ޔުއެފާ ޔޫރޮޕާ ލީގުގައި ބުރާސްފަތި ދުވަހުގެރޭ ކުޅުނު މެޗުތަކުން އޭސީ މިލާނާއި ރޯމާވެސް މޮޅުވެއްޖެއެވެ.

ރަށުން ބޭރުގައި ކުޅުނު މެޗުން މިލާން މޮޅުވީ ސެލްޓިކް އަތުން 3-1 ގެ ނަތީޖާއަކުންނެވެ.

މި މެޗުގައި މިލާނުން ރަނގަޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 14 ވަނަ މިނެޓުގައި މިލާނަށް ލީޑު ނަގައިދިނީ ރަޑް ކްރުނިޗެވެ. އަދި ފުރަތަމަ ހާފު ނިމެން ތިން މިނެޓަށް ވެފައި ވަނިކޮށް ބްރަހިމް ޑިއާޒް ވަނީ މިލާނަށް ލީޑު ފުޅާކޮށްދީފައެވެ.

މިލާނުން ދެ ލަނޑުގެ ލީޑެއް ނަގާފައި އޮތް ނަމަވެސް، މެޗުގެ 46 ވަނަ މިނެޓުގައި ސެލްޓިކުން ވަނީ ލަނޑެއް ޖަހާ ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މުޙައްމަދު އެލްޔޫނުސީއެވެ. އެކަމަކު މެޗުގެ އިތުރު ވަގުތުގައި ޔެންސް ޕީޓާ ހޯގް ވަނީ ލަނޑެއް ޖަހާ މި މެޗުން މިލާނަށް ތިން ޕޮއިންޓް ހޯދައިދީފައެވެ.

މި މުބާރާތުގައި ބުރާސްފަތި ދުވަހުގެރޭ ކުޅުނު މެޗުން ރޯމާ މޮޅުވީ ޔަންގް ބޯއީސް އަތުން ފަހަތުން އަރައި 2-1 ގެ ނަތީޖާއަކުންނެވެ.

ޔަންގް ބޯއީސްގެ ދަނޑުގައި ކުޅުނު މި މެޗުގެ 14 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ޖަހައިދިނީ ޖިއަން-ޕިއޭ އެންސާމޭއެވެ.

މެޗުގައި ރޯމާއިން އެ ޓީމު ކޮޅަށް ނަތީޖާ އަނބުރާލީ ދެވަނަ ހާފުގައެވެ. އެގޮތުން މެޗުގެ 69 ވަނަ މިނެޓުގައި ކާލެސް ޕެރޭޒް ރޯމާއަށް ނަތީޖާ އެއްވަރުކޮށްދިންއިރު، އޭގެ ހަތަރު މިނެޓު ފަހުން މަރާޝް ކުމްބުލާ ވަނީ ލަނޑެއް ޖަހާ މި މެޗުން ރޯމާ މޮޅުކޮށްދީފައެވެ.

ބުރާސްފަތި ދުވަހުގެރޭ ކުޅުނު މެޗުތަކުން މިލާނާއި ރޯމާ މޮޅެއް ހޯދި ނަމަވެސް، އަމިއްލަ ދަނޑުގައި ނާޕޮލީ ވަނީ އޭޒެޑް އަލްކްމާރް އަތުން 1-0 ން ބަލިވެފައެވެ.