"ބޮޑެތި ކުންފުނިތައް ހިނގަމުން އަންނަ މަގުން އާރްޑީސީ ވެސް އަންނަނީ ހިނގަމުން"
މިއަހަރު އެކަނި ވެސް އާރްޑީސީއިން ވަނީ 8 ޕްރޮޖެކްޓް ހިންގައިފައި
އާރްޑީސީގެ މެނޭޖިންގ ޑިރެކްޓަރ މޫސާ އަލި މަނިކު (މޫކޭ)
ބޮޑެތި ކުންފުނިތައ ހިނގަމުން އަންނަ މަގުން ރޯޑް ޑިވެލޮޕްމެންޑް ކޯޕަރޭޝަން (އާރްޑީސީ) ވެސް އަންނަނީ ހިނގަމުން ކަމަށް އެކުންފުނީގެ މެނޭޖިންގ ޑިރެކްޓަރ މޫސާ އަލި މަނިކު (މޫކޭ) ވިދާޅުވެއްޖެއެވެ.
އާރްޑީސީއަށް އެއް އަހަރު ފުރުމާއި ގުޅިގެން މޫކޭ ވިދާޅުވީ ފާއިތުވެދިޔަ އެއް އަހަރު ދުވަހު އާރްޑީސީއިން ބޮޑެތި ކުރިއެރުންތަކެއް ހޯދަމުން އަންނަ ކަމަށާއި، އެގޮތުން ބޮޑެތި ކުންފުނިތަކާއި އެއްމަގުން ހިނގަމުން އަންނަ ކަމަށް މޫކޭ ވިދާޅުވިއެވެ.
މޫކޭ ވިދާޅުވީ އާރްޑީސީ އަކީ ރާއްޖޭގެ އެކި ރަށްރަށުގެ މަގު ހެދުމުގެ މަގުސަދުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އުފައްދަވާފައިވާ ކުންފުންޏެއް ކަމަށާއި، އާރްޑީސީއާ އެކު އުފެދުނު އެހެން ކުންފުނިތަކާއި އަޅާބަލާއިރު، އާރްޑީސީން ބޮޑެތި ކުރިއެރުންތަކެއް ހޯދާފައިވާ ކަމަށެވެ.
މޫކޭ އިތުރަށް ވިދާޅުވީ ކުރިޔަށް އޮތް އަހަރުތަކުގައި އާރްޑީސީން އިތުރު ކާމިޔާބީތައް ހޯދާނެ ކަމަށާއި އެކަމަށް ގަދައަޅާ މަސައްކަތް ކުރާނެ ކަމަށެވެ. މޫކޭ ވިދާޅުވީ އާރްޑީސީގެ ސްޓާފުންނަކީ އެއް އަޒުމެއްގައި ވަރުބަލި ކަމެއް ނެތި އެއް ޓީމެއް ގޮތަށް މަސައްކަތް ކުރާ ސްޓާފުންތަކެއް ކަމަށާއި، ކުރިޔަށް އޮތް ދުވަސްތަކުގައި އާރްޑީސީން ކަނޑައެޅި ލަނޑުދަނޑިތައް ހާސިލް ކުރާނެ ކަމަށެވެ.
ކޮވިޑް-19 އާ ގުޅިގެން އާރްޑީސީން ކުރިޔަށް ގެންދިޔަ ބައެއް ޕްރޮޖެކްޓްތަކުގެ މަސައްކަތް މަޑުޖެހުނު ކަމަށް މީގެ ކުރިން މޫކޭ ވަނީ ވިދާޅުވެފައެވެ. ނަމަވެސް، ފާއިތުވެދިޔަ އަހަރު 8 ޕްރޮޖެކްޓަށް ވުރެ ގިނަ ޕްރޮޖެކްޓްގެ އަމަލީ މަސައްކަތް ވަނީ ފަށާފައެވެ.
އާރްޑީސީން ހަވާލުވެފައިވާ އެންމެ ބޮޑު އެއް މަޝްރޫއުއަކީ މާލޭގަ މަގުތައް ޒަމާނީ ފެންވަރަށް ތަރައްގީކޮށް، ހިނގާބިނގާވެ އުޅުމަށާއި އުޅަނދުފަހަރަށް ދިމާވެފައިވާ ދަތިތައް ހައްލުކުރުމެވެ. 462 މިލިއަން ރުފިޔާގެ މި މަޝްރޫއު ނިމުމުން މާލޭގެ މަގުތަކަށް ދިމާވެފައިވާ މައްސަލަތަކާއި، ޕާކިންގއަށް ދިމާވެފައިވާ މައްސަލަތައް ހައްލު ވާނެ ކަމަށް މާލެ ސިޓީ ކައުންސިލުން ވަނީ ބުނެފައެވެ.
