އުނގޫފާރު ފެންހިންދާ ނިޒާމުގެ މަސައްކަތް ނިންމާލައިފި
2000 އަކަ މީޓަރުގެ ސަރަޙައްދެއްގައި ފެންހިންދާ ނިޒާމެއް ޤާއިމުކޮށްފައިވޭ
ފެން ހިންދާ ނިޒާމުގެ މަސައްކަތް ކުރަމުންދަނީ މަގު ހެދުމުގެ މަސައްކަތުގެ ތެރެއިން
ރ. އުނގޫފާރުގައި ފެން ހިންދާ ނިޒާމް ގާއިމް ކުރުމުގެ މަސައްކަތް ނިންމާލައިފިއެވެ.
މި މަސައްކަތް ކުރަމުންދާ އެމްޓީސީސީން ބުނީ އެ ރަށުގެ މަގު ހެދުމުގެ މަސައްކަތުގެ ދަށުން 2000 އަކަ މީޓަރުގެ ސަރަޙައްދެއްގައި ފެންހިންދާ ނިޒާމެއް ޤާއިމުކުރުމުގެ މަސައްކަތް ކޮށްފައިވާ ކަމަށެވެ. މީގެ އިތުރުން މަގު އެއްވަރުކުރުމުގެ މަސައްކަތް ކުރަމުން އަންނަ އިރު، މަގުހެދުމުގެ މަޝްރޫޢުގެ މަސައްކަތުގެ 42 އިންސައްތަ މަސައްކަތް ނިމިފައިވާ ކަމަށެވެ.
މި މަޝްރޫޢުގެ ދަށުން، ދުއްވާ ސަރަޙައްދެއް ޤާއިމުކުރުމާއި، ހިނގާ ސަރަޙައްދެއް ޤާއިމުކުރުމާއި، ފެންހިންދާ ނިޒާމެއް ޤާއިމުކުރުމާއި، މަގުބައްތި ހަރުކުރުމާއި މަގުމަތީ ނިޝާން ހަރުކުރުމުގެ މަސައްކަތް ހިމެނެއެވެ. މި މަޝްރޫޢަކީ 30.3 މިލިއަން ރުފިޔާގެ މަޝްރޫޢެކެވެ. މި މަޝްރޫޢު މޮބިލައިޒް ކުރެވިފައިވަނީ 12 ޖޫން 2019 ގައެވެ.
ރ. އުނގޫފާރު ބޮޑެތި މަގުތައް ހެދުމުގެ މަޝްރޫޢު ކުރިއަށް ގެންދިއުމަށް އެމްޓީސީސީއާއި ހަވާލުކޮށްފައިވަނީ މިދިޔަ އަހަރުގެ މެއި މަހުގެ 22 ވަނަ ދުވަހުއެވެ. މި މަޝްރޫޢުގެ ދަށުން އުނގޫފާރުގެ ބޮޑެތި މަގުތަކުގައި ތާރު އަޅައި ރަނގަޅު ފެންވަރަށް ހެދުމަށް ވަނީ ހަމަޖެހިފައެވެ. މި މަޝްރޫޢުއަކީ 240 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢުއެކެވެ.
މަސައްކަތުގެ ފެންވަރު ރަނގަޅު ކުރުމުގެ ގޮތުން މީގެ ކުރިން ތާރުއެޅުމުގެ ކުރިން ސިމެންތިއާއި ވެލި ބޭނުންކޮށްގެން އަޅާ ބޭސް ފަށަލައަށް ބަދަލުގައި ހިލަ އަޅައިގެން އެ ފަށަލަ އެޅުމަށް އެމްޓީސީސީން ނިންމިއެވެ. އުނގޫފާރު މަގު ހެދުމުގެ މަޝްރޫއަކީ ކުރީ ސަރުކާރުން ފެށި މަސައްކަތެއް ނަމަވެސް ވަކި ހިސާބަކުން މަސައްކަތް އޮތީ ހުއްޓިފައެވެ. އަދި ޕްރޮޖެކްޓަށް ބައެއް ބަދަލު ގެނެސް އަލުން އެ މަސައްކަތް ކުރަމުންދަނީ އެމްޓީސީސީންނެވެ.
