ތޫނު ހަތިޔާރާއެކު "ފަސްކުރި" ދޯންޏަށް ބަޔަކު އެރި މައްސަލައިގައި 3 މީހަކު ހައްޔަރުކޮށްފި

އެންދަމަން އޮއްވާ "ފަސްކުރި" ދޯންޏަށް ތޫނުއެއްޗިއްސާއެކު އެރި މީހުންގެ ތެރެއިން 3 މީހަކު ހައްޔަރުކޮށްފިއެވެ.

ފުލުހުން ބުނީ ލ. އަތޮޅު އެތެރެވަރި ވަޑިނޮޅު ކަނޑުގައި އޮތް މަސްދޯންޏަކަށް ތޫނުއެއްޗިއްސާއެކު އެރި ކަމަށް ތުހުމަތުކުރެވޭ މައްސަލައާއި ގުޅިގެން 3 މީހަކު ހޯމަ ދުވަހުގެ ރޭ ހައްޔަރުކޮށްފައިވާ ކަމަށެވެ. އޭގެ ތެރޭގައި ހިމެނެނީ 25 އަހަރުގެ 2 ފިރިހެނުންނާއި 22 އަހަރުގެ ފިރިހެނެއް ކަމަށެވެ. ފުލުހުން ދަނީ މިމައްސަލަ ތަހުގީގު ކުރަމުންނެވެ.

މި މައްސަލައާއި ގުޅިގެން މީގެ ކުރިން ފުލުހުން ބުނެފައިވަނީ އާދީއްތަ ދުވަހުގެ ރޭ 11:55 ހާއިރު ލ. އަތޮޅުގެ އެތެރެވަރި، ވަޑިނޮޅު ކަނޑުގައި އޮތް މަސް ދޯންޏެއް ބަލާ ލޯންޗެއްގައި ބަޔަކު އެ ދޯންޏަށް ދިޔަކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ. އަދި މި މައްސަލައާއި ގުޅިގެން ފުލުހުން މައުލޫމާތު ސާފުކުރުމުން، އެ ދޯނި ލ. ގަން ތުނޑިއަށް ކައިރި ކުރާކަން އެނގިފައިވާ ކަމަށާއި، ފުލުހުން ދޯންޏަށް ގޮސް ބެލި ބެލުމުން ދޯންޏަށް އިތުރުބަޔަކު އަރާފައިވާ ކަމަށް ފުލުހުން ބުނެއެވެ.

ފުލުހުން ބުނީ އެ ދޯންޏަށް ބަޔަކު އެރި ނަމަވެސް މާރާމާރީއެއް ހިންގާފައިނުވާ ކަމަށެވެ. އެހެންނަމަވެސް ދޯންޏަށް ގެންދިޔަކަމަށް ބެލެވޭ ތޫނު އެއްޗެހި ދޯނި ތެރޭ ހުރުމުން އެ ތަކެތި ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

ފުލުހުން ބުނީ މިހާތަނަށް އެނގިފައިވާ ގޮތުގައި މިއީ އެއްބަސްވުމެއްގެ ދަށުން ގަނެފައިވާ ދޯންޏަކަށް ވެފައި، އެއްބަސްވުމަށް އަމަލުނުކުރާ ކަމަށް ބުނެ، ދޯންޏަށް ދިޔަ ބަޔަކު ކަމަށް މައުލޫމާތު ލިބޭ ކަމަށާއި، މި މައްސަލަ ތަހުގީގުކޮށް އަޅަންޖެހޭ ފިޔަވަޅުތައް އެޅުމުގެ ކަންކަން ފުލުހުން ކުރަމުންދާ ކަމަށެވެ. އަދި މި މައްސަލަ އާއި ގުޅިގެން ސުވާލުކުރަންޖެހޭ ފަރާތްތަކާއި ސުވާލުކޮށް، މައުލޫމާތު އޮޅުންފިލުވައި، ފިޔަވަޅު އަޅަންޖެހޭ ފަރާތްތަކާއި މެދު ފިޔަވަޅު އެޅުމަށް ތަހުގީގު ތެރެއިން މަސައްކަތް ކުރަމުންދާ ކަމަށެއެވެ.

މައުލޫމާތު ލިބިފައިވާ ގޮތުގައި ގުރޫޕަކުން އަރާފައިވަނީ ސ. ހިތަދޫގައި ދުއްވާ "ފަސްކުރި" ދޯންޏަށެ އެވެ. އަދި ދޯންޏަށް ބަޔަކު އެރީ އެންދަމަން ތިއްބާ ކަމަށާއި، 30 ވަރަކަށް މީހުން ތިބި ކަމަށްވެއެވެ. އަދި ދޯނި ގަމު ތުނޑިއާއި ކައިރި ކުރި އިރު ފުލުހުން ތިބި ކަމަށާއި، ނަމަވެސް އެ އެންމެންގެ ނަން ނޯޓު ކުރުމަށްފަހު ދޫކޮށްލާފައިވާ ކަމުގެ މައުލޫމާތު ލިބެއެވެ. މި ދޯނީގައި 22 ފަޅުވެރިން ތިބެއެވެ.