ވެރިފަރާތުން ހަވާލުނުވާ އުޅަނދު ނީލަމުގައި ވިއްކާލަނީ
ފުލުހުންގެ ބެލުމުގެ ދަށަށް އުޅަނދު ގެނެވޭތާ 60 ދުވަސް ފަހުން ހަވާލުވެފައިނުވާ އުޅަނދުތަކުގެ ރަޖިސްޓްރޭޝަން ބާޠިލުކުރެވޭނެ
ޓޯވ ކޮށްފައިވާ ވެހިކަލްތަކެއް
އެއްގަމު ދަތުރުފަތުރުގެ ގާނޫނުގެ ދަށުން ފުލުހުންގެ ބެލުމުގެ ދަށަށް ގެނެވޭ އުޅަނދުފަހަރާ ވެރިފަރާތުން ހަވާލު ނުވާނަމަ، ނީލަމުގައި އެ އުޅަނދެއް ވިއްކާލެވޭ ގޮތަށް އެއްގަމު ދަތުރުފަތުރުގެ ގާނޫނުގެ ދަށުން ގަވާއިދެއް ހަދައިފިއެވެ.
އެއްގަމު ދަތުރުފަތުރުގެ ޤާނޫނުގެ ދަށުން ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާބެހޭ ގަވާއިދުގެ 7 ވަނަ މާއްދާގައި ބުނެފައިވަނީ ވެރިފަރާތުން ހަވާލުނުވާ އުޅަނދާމެދު ޢަމަލުކުރާނެ އުސޫލެވެ. އެގޮތުން މި ގަވާއިދުގެ 6 ވަނަ މާއްދާގެ ދަށުން މަޢުލޫމާތު އާންމުކުރާ ތާރީޚުން ފެށިގެން 60 ދުވަހުގެ މުހުލަތެއް، އުޅަނދާ ހަވާލުވުމަށް، އުޅަނދުގެ ވެރިފަރާތަށް ދޭންވާނެ ކަމަށް ބުނެފައިވެއެވެ. އަދި މި މުއްދަތުގައި ހަވާލުވެފައިނުވާ އުޅަނދު އާންމުކޮށް ހުޅުވާލެވޭ ނީލަމެއްގައި އެ އުޅަނދެއް ވިއްކާލުން ނުވަތަ ނައްތާލުމުގެ ބާރު ފުލުހުންނަށް ލިބިގެންވެއެވެ.
މި ގަވާއިދުގެ 7 ވަނަ މާއްދާގައި ބުނެފައިވަނީ ފުލުހުންގެ ބެލުމުގެ ދަށަށް ގެނެވޭ އުޅަނދު ނީލަމުގައި ވިއްކައިލުމަށް ނުވަތަ ނައްތައިލުމަށް ކަނޑައަޅައިފައިވާ އުޅަނދުތަކުގެ ރަޖިސްޓްރޭޝަން، ނީލަމުގައި ވިއްކައިލުމުގެ ކުރިން ނުވަތަ ނައްތައިލުމުގެ ކުރިން، ބާޠިލު ކުރަންވާނެއެވެ.
އަދި ފުލުހުންގެ ބެލުމުގެ ދަށަށް އުޅަނދު ގެނެވޭތާ 60 ދުވަސް ފަހުން ހަވާލުވެފައިނުވާ އުޅަނދުތަކުގެ ރަޖިސްޓްރޭޝަން ބާޠިލުކުރުމަށް، ދިވެހި ފުލުހުންގެ ޚިދުމަތުން، މޯލްޑިވްސް ޓްރާންސްޕޯޓް އޮތޯރިޓީއަށް ހުށަހަޅަންވާނެކަމަށް ބުނެފައިވެއެވެ. އަދި އުޅަނދުތަކުގެ ރަޖިސްޓްރޭޝަން ބާޠިލު ކުރުމަށް ހުށަހަޅާތާ 14 ދުވަހުގެ ތެރޭގައި ރަޖިސްޓްރޭޝަން ބާޠިލު ކުރުމަށްފަހު، މޯލްޑިވްސް ޓްރާންސްޕޯޓް އޮތޯރިޓީން، ދިވެހި ފުލުހުންގެ ޚިދުމަތަށް އެކަން އަންގަންވާނެކަމަށް މި ގަވާއިދުގައި ބުނެފައިވެއެވެ.
މީގެ އިތުރުން އުޅަނދު ނީލަމުގައި ވިއްކާލުމުގެ ކުރިން އިއުލާންކުރަންވާނެ ކަމަށް ބުނެފައިވެއެވެ. އެގޮތުން އެ އުޅަނދުތައް ނީލަމުގައި ވިއްކައިލުމުގެ ކުރިން ދިވެހި ސަރުކާރުގެ ގެޒެޓުގައްޔާއި ދިވެހި ފުލުހުންގެ ޚިދުމަތުގެ ވެބްސައިޓުގައި އާންމު ކުރަންވާނެކަމަށް ބުނެފައިވެއެވެ.
