ހުޅުމާލެ ދެވަނަ ފިޔަވަހީގައި 100 މީހުންގެ ޖާގައިގެ ދެެ ބަސް ސްޓޮޕް އަޅަނީ
20 އޮކްޓޯބަރު 2020 | އަންގާރަ 04:36ސްކޫލް ގަޑިތަކަށް ޚާއްސަކޮށް ބަހުގެ ޚިދުމަތް ފޯރުކޮށްދިނުމަށް ދަނީ މަޝްވަރާ ކުރެވެމުން
ހުޅުމާލެ
ހުޅުމާލެ ދެވަނަ ފިޔަވަހީގައި ޤާއިމްކޮށްފައިވާ ހިޔާ ފްލެޓްތައް ހުންނަ ސަރަހައްދުގައި ޤާއިމްކުރާ ދެ ބަސް ސްޓޮޕް ހެދުމުގެ މަސައްކަތް ކުރަމުން އަންނަ ކަމަށް އެޗްޑީސީގެ މެނޭޖިންގ ޑިރެކްޓަރު ސުހައިލު އަހުމަދު ވިދާޅުވެއްޖެއެވެ.
ހޯމަ ދުވަހުގެރޭ ރާއްޖެޓީވީގެ "ފަލަ ސުރުޚީ" ޕްރޮގްރާމުގައި ވާހަކަދައްކަވަމުން ސުހައިލް ވިދާޅުވީ ހިޔާ މަޝްރޫއުގެ ފްލެޓްތައް ހަވާލުކުރެވޭއިރު، އެ ފްލެޓްތަކުގައި ދިރިއުޅޭ ފަރާތްތަކަށް ޚާއްސަކޮށް, އެ ސަހައްދުގައި ދެ ބަސް ސްޓޮޕް ގާއިމްކުރުމުގެ މަސައްކަތާއި ބަހުގެ ޚިދުމަތް ފޯރުކޮށް ދިނުމުގެ މަސައްކަތް އެމްޓީސީސީއާ ހަވާލުކުރެވިފައިވާ ކަމަށެވެ. ހިޔާ ފްލެޓްތަކުގައި މީހުން ދިރިއުޅެން ފަށާއިރު ފޭސް 2 ގައި އިމާރާތްކުރާ ސްކޫލްގެ މަސައްކަތް ނުނިމިދާނެ ކަމަށާއި އެހެންކަމުން ދަރިވަރުން މާލެއަށް ސްކޫލަށް އައުމުގައި ދިމާވެދާނެ ދަތިތަކަށް ހައްލެއް ގެނައުމަށް ސްކޫލް ގަޑިތަކަށް ޚާއްސަކޮށް ބަހުގެ ޚިދުމަތް ފޯރުކޮށްދިނުމަށް މަޝްވަރާ ކުރެވެމުންދާ ކަމަށް ވެސް އޭނާ ވިދާޅުވިއެވެ.
ފޭސް2 ގައި ޤާއިމް ކުރެވިގެންދާ ބަސް ސްޓޮޕަކީ ޖާގައިގެ ގޮތުން ތަނަވަސް ތަނަކަށް ވެގެންދާނެ ކަަމަށާއި އެ ބަސް ސްޓޮޕް ތަކުގައި ގާތްގަނޑަކަށް 100 މީހުންނަށް އެއް ފަހަރާ މަޑުކޮށްލެވޭނެ ކަމަށް އޭނާ ވިދާޅުވިއެވެ.
މާލެ އާއި ހުޅުމާލެ އާއި ދެމެދު ބަހުގެ ޚިދުމަތް މިހާރު ދެމުން އަންނަނީ އެމްޕީއެލް އިންނެވެ.
