:30 އިން ފެށިގެން 14:00 އަށް މެދުކަނޑާލަން ނިންމައިފިއެވެ.
މިިކަމާއި ގުޅިގެން އެމްޓީސީސީން ކުރި ޓްވީޓެއްގައި ބުނެފައި ވަނީ އެ ވަގުތުތަކުގައި ބަހުގެ ހިދުމަތް މެދުކަނޑާލަން ޖެހުނީ އެމެރިކާގެ ހާރިޖީ ވަޒީރު މައިކް ޕޮމްޕެއޯ ރާއްޖެއަށް ކުރައްވާ ރަސްމީ ދަތުރުފުޅާއި ގުޅިގެންނެވެ.
ޕޮމްޕެއޯ ރާއްޖެއަށް ވަޑައިގަންނަވަން ހަމަޖެހިފައި ވަނީ އޮކްޓޫބަރު މަހުގެ 28 ގައެވެ. ޕޮމްޕެއޯގެ މި ދަތުރުފުޅުގައި ރައީސް އިބްރާޙިމް މުހައްމަދު ސޯލިހު އަރިހަށް އިހުތިރާމްގެ ޒިޔާރަތެއް ކުރައްވާނެއެވެ. އަދި ހާރިޖީ ވަޒީރު އަބްދުﷲ ޝާހިދުއާ އެކު މަޝްވަރާ ބައްދަލުވުންތަކެއް ބޭއްވެވުމަށް ވަނީ ހަމަޖެހިފައެވެ.
