އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާ ދިމާ ބޭރުން މޫދުގައި މަރުވެފައި އޮތް މީހާގެ ޕޯސްޓް މޯޓަމް ހެދުމަށް ފުލުހުން ނިންމައިފިއެވެ.
މީޑިއާއަށް މައުލޫމާތު ދެމުން ފުލުހުން ބުނީ އެއީ ޤުދުރަތީ މަރެއްކަން ކަށަވަރު ކުރެވިފައި ނުވާތީ ބަލަންޖެހޭ ކަންކަން ބަލަމުންދާ ކަމަށެވެ. އެގޮތުން މަރުގެ ސަބަބު ކަށަވަރު ކުރެވިފައި ނުވާތީ ޕޯސްޓްމޯޓަމް ހެދުމަށް ކުރަން ޖެހޭ ކަންކަން ކުރުމަށް ހަށިގަނޑު ވަނީ މޯޗަރީގައި ކަމަށް ފުލުހުން މައުލޫމާތު ދެއެވެ.
މަރުވެފައިވާ މީހާގެ ހަށިގަނޑު އެ ސަރަހައްދު ގައި އޮތް ކަމުގެ މައުލޫމާތު ފުލުހުންނަށް ލިިބިފައި ވަނީ ހެނދުނު 10:40 ހާއިރުއެވެ.
ފުލުހުން ބުނީ މަރުވެފައި އޮއްވާ ފެނުނީ އުމުރުން 31 އަހަރުގެ ދިވެއްސެއް ކަމަށެވެ. އެ މީހާގެ ހަށިގަނޑު މިހާރު އައިޖީއެމްއެޗަށް ގެންގޮސްފައިވާ އިރު, އެ މައްސަލައާ ގުޅިގެން ބަަލަން ޖެހޭ ކަންތައްތައް ބަލަމުންދާ ކަމަށެވެ.
"ރާއްޖެއެމްވީ" އަށް މައުލޫމާތު ލިބިފައިވާގޮތުގައި މަރުވެފައިއޮތްވާ ފެނުނީ ގދ. ވާދޫއަށް ނިސްބަތްވާ މީހެކެވެ.
