ވެން ޑައިކުގެ މައްސަލައިގައި ޕިކްފޯޑަށް ފިޔަވަޅު ނާޅަން ނިންމައިފި

އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ އެވަޓަނާއި ލިވަޕޫލް ބައްދަލުކުރި މެޗުގައި އެވަޓަނުގެ ގޯލްކީޕަރު ޖޯޑަން ޕިކްފޯޑް ކުރި ޓެކުލެއްގައި ލިވަޕޫލުގެ އިތުބާރު ޑިފެންޑަރު ވާޖިލް ވެން ޑައިކަށް އަނިޔާވި ނަމަވެސް، މި މައްސަލައިގައި ޕިކްފޯޑަށް ފިޔަވަޅު ނާޅަން އިނގިރޭސި އެފްއޭއިން ނިންމައިފިއެވެ.

ލީގުގައި އެވަޓަނާ 2-2 ން ލިވަޕޫލް އެއްވަރުވި މެޗުގެ 11 ވަނަ މިނެޓުގައި ލިބުނު އަނިޔާއަކާ ގުޅިގެން ވެން ޑައިކް ވަނީ ބަދަލުކޮށްފައެވެ. ވެން ޑައިކަށް އަނިޔާވީ އެވަޓަނުގެ ގޯލްކީޕަރު ޖޯޑަން ޕިކްފޯޑް ކުރި ނުރައްކާތެރި ޓެކުލަކާ ގުޅިގެންނެވެ. އެކަމަކު އެ ފައުލް ކުރުމުގެ ކުރިން ވެން ޑައިކް އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ އެއީ ފައުލެއް ކަމަށް ނިންމާފައެއް ނުވެއެވެ.

މި މައްސަލައިގައި ޕިކްފޯޑަށް ފިޔަވަޅެއް ނާޅަން އެފްއޭއިން ނިންމީ މެޗުގައި އެކަން ހިނގައިދިޔަ ގޮތް ވީއޭއާރުގެ އިތުރުން މެޗުގެ އޮފިޝަލުންވެސް ބެލުމާ ގުޅިގެންނެވެ.

މި މެޗުގައި ވެން ޑައިކަށް އަނިޔާވިއިރު، ރިޕޯޓުތައް ބުނާ ގޮތުން ވެން ޑައިކުގެ ކަކުލަށް ލިބުނު ސީރިއަސް އަނިޔާއާ ގުޅިގެން އޭނާއަށް މި ސީޒަނުގެ ބާކީ ބައިގައި ނުކުޅެވުމުގެ ބިރު އެބައޮތެވެ. ލިވަޕޫލުން ވެން ޑައިކް ކަކުލުގެ އޮޕަރޭޝަނެއް ކުރަން ޖެހޭކަން ކަށަވަރުކޮށްދިން ނަމަވެސް، އޭނާއަށް އެނބުރި ކުޅުމުގެ ތެރެއަށް އާދެވޭނީ ކިހާ މުއްދަތެއްގެ ތެރޭގައި ކަމެއް ނުބުނެއެވެ. އެކަމަކު ރިޕޯޓުތައް ބުނާގޮތުން އޮޕަރޭޝަން ރަނގަޅަށް ގޮސްފިނަމަ، އެންމެ އަވަސް ވެގެންވެސް އުމުރުން 29 އަހަރުގެ ވެން ޑައިކަށް ކުޅުމުގެ ތެރެއަށް އާދެވޭނެ ކަމަށް ބެލެވެނީ އަންނަ އަހަރު އޭޕްރީލް ނޫނީ މެއި މަހުގެ ތެރޭގައެވެ.

މި އަނިޔާއާ ގުޅިގެން ސޯޝަލް މިޑިއާގައި ހިއްސާކުރި މެސެޖެއްގައި ވެން ޑައިކް ބުނީ އަނިޔާއިން ސަލާމަތްވެ އެނބުރި އަންނާނީ ކުރިއަށްވުރެ ވަރުގަދަކޮށް ކަމަށެވެ.

ލިވަޕޫލުގެ އެންމެ މުހިންމު އަދި އެންމެ އިތުބާރު ޑިފެންޑަރު ނުލާ އެ ޓީމުން މުހިންމު ގިނަ މެޗުތަކަކާ ކުރިމަތިލާން ޖެހިފައިވާއިރު، ޖެނުއަރީ މަހުގެ ޓްރާންސްފާ ބާޒާރުގައި ލިވަޕޫލުން ޑިފެންޑަރެއް ގެންނާނެ ކަމަށް ބެލެވެއެވެ.

މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ އެވަޓަނާ ލިވަޕޫލް އެއްވަރުވިއިރު، ޕްރިމިއާ ލީގުގެ އެންމެ ފަހުގެ ޗެމްޕިއަނުން ކަމަށްވާ ލިވަޕޫލް އޮތީ ތާވަލުގެ ތިންވަނައިގައި 10 ޕޮއިންޓާއެކުއެވެ.