ނައިފަރު އަދި ވޭމަންޑޫގެ ނަރުދަމާ މަޝްރޫއުގެ ނުނިމި ހުރި މަސައްކަތް ކުރުމަށް ހަވާލުކޮށްފި

ޅ.ނައިފަރު އަދި ތ.ވޭމަންޑޫގެ ނަރުދަމާގެ މަޝްރޫއުގެ ނުނިމި ހުރި މަސައްކަތް ކުރުމަށް މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ)އާ ހަވާލުކޮށްފިއެވެ.

މިއެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނަރަލް ފާތިމަތު ޝާނާ ފާރޫގެވެ. އެމްޑަބްލިޔުއެސްސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ހަސަން ޝާހެވެ.

މިމަޝްރޫއުތަކަށް ފަންޑު ކުރުމަށް ހަމަޖެހިފައިވަނީ އިސްލާމިކް ޑިވެލޮކްޕްމެންޓް ބޭންކް (އައި.ޑީ.ބީ) އާއި އޯޕެކް ފަންޑް ފޯރ އިންޓަނޭޝަނަލް ޑިވެލޮޕްމަންޓް (އޮޕިޑް) ފޭސް 2 ލޯނު އެހީއިންނާއި ސަރުކާރުގެ ބަޖެޓުންނެވެ.

އިންފްރާސްޓްރަކްޗަރ މިނިސްޓްރީން ބުނީ ނައިފަރު ނަރުދަމާއަށް ފަންޑު ކުރުމަށް ހަމަޖެހިފައިވަނީ އައިޑީބީ އިން ކަމަށެވެ. 5 މަސް ދުވަހުގެ ތެރޭގައި ނިންމަން ޖެހޭ މިމަޝްރޫއަށް 24،266،061 (ސައުވީސް މިލިއަން ދެލައްކަ ފަސްދޮޅަސް ހަހާސް ފަސްދޮޅަސް އެއް ރުފިޔާ) ހަރަދުވާނެ ކަމަށް މިނިސްޓްރީން ބުނެއެވެ.

މީގެ އިތުރުން ވޭމަންޑޫގެ ނަރުދަމާއަށް ވެސް ފަންޑު ކުރުމަށް ހަމަޖެހިފައިވަނީ އައިޑީބީ އިންނެވެ. އަދި 4 މަސް ދުވަހުގެ ތެރޭގައި ނިންމަން ޖެހޭ މިމަޝްރޫއަށް ވެސް 17،153،276.10 (ސަތާރަ މިލިއަން އެއްލައްކަ ފަންސާސްތިން ހާސް ދުއިސައްތަ ހަތްދިހަ ހަރުފިޔާ ދިހަ ލާރިއެވެ.

މިމަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތައް ތަފްސީލްކޮށް އިންފްރާސްޓްރަކްޗަރ މިނިސްޓްރީން ބުނީ ނައިފަރާއި، ވޭމަންޑޫ ނަރުދަމާ ނިޒާމްގެ މިހާރު ނުނިމި ހުރި ހުރިހާ މަސައްކަތްތަކެއް ނިންމާނެ ކަމަށެވެ.

މީގެ ތެރޭގައި ހޮޅި ވަޅުނުލައި ހުރި ސަރަހައްދުތަކުގައި ހޮޅިވަޅުލުމާއި، ޕަމްޕް ސްޓޭޝަނާއި އިދާރީ އޮފީހުގެ ފިނިޝިންގ ގެ މަސައްކަތާއި ސްވޭޖް ޓްރީޓްމަންޓް ޕްލާންޓް (އެސްޓީފީ)ގެ ފިނިޝިންގ މަސައްކަތް އަދި ސީ އައުޓް ފޯލްގެ ނުނިމި ހުރި މަސައްކަތުގެ އިތުރުން ޕަމްޕް ސްޓޭޝަނާއި އެސްޓީޕީގެ އިލެކްޓްރޯ މެކޭނިކަލް މަސައްކަތް ހިމެނޭ ކަމަށް މިނިސްޓްރީން ބުނެއެވެ.