ގްރީނުން ފަރިތަކުރުންތައް ފަށައިފި، ސްކޮޑާ މެދު ނިސްތާރު ހިތްހަމަޖެހޭ

ކުރިއަށް އޮތް ފުޓްބޯޅަ ސީޒަނަށް ތައްޔާރުވުމަށް ކުލަބު ގްރީން ސްޓްރީޓްސްއިން ފަރިތަކުރުންތައް ފަށައިފިއެވެ.

ފަރިތަކުރުންތައް ފެށުމުގެ ހުއްދަ ފުރަތަމަ ޑިވިޝަނުގެ ކުލަބުތަކަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދީފައިވަނީ މި މަހުގެ ކުރީކޮޅުއެވެ. އެހެންކަމުން ހޮނިހިރު ދުވަހުގެ ހަވީރު ގްރީނުން ވަނީ ފަރިތަކުރުންތައް ފަށާފައެވެ.

އައު ސީޒަނަށް ގްރީނުން ކުރިމަތިލަނީ އެ ޓީމުގެ ސްކޮޑަށް ގިނަ ބަދަލުތަކެއް ގެނެސްގެންނެވެ. އެގޮތުން ޒުވާން ކުޅުންތެރިން ކަމަށްވާ ހަސަން ނަޒީމް ގާސިމް (ޗޯޓު) އާއި، މުޙައްމަދު ޖައިލަމް (އޮގީ) އާއި، އަހުމަދު ނާހިލް އިބްރާހިމާއި، މުހައްމަދު ކަރަމް އަދި އިބްރާހިމް ހަސީބު ވަނީ ގްރީނާ ގުޅިފައެވެ. އަދި ބިދޭސީ ކުޅުންތެރިންގެ ތެރޭގައި ފުރަތަމަ ޑިވިޝަނުގެ ގިނަ ކުލަބުތަކަށް ކުޅުނު ސްޕެއިނުގެ މިޑްފީލްޑަރު އެންޖެލް މުނޯޒް އާއި މިސްރުގެ މިޑްފީލްޑަރު ޚަލީލް ޖަމާލުގެ އިތުރުން ޕާކިސްތާނުގެ ގޯލްކީޕަރު ހަނީފް ސާގިބުވެސް ވަނީ އެ ޓީމާ ގުޅިފައެވެ.

"ރާއްޖެޓީވީ" އަށް ދިން އިންޓަވިއުއެއްގައި ގްރީންގެ ކޯޗު އަލީ ނިސްތާރު މުޙައްމަދު ބުނީ ގްރީނުގައި އޮތީ ވަރަށް ރަނގަޅު އޭނާ ހިތްހަމަޖެހޭ ސްކޮޑެއް ކަމަށާއި، މެނޭޖުމަންޓުން މަސައްކަތް ކޮށްގެން އޭނާ ބޭނުންވި ވަރަށް ގިނަ ކުޅުންތެރިންތަކެއް ހޯދައިދިން ކަމަށެވެ. އަދި ޓީމުގައި ޒުވާން ކުޅުންތެރިންގެ އިތުރަށް ތަޖުރިބާހުރި ކުޅުންތެރިންވެސް ހިމެނޭ ކަމަށާއި، މި ކުޅުންތެރިން އެކުގައި ރަނގަޅު ކުޅުމެއް ދެއްކޭނެ ކަމުގެ އުންމީދު އެބައޮތް ކަމަށްވެސް ބުންޏެވެ.

ކުރިއަށް އޮތް ފުޓްބޯޅަ ސީޒަން ޑިސެމްބަރު މަހުގެ އަށްވަނަ ދުވަހު ފެށުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މިހާރު ނިންމާފައިވާއިރު، މިހާތަނަށް ތިން ޓީމަކުން ވަނީ އައު ސީޒަނަށް ތައްޔާރުވުމަށް ފަރިތަކުރުންތައް ފަށާފައެވެ، އެއީ ގްރީނުގެ އިތުރުން ކުލަބު ވެލެންސިއާ އާއި މާޒިޔާ ސްޕޯޓްސް އެންޑް ރެކްރިއޭޝަނެވެ.

ޑިސެމްބަރު މަހުގެ އަށްވަނަ ދުވަހު އެފްއޭ ޗެރިޓީ ޝީލްޑް މެޗުން ފުޓްބޯޅަ ސީޒަން ފަށާއިރު، ދިރާގު ދިވެހި ޕްރިމިއާ ލީގުގެ ކުޅުން ފެށުމަށް ތާވަލުކޮށްފައިވަނީ ޑިސެމްބަރު މަހުގެ 13 ވަނަ ދުވަހަށެވެ. ލީގުގައި ގްރީނުން ކުޅޭ ފުރަތަމަ މެޗުގައި ޑިސެމްބަރު މަހުގެ 14 ވަނަ ދުވަހު ނުކުންނާނީ ވެލެންސިއާއާ ދެކޮޅަށެވެ.