ސައުދީން ކޮވިޑްގެ ވެކްސިން ގަންނާނީ ސަލާމަތީ މިންގަނޑުތަކަށް ބަލައިފައި: ސިއްހަތާއި ބެހޭ ވަޒީރު
ކޮވިޑަށް ވެކްސިނެއް ހޯދުމަށް ގިނަ ގައުމުތަކަކާއިއެކު އަންނަނީ މަޝްވަރާ ކުރަމުން
ސައުދި އަރަބިއްޔާގެ ސިއްހަތާއި ބެހޭ ވަޒީރު ޑރ. ތައުފީގު އަލް ރަބިހް
ސައުދި އަރަބިއްޔާއިން ކޮވިޑް-19 އަށް ވެކްސިނެއް ގަންނާނީ ސަލާމަތީ ހުރިހާ މިންގަނޑުތަކެއް ފުރިހަމަވޭތޯ ބެލުމަށްފަހުގައި ކަމަށް އެގައުމުގެ ސިއްހަތާއި ބެހޭ ވަޒީރު ޑރ. ތައުފީގު އަލް ރަބިހް ވިދާޅުވެއްޖެއެވެ.
ސައުދީގެ މީޑިއާއަކަށް ދިން އިންޓަރވިއުއެއްގައި ޑރ. ތައުފީގު ވިދާޅުވީ ކޮވިޑަށް ވެކްސިނެއް ހޯދުމަށް ގިނަ ގައުމުތަކާއިއެކު މަޝްވަރާ ކުރަމުން އަންނަ ކަމަށާއި، އެކަމަކު ވެކްސިނެއް ގަތުމުގެ ކުރިން ސަލާމަތީ މިންގަނޑުތައް ފުރިހަމަވޭތޯ ބަލާނެ ކަމަށެވެ.
ޑރ. ތައުފީގު އިތުރަށް ވިދާޅުވީ ސައުދީގެ ސިއްހަތާ ބެހޭ މާހިރުން އަންނަނީ ގައުމުތަކުން ކޮވިޑަށް އުފައްދާ ވެކްސިންތައް ދިރާސާ ކޮށް ބަލަމުން ކަމަށާއި، ވެކްސިން ގަތުމަށް ސައުދީގެ ސަރުކާރުން އޮތީ ތައްޔާރަށް ކަމަށެވެ. އަދި ވެކްސިން ބެހުމުގައި އެކި މިންގަނޑުތައް ކަނޑައަޅާފައިވާނެ ކަމަށާއި، އެންމެ ފުރަތަމަ ވެކްސިން ބަހާނީ "ރިސްކް ހައި" ކެޓަގަރީގެ މީހުންނަށް ކަމަށާއި، އަދި ސައުދީގެ ރައްޔިތުން ވެކްސިން ގަންނަން ނުޖެހޭނެ ކަމަށް ވެސް ތައުފީގު ވިދާޅުވިއެވެ.
ޑރ. ތައުފީގު ވިދާޅުވީ ސައުދީން ކޮވިޑް ވަރަށް ބޮޑަށް ކޮންޓްރޯލް ވެފައިވާ ކަމަށާއި، ނަމަވެސް ކޮވިޑު ފެތުރުން ހުއްޓުވުމަށް އަޅާފައިވާ އެއްވެސް ފިޔަވަޅެއް ލުއި ކުރުމަށް ސައުދީގެ ސަރުކާރުން އަދި ވިސްނާފައި ނުވާ ކަމަށެވެ.
ސައުދި އަރަބިއްޔާ އަކީ މުޅި ދުނިޔެއިން 22 ވަނަ އަށް އެންމެ ގިނަ މީހުން ކޮވިޑަށް ޕޮޒިޓިވްވެފައިވާ ގައުމެވެ.
