މަކަރާއި ހީލަތުން ފައިސާ ހޯދަމުންދިޔަ ކަމަށް ތުހުމަތު ކުރެވޭ މީހެއްގެ ޝިކާރައަކަށް އިތުރު ބަޔަކު ވެފައިވޭތޯ ބަލަނީ
26 އޮކްޓޯބަރު 2020 | ހޯމަ 04:26ސައްހަނޫން އެއްބަސްވުންތަކެއް ހަދައިގެން އެޕާޓްމަންޓް ކުއްޔަށްދީ ފައިސާ ހޯދަމުންދާ މީހެއް ކަމަށް ތުހުމަތު ކުރެވޭ
މަކަރާއި ހީލަތުން ފައިސާ ހޯދަމުންދިޔަކަމުގެ ތުހުމަތު ކުރެވޭ ނަޒީދު،
މަކަރާއި ހީލަތުން ފައިސާ ހޯދަމުންދިޔަ ކަމުގެ ތުހުމަތު ކުރެވޭ މީހެއްގެ ފޮޓޯ އާންމު ކޮށް، އެމީހާގެ ޝިކާރައަކަށް އިތުރު ބަޔަކު ވެފައިވޭތޯ ބެލުމުގެ މަސައްކަތް ފުލުހުން ފަށައިފިއެވެ.
ފުލުހުން ބުނީ ޅ.ހިންނަވަރު، އަންބަރީގެ، 37 އަހަރުގެ އިބްރާހީމް ނަޒީދަކީ ސައްހަނޫން އެއްބަސްވުންތަކެއް ހަދައިގެން ގިނަ އަދަދެއްގެ ބަޔަކަށް އެޕާޓްމަންޓް ކުއްޔަށްދީ މަކަރާއި ހީލަތުން ގިނަ އަދަދެއްގެ ފައިސާ ހޯދަމުންދިޔަކަމަށް ތުހުމަތުކުރެވޭ މީހެއް ކަަމަށެވެ.
ފުލުހުން ބުނީ ނަޒީދުގެ ފުށުން އެފަދަ އަމަލެއްގެ ޝިކާރައަކަށްވެފައިވާ އިތުރު ފަރާތެއްވާނަމަ، އެ މައްސަލައެއްގެ މައުލޫމާތު ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ނަމްބަރު 9790048 އަށް ގުޅައި ހިއްސާ ކުރުމަށް އެދޭ ކަމަށެވެ.
މީގެ އިތުރުން ފުލުހުން ބުނީ ތަފާތު ގޮތްގޮތަށް މަކަރާއި ހީލަތުން ފައިސާ ހޯދުމުގެ މައްސަލަތަކަކީ މިހާރަކަށް އައިސް މުޖުތަމައުގައި އިތުރު ވަމުންދާ މައްސަލަތަކަކަށްވާތީ، ފައިސާއާއި އަގު ބޮޑު ތަކެތި ހިމެނޭ މުއާމަލާތްތައް ކުރާއިރު އެކުރެވޭ މުއާމަލާތަކީ ސައްހަ މުއާމަލާތެއްތޯ ކަށަވަރު ކުރުމަށް ސަމާލުކަން ދޭން ޖެހޭ ކަަމަށެވެ.
ފުލުހުން ބުނީ ސައްހަނޫން މުއާމަލާތެއް ހިންގުމަށް މަސައްކަތްކުރާ ކަމަށް ޝައްކު ކުރެވޭ ނަމަ، ލަސްނުކޮށް އެ މުއާމަލާތެއްގެ މައުލޫމާތު މޯލްޑިވްސް ޕޮލިސް ސާވިސްއަށް އެންގުމަށް ވަނީ އިލްތިމާސް ކޮށްފައެވެ. އަދި ރާއްޖޭގައި ހިނގާ މިފަދަ ކުށްތައް ހުއްޓުވުމަށް ރައްޔިތުންގެ ފަރާތުން ލިބޭ އެއްބާރުލުން ފުލުހުން ވަނީ ފާހަގަ ކޮށްފައެވެ.
މަކާރާއި ހީލަތުން ފައިސާ ހޯދުމާއި، ފޭރުމާއި ވައްކަމުގެ މައްސަލަތައް ހުއްޓުވައި، އެފަދަ ފަރާތްތައް ހޯދުމަށް ފުލުހުން ދަނީ އަބަދު ވެސް އޮޕަރޭޝަންތައް ހިންގަމުންނެވެ.
