ވަޒީރުންނަށް ގުޅާ ދާއިރާގެ ކަންކަމުގައި ނުކިޔުމަށް ރައީސް ނަޝީދު އިލްތިމާސް ކުރައްވައިފި
21 އޮކްޓޯބަރު 2020 | ބުދަ 18:19ސަރުކާރާއި ގުޅިގެން މަސައްކަތްކުރުމަށް މެމްބަރުން ވައުދުވެވަޑައިގެންނެވި ނަމަވެސް ވަޒީރާ ގުޅުން ބާއްވަންޖެހޭނީ މަޖިލިސް މެދުވެރިކޮށް ސުވާލު ކުރައްވައިގެން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ވަޒީރުންނާއި ރައްޔިތުންގެ މަޖިލީހުގެ މެމްބަރުން ގުޅުއްވާ ދާއިރާގެ އެކި ކަންކަން ކުރުމަށް ވާހަކަ ދެއްކުމަކީ ނިޒާމު ހަމަޖެހިފައި އޮންނަ ގޮތް ނޫން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން ހޯމް މިިނިސްޓަރ އައްޝެއިޚް އިމްރާން އަބްދުﷲ އާ ވަނީ ސުވާލުކޮށްފައެވެ. އެގޮތުން އިތުރު ސުވާލުކުރުމަށް ހުޅުވާލި ފުރުސަތުގައި ދިއްގަރު ދާއިރާގެ މެމްބަރ އިކްރާމް ހަސަން ވަނީ މަޖިލީހުގެ އިންތިޚާބުގައި ރައްޔިތުން ކައިރިއަށްގޮސް ވޯޓު ހޯދިއިރު ސަރުކާރާއެކު ގާތުން މެދުވެރިއަކަށް ވެގެން މަސައްކަތްކުރާނެ ކަމަށް ރައްޔިތުން ކައިރީ ދަންނަވާފައި ވާނެ ކަމަށް ވިދާޅުވެފައެވެ. އަދި ހޯމް މިނިސްޓަރަކީ އެލްޖީއޭގައި ވެސް މުހިންމު ދައުރެއް އަދާކުރައްވާ ބޭފުޅެއް ކަމަށާއި ދާއިރާގެ އެކި ކަންކަމުގައި މިނިސްޓަރަށް ގުޅުއްވަން މަސައްކަތް ކުރާ އިރު ނުގުޅޭ މައްސަލަ ވަރަށް ބޮޑަށް ފާހަގަވާ ކަމަށް އިކްރާމް ވިދާޅުވިއެވެ.
މިކަމުގައި މިިނިސްޓަރު ގެންގުޅުއްވާ އެއްވެސް ސިޔާސަތެއް އޮވޭތޯ އާއި މިނިސްޓަރ މަޖިލީހަށް ހާޒިރު ކޮށްގެން ނޫން ގޮތަކަށް ޖަވާބު ނުލިބޭނެތޯ އިކްރާމް ވަނީ ސުވާލު ކުރައްވާފައެވެ. އިކްރާމް މި ސުވާލު އެއްސެވުމުން ރިޔާސަތުގައި އިންނެވި މަޖިލީހުގެ ރައީސް ވިދާޅުވީ ސަރުކާރާއި ގުޅިގެން މަސައްކަތް ކުރުމަށް މެމްބަރުން ވައުދުވެވަޑައިގެންނެވި ނަމަވެސް ވަޒީރާ ގުޅުން ބާއްވަން ޖެހޭނީ މަޖިލިސް މެދުވެރިކޮށް ސުވާލު ކުރައްވައިގެން ކަމަށެވެ.
ރައީސް ނަޝީދު މިހެން ވިދާޅުވެ މިނިސްޓަރ އިމްރާނަށް ޖަވާބު ދެއްވުމުގެ ފުރުސަތު ދެއްވުމުން މިނިސްޓަރ ވިދާޅުވީ ރިޔާސަތުން އެ ސުވާލުގެ ޖަވާބުގެ އެއްބައި ދެއްވައިފި ކަމުގައެވެ. އަދި، މިނިސްޓަރަށް އަންނަ ހުރިހާ ފޯނު ކޯލަކަށް ޖަވާބު ނުދެއްވޭކަން ގަބޫލުކުރައްވި ނަމަވެސް، ވީވަރަކުން ޖަވާބު ދާރީވުމަށް މަސައްކަތް ކުރައްވާ ކަމަށް އިމްރާން ވިދާޅުވިއެވެ.
ބައެއް ވަޒީރުން ބައެއް މެމްބަރުންގެ ދާއިރާތަކުގައި ތަފާތު ކުރުންތައް ގެންގުޅޭ ކަމަށް ވިދާޅުވެ އެމްޑީޕީގެ ބައެއް މަޖިލިސް މެމްބަރުން ވަނީ އެކަމުގެ ކަންބޮޑުވުން ފާޅު ކުރައްވާފައެވެ. އަދި ވަޒީރުންނާއި ގާތް މެމްބަރުންގެ ދާއިރާތަކުގެ ކަންކަން ކޮށްދެއްވަމުންދާ ކަމަށާއި މެމްބަރުންނަށް އެނގިވަޑައި ނުގަން ދާއިރާތަކުގެ މަޝްރޫޢުތަކަށް ބަދަލު އަންނަ ކަމުގެ ވާހަކަތަކެއް ވެސް ވަނީ ފެންމަތިވެފައެވެ.
