ވީޑިއޯ އެސިސްޓަންޓް ރެފުރީ (ވީއޭއާރް) ގެ ބޭނުމެއް ނުހިފޭ ކަމަށް ބުނެ ޓޮޓެންހަމް ހޮޓްސްޕާގެ ކޯޗު ހޯސޭ މޮރީނިއޯ އަނެއްކާވެސް ފާޑުކިޔައިފިއެވެ.
މީގެ ކުރިންވެސް މޮރީނިއޯ ވަނީ ވީއޭއާރުގެ ނިންމުންތަކަށް ފާޑުކިޔާފައެވެ.
ދާދި ފަހުން މޮރީނިއޯ ބުނީ ވީއޭއާރް ރަނގަޅު ގޮތުގައި ބޭނުން ކުރާނަމަ މައްސަލައެއް ނުފެންނާނެ ކަމަށާއި، އެކަމަކު ގިނަ ފަހަރު ވީއޭއާރް ބެލުމަށްފަހުވެސް ރެފުރީން ނުރަނގަޅު ނިންމުން ނިންމާފައިވާ ކަމަށެވެ. އޭގެ ސަބަބުން ވީއޭއާރުގެ ބޭނުން ނުހިފޭ ކަމަށްވެސް މޮރީނިއޯ ބުންޏެވެ.
މޮރީނިއޯ ބުނީ ރެފުރީންނަށްވެސް ގޯސް ހެދޭނެކަން އޭނާ ގަބޫލުކުރާ ކަމަށާއި، އެކަމަކު އެކަން ތަކުރާރުވުން އެއީ ބަލައިގަނެވޭނެ ކަމެއް ނޫން ކަމަށެވެ. އަދި މި ވާހަކަތަކަކީ އޭނާ އެކަނި ދަށްކަމުން އަންނަ ވާހަކަތަކެއް ނޫން ކަމަށާއި، މިކަން އިނގިރޭސި އެފްއޭއިން ބަލަން ޖެހޭ ކަމަށްވެސް މޮރީނިއޯ ބުންޏެވެ.
ވީއޭއާރުގެ ސަބަބުން ކުޅުންތެރިންނަށް އެކަމުގެ އަސަރު ކުރާކަން ފާހަގަކުރަމުން މޮރީނިއޯ ބުނީ ކުޅުންތެރިން ބައެއް ފަހަރު ޕްރެޝަރަށް ވައްޓާލުމުގައި ވީއޭއާރުގެ ދައުރު ބޮޑު ކަމަށެވެ. އަދި ވީއޭއާރުގެ ސަބަބުން ފުޓްބޯޅައިގެ ފޯރި ކުޑަވެގެން ގޮސްދާނެ ކަމުގެ ބިރު އެބައޮތް ކަމަށްވެސް މޮރީނިއޯ ބުންޏެވެ.
އިނގިރޭސި މުބާރާތްތަކުގައި މިދިޔަ ސީޒަނުން ފެށިގެން ވީއޭއާރް ބޭނުންކުރަމުން އަންނަނީ އެހެން ގައުމުތަކާ ތަފާތު ގޮތަކަށެވެ. އެ ގޮތުން ދަނޑު ކައިރީގައި ހުންނަ ވީޑިއޯ މޮނީޓަރު އިނގިރޭސި ރެފުރީން ބޭނުމެއްނުކުރެއެވެ. އޭގެ ބަދަލުގައި ވީޑިއޯ ބެލުމަށްފަހު ގިނަ ނިންމުންތައް ނިންމަނީ ވީއޭއާރް ރޫމުގައި ހުންނަ ރެފުރީއެވެ.
ވީއޭއާރުގެ މައްސަލައިގައި މިހާތަނަށް ގިނަ ކޯޗުންތަކެއް ކަންބޮޑުވުން ފާޅުކޮށްފައިވާއިރު، ޕްރިމިއާ ލީގުގައި ވީއޭއާރް ބޭނުން ނުކުރުމަށް ސަޕޯޓަރުންނާއި ކޯޗުން އަދި ކުޅުންތެރިންވެސް ވަނީ އެކި ފަހަރު މަތިން ގޮވާލާފައެވެ.
