ބަލީގެ އަލާމާތެއް ހުންނަ މީހުން ކުޅުދުއްފުށި ފުލޫ ކްލިނިކަށް ދައްކަން އެދިއްޖެ

ކުޅުދުއްފުށި ސިޓީގައި ކޖޮވިޑް-19 ގެ ބަލީގެ އަލާމާތެއް ހުރި މީހަކު ހުރިނަމަ ފުލޫ ކްލިނިކަށް ލަސްނުކޮށް ދެއްކުމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން އެދިއްޖެއެވެ.

ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެކްނިކަލް އެޑްވައިޒަރީ ގްރޫޕުގައި ހިމެނިވަޑައިގަންނަވާ އެތެރެހަށީގެ ބަލިތަކުގެ ޚާއްސަ ޑރ. މުހައްމަދު އަލީ ވިދާޅުވީ ބަލި އިތުރަށް ފެތުރުނަ ނުދިނުމަށްޓަކައި ކުޅުދުއްފުށި ރައްޔިތުން ވަރަށްބޮޑު އަހައްމިއްޔަތުކަމެއް ދޭންޖެހޭ ކަމަށެވެ. އަދ ބަލި ރަށުތެރޭގައި ފެތުރުނަ ނުދިނުމަށްޓަކައި ކުރަންޖެހޭނެ ވަރަށް މުހިންމު ކަންތައްތަކެއް އެބަހުރި ކަމަށާއި، އެންމެ މުހިންމު ކަމަކީ ބަލީގެ އަލާމާތްތައް ހުންނަ ފަރާތްތަކުން ފުލޫ ކްލިނިކަށް ދެއްކުން ކަމަށެވެ.

Advertisement

ޑރ. މުހައމަދު އަލީ ވިދާޅުވީ ބަލި ރަށު ތެރޭގައި ފެތުރިފައި އޮތްތޯ ބެލުމަށްޓަކައި ކުރަންޖެހޭ މަސައްކަތްތައް އެބަހުރ ކަމަށާއި، އޭގެ ފަހުގައި ނަގަންޖެހޭ އިތުރު ފިޔަވަޅުތަކާއި މަސައްކަތްތައް ހުންނަ ކަމަށެވެ. އެހެންކަމުން ބަލި ފެތުރިގައިހުރި މިންވަރު އެނގިގެން ނޫނީ އިތުރު ފިޔަވަޅުތަކެއް ނޭޅޭނެ ކަމަށާއި، މިއީ މުހިންމުކަމެއްގެ ގޮތުގައި ދެކިގެން ހުރިހާ ރައްޔިތުން ވެސް އިސްކަންދިނުމަށް އޭނާ އެދިވަޑައިގެންނެވިއެވެ.

ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ޑރ ނަޒްލާ ރަފީގު ވިދާޅުވީ ކުޅުދުއްފުށި މޮނިޓަރިންގ ގެ ހާލަތުގައި އޮތީ އެރަށުގައި ލޯކަލް ޓްރާންސްމިޝަން އޮތުމާއެކު ބަލި އޮތް މިންވަރު ދެނެގަނެވެން ދެން ކަމަށެވެ. ކުޅުދުއްފުށިން މި މަހުގެ 17 ވަނަ ދުވަހުން ފެށިގެން ބަލީގެ އަލާމާތްތައް ހުރެގެން 59 މީހުންގެ ސާމްޕަލް ނަގާފައިވާ ކަމަށާއި އެއިން އެއްވެސް މީހަކު ކޮވިޑް-19 އަށް ޕޮޒިޓިވްވެފައި ނުވާ ކަމަށް ޑރ. ނަޒްލާ ވިދާޅުވިއެވެ.

އޭގެ އިތުރުން، ރަށު ތެރޭގައި ބަލި އޮތް މިންވަރު ދެނެގަތުމަށް ރޭންޑަމް ސާމްޕަލްގެ ގޮތުގައި 120 ސާމްޕަލެއް ނަގާފައިވާ ކަމަށާއި އެ މީހުންގެ ސާމްޕަލްތައް ވެސް ނެެގެޓިވް ކަމަށް ޑރ. ނަޒްލާ ވިދާޅުވިއެވެ. އަދި އެ ރަށުގައި ބަލި އޮތް މިންވަރު ދެނެގަތުމަށް އަދި އެއް ފަހަރު ވަރަށް އަވަހަށް ސާމްޕަލް ނަގާނެ ކަމަށް ވިދާޅުވިއެވެ.