އާލާކުރި ކަސް ފާނަތައް އެމްސްޓަރޑަމް އަށް!
25 އޮކްޓޯބަރު 2020 | އާދީއްތަ 07:44މިއީ މިގޮތަށް ކޮށީގައި އާލަކޮށް ނީލަމަށް ހުޅުވާލާ ވިއްކާލެވުނު ފުރަތަމަ ބެޗު
ރާއްޖޭގައި ކޮށީގައި އާލާކޮށްގެން ނީލަމުގައި ވިއްކަމުން އަންނަ ބާވަތުގެ ކަސް ފާނަ
ނީލަމުގައި ވިއްކާލެވުނު ކަސް ފާނަތައް ނެދަރލޭންޑްސްގެ އެމްސްޓަރޑަމް އަށް ގެންދިއުމަށް ތައްޔާރުވެފައިވާ ކަމަށް މިނިސްޓަރ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްްޖެއެވެ.
ރާއްޖޭގައި ފުރަތަމަ ފަހަރަށް މޫދު ކޮށީގައި ބޮޑުކޮށްފައިވާ ފާނައަށް ނީލަމުގައި ވިއްކާލާފައިވާ އިރު މިކަމާ ގުޅޭ ގޮތުން މިނިސްޓަރ ކުރެއްވި ޓުވީޓެއްގައި ވަނީ އދ. މަހިބަދޫގައި އާލާކުރެވުނު ފާނަތައް އެމްސްޓަރޑަމްއަށް ގެންދިއުމަށް ތައްޔާރުވެފައިވާ ކަމަށް ވިދާޅުވެފައެވެ.
މިއީ މިގޮތަށް ކޮށީގައި އާލަކޮށް ނީލަމަށް ހުޅުވާލާ ވިއްކާލެވުނު ފުރަތަމަ ބެޗުކަން ފާހަގަކުރައްވާ މިނިސްޓަރ ވަނީ ކަސް ފާނަތައް އާލާކުރުމުގައި ހަރަކާތްތެރިވި ދަނޑުވެރިންނަށް މަރުހަބާ ވިދާޅުވެފައެވެ.
ވަރލްޑް ބޭންކުގެ ހިލޭ އެހީގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ހިންގާ ސަސްޓެއިނަބަލް ފިޝަރީޒް ރިސޯސަސް ޑިވެލޮޕްމަންޓް ޕްރޮޖެކްޓުގެ ދަށުން ހިންގާ މި މަޝްރޫއުގައި އާލާކުރެވުނު 2،132 ކަސް ފާނަ ނީލަމުގައި ވިއްކާލާފައިވެއެވެ. މި ކަސްފާނަތައް ވިއްކާލާފައި ވަނީ 213،637 ރުފިޔާއަށެވެ.
މިއީ އދ. އަތޮޅަށް އަމާޒުކޮށްގެން ހިންގަމުންދާ ޕްރޮޖެކްޓަކަށްވާއިރު މި މަސައްކަތް ފަށާފައި ވަނީ މި އަހަރުގެ ޖެނުއަރީ މަހު އދ. މަހިބަދޫ، އޮމަދޫ، ދިގުރަށް އަދި ދަނގެތީގައެވެ.
