އިބްރަހިމޮވިޗުގެ ދެ ލަނޑާއެކު ޑާބީ މެޗުން މިލާނަށް މޮޅެއް

ފޯވާޑް ޒްލަޓާން އިބްރަހިމޮވިޗް ޖެހި ދެ ލަނޑާއެކު ޑާބީ މެޗުން އިންޓަ މިލާނުގެ މައްޗަށް އޭސީ މިލާން ކުރި ހޯދައިފިއެވެ.

އިޓާލިއަން ލީގުގައި ހޮނިހިރު ދުވަހުގެރޭ ކުޅުނު މެޗުން މިލާން މޮޅުވީ 2-1 ންނެވެ. މިއީ 2016 ވަނަ އަހަރުގެ ޖެނުއަރީ މަހަށްފަހު ޑާބީ މެޗުން މިލާން މޮޅުވި ފުރަތަމަ ފަހަރެވެ.

ކޮވިޑް-19 އިން ރަނގަޅުވެ އުމުރުން 39 އަހަރުގެ އިބްރަހިމޮވިޗް ކުޅުނު ފުރަތަމަ މެޗުގައި އޭނާ މޮޅު ކުޅުމެއް ދެއްކިއިރު، މެޗުގެ 13 ވަނަ މިނެޓުގައި އިބްރަހިމޮވިޗް ވަނީ މިލާނަށް ލީޑު ނަގައިދީފައެވެ. އިބްރަހިމޮވިޗް ފޮނުވާލި ޕެނަލްޓީއެއް އިންޓަގެ ގޯލްކީޕަރު ސާމިރު ހެންޑަނޮވިޗް މަތަކުރި ނަމަވެސް، ރީބައުންސް ބޯޅަ އިބްރަހިމޮވިޗް ވަނީ ގޯލުގެ ތެރެއަށް ފޮނުވާލާފައެވެ. އަދި އޭގެ ތިން މިނެޓު ފަހުން ރަފައެލް ލީއޯ ނަގައިދިން ހުރަހަކުން އިބްރަހިމޮވިޗް ވަނީ މިލާނަށް ލީޑު ފުޅާކޮށްދީފައެވެ.

މެޗުގެ ކުރީކޮޅު މިލާނުން ދެ ލަނޑުގެ ލީޑެއް ނެގި ނަމަވެސް، މެޗުގެ 29 ވަނަ މިނެޓުގައި އިންޓައިން ވަނީ ލަނޑެއް ޖަހާ ފަރަގު ކުޑަކޮށްފައެވެ. އިވާން ޕެރިސިޗުގެ އެހީއާއެކު މި ލަނޑު އިންޓައަށް ކާމިޔާބުކޮށްދިނީ ފޯވާޑް ރޮމެލޫ ލުކާކޫއެވެ. އަދި މެޗުގެ ފަހު ސިކުންތުގައި ލުކާކޫއަށް ނަތީޖާ އެއްވަރުކުރަން ރަނުގެ ފުރުސަތެއް ލިބި ވަނީ ބޭކާރުވެފައެވެ.

މި މޮޅާއެކު ލީގުގައި ކުޅުނު ހަތަރު މެޗުންވެސް މޮޅުވެ ތާވަލުގެ އެއްވަނައިގައި މިލާން އޮތީ 12 ޕޮއިންޓާއެކުއެވެ. އިންޓަ އޮތީ ހަތް ޕޮއިންޓާއެކު ތާވަލުގެ ހަވަނައިގައެވެ.

މީގެ އިތުރުން ލީގުގައި ހޮނިހިރު ދުވަހުގެރޭ އެންމެ ފަހުގެ ޗެމްޕިއަން ޔުވެންޓަސް އަލަށް ޕްރޮމޯޓްވި ކްރޮޓޯނޭއާ 1-1 ން އެއްވަރުވިއިރު، ނާޕޮލީން ވަނީ އެޓަލާންޓާ އަތުން 4-1 ން މޮޅުވެފައެވެ.