2،132 ކަސްފާނަ ނީލަމުގައި ވިއްކާލައިފި
16 އޮކްޓޯބަރު 2020 | ހުކުރު 09:43މި ކަސްފާނަތައް ވިއްކާލާފައި ވަނީ 213،637 ރުފިޔާއަށް
މެރިން ރީސަރޗް އިންސްޓިޓިއުޓް އިން ވަނީ ކޮށީގައި އާލާކުރި 4240 ކަސްފާނަ ވިއްކާލުމަށް ނީލަމަށް ހުޅުވާލާފައި
މޯލްޑިވްސް މެރިން ރީސަރޗް އިންސްޓިޓިއުޓް އިން އާލާކުރި 2،132 ކަސް ފާނަ ނީލަމުގައި ވިއްކާލައިފިއެވެ.
މެރިން ރީސަރޗް އިންސްޓިޓިއުޓް އިން ބުނި ގޮތުގައި މި ކަސްފާނަތައް ވިއްކާލާފައި ވަނީ 213،637 ރުފިޔާއަށެވެ. މި ކަސްފާނަތައް އާލާ ކުރުމުގެ މަސައްކަތުގައި ހަރަކާތްތެރިވި ހަތަރު ފަރާތަކަށް މި ފައިސާ ވަނީ ލިބިފައެވެ. މިއީ މިގޮތަށް ކޮށީގައި އާލަކޮށް ނީލަމަށް ހުޅުވާލާ ވިއްކާލެވުނު ފުރަތަމަ ބެޗްއެވެ.
މެރިން ރިސަރޗް އިންސްޓިޓިއުޓް ވަނީ މިއީ ރާއްޖޭގައި ދެމެހެއްޓެނެވި ގޮތެއްގައި ކާބޯތަކެތި އާލާ ކުރުމަށް އެޅުނު މުހިންމު ފިޔަވަޅެއްކަން ފާހަގަކޮށްފައެވެ. އަދި މީއީ ރާއްޖޭގައި މެރިކަލްޗަރ ސިނާއަތެއް ގާއިމު ކުރުމަށް ކުރެވޭ މުހިންމު މަސައްކަތެއް ކަމަށް ވެސް އެ އިންސްޓިޓިއުޓް އިން ވަނީ ފާހަގަކޮށްފައެވެ.
ކޮށީގައި އާލާކުރި 4240 ކަސްފާނަ ވިއްކާލުމަށް މެރިން ރީސަރޗް އިންސްޓިޓިއުޓް އިން ވަނީ ނީލަމަށް ހުޅުވާލާފައެވެ.
މިއީ ވަރލްޑް ބޭންކުގެ ހިލޭ އެހީގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން ހިންގާ [ސަސްޓެއިނަބަލް ފިޝަރީޒް ރިސޯސަސް ޑިވެލޮޕްމަންޓް ޕްރޮޖެކްޓުގެ] ދަށުން އދ. އަތޮޅަށް އަމާޒުކޮށްގެން ހިންގަމުންދާ ޕްރޮޖެކްޓަކުން އުފައްދާފައިވާ ފާނައެވެ. މި މަސައްކަތް ފަށާފައި ވަނީ މި އަހަރުގެ ޖެނުއަރީ މަހު އދ. މަހިބަދޫ، އޮމަދޫ، ދިގުރަށް އަދި ދަނގެތީގައެވެ.
