މަސްތުވާތަކެތީގެ ވަބާގައި ޖެހޭ މީހުނަށް ނަފްސާނީ ފަރުވާ ދިނުމަށް ހާއްސަ ކްލިނިކެއް ހުޅުވައިފި
ގަގަން ކްލިނިކް ހުޅުއްވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމް
\"ގަގަން ކްލިނިކް\" ނައިބް ރައީސް ހުޅުވައިދެއްވުން
މަސްތުވާތަކެތީގެ ވަބާގައި ޖެހޭ މީހުނަށް ނަފްސާނީ ފަރުވާ ދިނުމަށް ހާއްސަ ކްލިނިކެއް އަންގާރަ ދުވަހު ނެޝަަނަލް ޑްރަގް އެޖެންސީ (އެންޑީއޭ) ގައި ހުޅުވައިފައެވެ.
"ގަގަން ކްލިނިކް" ގެ ނަމުގައި ހުޅުވި މި ކްލިނިކް ހުޅުވާ ދެއްވާފައި ވަނީ ނައިބު ރައީސް ފައިސަލް ނަސީމްއެވެ. ނައިބު ރައީސްގެ އިތުރުން ޖެންޑާ މިނިސްޓްރ އައިޝަތު މުހައްމަދު އާއި އެންޑީއޭގެ ވެރިން ކްލިނިކް ހުޅުވި ރަސްމިއްޔާތުގައި ބައިވެރިވެ ވަޑައިގެންފައި ވެއެވެ.
މި ކްލިނިކްއަކީ މަސްތުވާތަކެތީގެ ވަބާގައި ޖެހި ނަފްސާނީ ގޮތުން ބަލިވެފައިވާ ފަރާތްތަކަށް ފަރުވާ ދިނުމަށް ހާއްސަ ކޮށްގެން ހުޅުވި ކްލިނިކެކެވެ.
މި ރަސްމިއްޔާތު އިފްތިތާހު ކޮށް ދެއްވާ ވާހަކަ ދައްކަވަމުން ނައިބު ރައީސް ވިދާޅުވީ ރާއްޖޭގެ ޒުވާނުންނަށް ދިމާވެފައިވާ އެންމެ ބޮޑު އެއް މައްސަލައަކީ މަސްތުވާތަކެތީގެ މައްސަލަ ކަމަށާއި މިކަމުގެ ސަބަބުން ނަފްސީނީ ގޮތުން އެތައް އަސަރުތަކެއް ކޮށްފައިވާ މީހުން ވެސް މި މުޖުތަމައުގައި އެބަތިބި ކަމަށެވެ. އަދި ގަގަން ކްލިނިކް ވެގެންދާނީ މިފަދަ ކަންކަމުން ސަލާމަތް ވުމަށް އެހީވާ ކްލިނިކެއް ގޮތުގައި ކަމަށްވެސް ނައިބު ރައީސް ވަނީ ވިދާޅުވެފައެވެ.
ރައީސް މުހައްމަދު ސޯލިހުގެ ސަރުކާރުން ދަނީ މަސްތުވާތަކެތީގެ ވަބާގައި ޖެހިފައިވާ ޒުވާނުން މުޖުތަމައަށް ބޭނުންތެރި ހުނަރުވެރި ބަޔަކަށް ހެދުމަށް ގިނަގުނަ މަސައްކަތް ތަކެއް ކުރަމުންނެވެ. އަދި މި ކްލިނިކްގެ ސަބަބުން އެކަމަށް އިތުރު އެހީއެއް ވެގެންދާނެއެވެ.
މަސްތުވާތަކެތީގެ ވަބާގައި ޖެހިފައިވާ މީހުންގެ ތެރެއިން ނަފްސާނީ މައްސަލަތަކަށް ހާއްސަކޮށްގެން ފަރުވާދޭ ކްލިނިކްތަކެއް ގާއިމް ކުރުމަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ މަސައްކަތެކެވެ.
