ރ ކުޑަކުރަތުން ކޮވިޑް-19 އަށް ޕޮޒިޓިވްވީ މީހުންގެ އަދަދު 57ށް
ޑރ ނަޒްލާ ވިދަޅުވީ އެރަށުން 90 ސާމްޕަލް ނަގާފައިވާ ކަމަށް
ރ ކުޑަކުރަތު، ކުޑަކުރަތުން ޕޮޒިޓިވްވެފައިވާ މީހުންގެ ތެރެއިން އެކަކަށް ފަރުވާ ދިނުމަށް ބ އަތޮޅު އޭދަފުށީގައި ހުންނަ ފެސިލިޓީއަށް ވަނީ ގެންދެވިފައި
ރ އަތޮޅުގައި ހަދަމުންދާ ރިސޯޓެއް ކަމުގައިވާ ކުޑަކުރަތުން ޕޮޒިޓިވްވީ މީހުންގެ އަދަދު 57ށް އަރާފައިވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީގް ވިދާޅުވެއްޖެ އެވެ.
ހޯމަ ދުވަހުގެ ރޭ އެސެންޓަރުގައި ބޭއްވި ނޫސްވެރިންގެ ބައްދަލުވުމުގައި ކުޑަކުރަތުގެ ހާލަތާއި ގުޅޭގޮތުން ވާހަކަ ދައްކަވަމުން ޑރ ނަޒްލާ ވިދާޅުވީ އެރަށުން 90 ސާމްޕަލެއް ނަގާފައިވާ ކަމަށެވެ. މީގެތެރެއިން 23 ވަނަ ދުވަހު ޕޮޒިޓިވްވެފައިވަނީ 4 ސާމްޕަލެއް ކަމަށާއި މިމަހުގެ 25 ވަނަ ދުވަހު 52 ސާމްޕަލެއް ޕޮޒިޓިވްވެފައިވާއިރު 26 ވަނަ ދުވަހު އިތުރު ސާމްޕަލެއް ޕޮޒިޓިވްވެފައިވާ ކަމަށް ޑރ ނަޒްލާ ވިދާޅުވިއެވެ.
މީގެކުރިން އެޗްއީއޯސީން ބުނީ އެރަށުން ޕޮޒިޓިވްވެފައިވަނީ 63 މީހުން ކަމަށެވެ. އެހެންނަމަވެސް ނޫސްވެރިންގެ ބައްދަލުވުމުގައި ޑރ ނަޒްލާ ވިދާޅުވީ އެއަދަދުތަކުގައި މައްސަލަ އުޅޭކަމަށެވެ.
ކުޑަކުރަތުން ޕޮޒިޓިވްވެފައިވާ މީހުންގެ ތެރެއިން އެކަކަށް ފަރުވާ ދިނުމަށް ބ އަތޮޅު އޭދަފުށީގައި ހުންނަ ފެސިލިޓީއަށް ގެންދެވިފައިވާ ކަމަށް ޑރ ނަޒްލާ ވިދާޅުވިއެވެ.
ކުޑަކުރަތުން ޕޮޒިޓިވް ކޭސްތަކެއް ފެނިފައިވާއިރު އެއަތޮޅުގެ ވެރިކަން ކުރާ ރަށް އަދި ގިނަ ބަޔަކު ސިއްހީ ފަރުވާ ހޯދުމަށް ދާ އުނގޫފާރުން ޕޮޒިޓިވް ކޭސްއެއް ފެނުމާއެކު އެރަށް ވަނީ މިހާރު މޮނިޓަރިންގ ގެ ހާލަތަށް ގެނެސްފައެވެ.
