އައިލެންޑް އޭވިއޭޝަން ކާމިޔާބު ކުންފުންޏަކަށް ހެދުމަށް އެއްބާރުލުމާއި އެހީތެރިކަން ބޭނުންވޭ: މެމްބަރުން

މިނިސްޓްރީ އޮފް ފިނޭންސުން ފާސްކޮށްފައިވާ މުސާރައާއި އިނާޔަތްތަކުގެ ބޭރުން އިތުރު އެއްވެސް އެލަވަންސެއް އައިލެންޑް އޭވިއޭޝަންގެ މުވައްޒަފުން ނުނެގުމަށް އެ ކުންފުންޏަށް އެންގުމަށް އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާއިން ވަނީ ފާސްކޮށްފައެވެ. އެ ކުންފުންޏާއި ގުޅުންހުރި ކަންކަން ބަލާފައިވަނީ މަޖިލީހުގެ ސްޓޭޓް އޯންޑް އެންޓަރޕްރައިޒަސް ކޮމިޓީންނެވެ. އެއަށްފަހު ކޮމިޓީން އެކުލަވާލި ރިޕޯޓްގައި އައިލެންޑް އޭވިއޭޝަން އާއި ގުޅިގެން ފުޅާ ދާއިރާއެއްގައި ކަންކަން ބެލި ކޮމިޓީ ރިޕޯޓްގައި 13 ހުށަހެޅުމެއް ހުށަހަޅާފައެވެ.

ކޮމިޓީން އައިލެންޑް އޭވިއޭޝަންގެ މައްސަލަތައް ދިރާސާކުރުމަށްފަހު އެކުލަވާލި ރިޕޯޓް ހުށަހަޅުއްވަމުން އެސްއޯއީ ކޮމިޓީގެ މުގައްރިރު ހުޅުދޫ ދާއިރާގެ މެމްބަރ އިލްޔާސް ލަބީބު ވަނީ އައިލެންޑް އޭވިއޭޝަންގެ ކަންކަން ދިރާސާކުރުމުގައި އޮޑިޓަރ ޖެނެރަލް މިދިޔަ އަހަރުގެ ނޮވެމްބަރ މަހު ނެރުއްވާފައިވާ އޮޑިޓް ރިޕޯޓާއި އައިލެންޑް އޭވިއޭޝަން ސަރވިސްގެ ޚާއްސަ ރިވިއު ރިޕޯޓް ދިރާސާކޮށްފައެވެ. އަދި ކޮމިޓީގެ އެކި ބައްދަލުވުންތަކުގައި އައިލެންޑް އޭވިއޭޝަންގެ ބޭފުޅުން ހިއްސާކޮށްފައިވާ މައުލޫމާތުތައްވެސް ދިރާސާކޮށްފައިވާނެ ކަމަށް އިލްޔާސް ލަބީބު ވިދާޅުވިއެވެ.

އައިލެންޑް އޭވިއޭޝަނަކީ މިހާރު ރާއްޖޭގެ ގައުމީ އެއަރލައިނަށް ވާއިރު އެ އެއަރލައިނުން ގައުމަށް ބޭނުންވާ ކޮންމެ ވަގުތެއްގައި ނިކުމެ ގައުމީ ޚިދުމަތްް ކުރާކަން ފާހަގަކުރައްވާ އިލްޔާސް ލަބީބު ވަނީ ކޮވިޑްގެ މިދަތި ހާލަތުގައި އައިލެންޑް އޭވިއޭޝަނުން ކޮށްފައިވާ ގިނަ ގުނަ މަސައްކަތްތައް ފާހަގަކުރައްވާފައެވެ. އަދި ކޮވިޑާއި ގުޅިގެން މިއަހަރު އައިލެންޑް އޭވިއޭޝަންގެ އާމްދަނީ އަށް އިތުރުވާނެ ކަމަށް އަންދާޒާކޮށްފައިވާ 394 މިލިއަން ރުފިޔާގެ ކުރިއެރުމެއް ނާންނާނެކަން އޮޑިޓަރ ޖެނެރަލް އޮޑިޓު ރިވިއުގައި ފާހަގަކޮށްފައިވާކަމަށް އިލްޔާސް ލަބީބު ވިދާޅުވިއެވެ. މީގެއިތުރުން މުސާރަ އާއި އިނާޔާތްދިނުމުގައި އުސޫލުން ބޭރުން އިތުރަށް ދީފައިވާ ފައިސާ ފިނޭންސް މިނިސްޓްރީގެ އެންގުމާއި އެއްގޮތަށް މިހާރު ހޯދާފައިވާކަމަށްވެސް އިލްޔާސް ލަބީބު ވިދާޅުވިއެވެ.

އިލްޔާސް ލަބީބު ވިދާޅުވީ ކުންފުނީގެ ކުރިމަގަށް ހުރި ހުރަސްތަކާއި ގުޅޭގޮތުން ދިރާސާކުރިއިރު އެންމެ ބޮޑަށް ފާހަަކުރެވުނީ ކޭޝްފްލޯ ރަނގަޅުކުރުމަށް ޚަރަދުކުރެވޭނެ ގޮތްތަކާއި އާމްދަނީ އިތުރުވާނެ ގޮތްތައް ހޯދުމަށް މިއަހަރަށް އަލަށް އެކުލަވާލެވުނު ބަޖެޓް ތަންފީޒުކުރަން ކުންފުނިން ނިންމާފައިވާކަމުގައެވެ.

މީގެއިތުރުން އިލްޔާސް ލަބީބު ވިދާޅުވީ މިދިޔަ އަހަރު ނިމުނުއިރު ކުންފުނީގެ ކޭޝްފްލޯ ހުރީ މައިނަސް 55 މިލިއަން ރުފިޔާގައި ކަމަށެވެ. ނެގެޓިވް ކޭޝް ފްލޯގެ މައިގަނޑު ސަބަބަކީ ކުންފުންޏަށް ފައިސާގެ ބޮޑު ބައި ލިބެންޖެހޭ ސަރުކާރުގެ އިދާރާތަކާއި ސަރުކާރު ހިއްސާވާކުންފުނިތަކުން އެފައިސާ ދިނުމުގައި ލަސްތަކެއްވެފައި ހުރުމާއި ހަމަ އެމުއްދަތުގައި އައިލެންޑް އޭވިއޭޝަން ހިންގުމަށް ދުވަހުން ދުވަހަށް ކޮންމެހެން ދައްކަންޖެހޭ ޚަރަދުތަކަށް އެކުންފުނިން ފައިސާ ދައްކަމުން ގޮސްފައިވުން ކަމަށް އިލްޔާސް ލަބީބު ވިދާޅުވިއެވެ.

އެހެންކަމުން ކޮމިޓީން ހުށަހެޅި 13 ހުށަހެޅުމުގެ ތެރޭގައި އައިލެންޑް އޭވިއޭޝަނަށް ގައުމީ އެެއަރލައިނުގެ ދަރަޖަ ދިނުމަށް ކުރަންޖެހޭ މަސައްކަތްތައް ކުރުމަށް މިހާރަށްވުރެ ބޮޑަށް އެއްބާރުލުން ދިނުމަށް ސަރުކާރަށާއި ސަރުކާރު ހިއްސާވާ ކުންފުނިތަކަށް ދެންނެވުމަށް ވަނީ ހުށަހަޅާފައެވެ.

ކޮމިޓީ ރިޕޯޓަށް ވާހަކަދައްކަވަމުން އެސްއޯއީ ކޮމިޓީގައިވެސް އިންނަވާ ފުވައްމުލަކު މެދު ދާއިރާގެ މެމްބަރ ހުސައިން މުހައްމަދު ދީދީ ވިދާޅުވީ ކޮމިޓީގައި އައިލެންޑް އޭވިއޭޝަންގެ ހާލަތު ވަރަށް ރަނގަޅަށް ބެލުމަށް މަސައްކަތްކޮށްފައިވާނެ ކަމަށެވެ. އެގޮތުން މަސައްކަތްކުރިއިރު ފާހަގަވި ކަމަކީ މިފަދަ ކުންފުނިތަކަށް ރަނގަޅު ފުރުސަތުތަކެއް ސަރުކާރުން ހޯދައިދޭ ކަމަށްވާނަމަ ފައިދާވާ ކުންފުނިތަކަކަށް މިފަދަ ކުންފުނިތައް ވެގެންދާނެ ކަމަށެވެ. އެގޮތުން ފެންނަން ހުރި ހިސާބަށް ބަލާއިރު 2018 ވަނަ އަހަރަށްވުރެ 2019 ވަނަ އަހަރު އެކުންފުންޏަށް ލިބިފައިވާ ފައިދާ ބޮޑު ކަމަށާއި އަދި މިއަހަރު ކޮވިޑްގެ ހާލަތު ނައިނަމަ އަންދާޒާކޮށްފައިވާ 394 މިލިއަން ރުފިޔާގެ ކުރިއެރުމެއް އަންނާނެކަމަށެވެ.

އޮޑިޓަރ ޖެނެރަލްގެ ރިޕޯޓުންވެސް މިކުންފުންޏަކީ މުސްތަގްބަލްއޮތް ކުންފުންޏެއްކަމަށް ފާހަގަކޮށްފައިވާ ކަމަށާއި ކުންފުނީގައި ލިކިއުޑިޓީގެ މައްސަލަތަކެއް ހުރިނަމަވެސް ކުންފުންޏަށް ސަރުކާރުގެ އެހީގައި އެކަމުން އަރައިގަނެވޭނެކަމަށް ހުސައިން ވިދާޅުވިއެވެ.

ފޭދޫ ދާއިރާގެ މެމްބަރ މުހައްމަދު ނިހާދުވެސް ވަނީ ގައުމީ އެއަރލައިނަށް، ގައުމީ އެއަރލައިންގެ ދަރަޖަ ދެވިފައިނުވާކަން ފާހަގަކުރައްވާފައެވެ. އެގޮތުން ސަރުކާރުގެ އިދާރާތަކުންނާއި ސަރުކާރުގެ ކުންފުނިތަކުން އައިލެންޑް އޭވިއޭޝަނަށް ދޭންޖެހޭ އެހީތެރިކަމާއި އެއްބާރުލުންދޭނަމަ މިއަދު ނެރެމުންދާ ނަތީޖާތަކަށްވުރެ ރަނގަޅު ނަތީޖާތަކެއް އެކުންފުނިން ނެރޭނެކަމަށް ނިހާދު ވިދާޅުވިއެވެ.

ކޮމިޓީ ރިޕޯޓަށް ވާހަކަދެއްކެވި އެހެން މެމްބަރުންވެސް ވަނީ އައިލެންޑް އޭވިއޭޝަނަށް ދޭންޖެހޭ އެއްބާރުލުންދީ އެކުންފުންޏަކީ ފައިދާވާނެ ކުންފުންޏަކަށް ހެދުމަށް ސަރުކާރުގެ ކަމާބެހޭ ފަރާތްތަކުން އެއްބާރުލުން ދިނުމަށް އެދިވަޑައިގަންފައެވެ.

އައިލެންޑް އޭވިއޭޝަން އުފެދިފައިވަނީ 2000 ވަނަ އަހަރުއެވެ. އައިލެންޑް އޭވިއޭޝަން އުފެދުމުގެ ކުރިން އޮތީ އެއަރ މޯލްޑިވްސްއެވެ. އެކުންފުނީގެ ނަމުގައި ނެގި ލޯނުތައް ނުދެއްކި ކުންފުނި ބަނގުރޫޓްވާ ހިސާބަށް ދިއުމުން އެކުންފުނި އުވާލުމަށްފަހު އުފެއްދި ކުންފުންޏަކީ އައިލެންޑް އޭވިއޭޝަނެވެ.