އޭޑީކޭ ހޮސްޕިޓަލުން ޕިސީއާރް ޓެސްޓު ހެދޭ އަގު ހެޔޮކޮށްފި
16 އޮކްޓޯބަރު 2020 | ހުކުރު 07:58އަގު ހެޔޮ ކުރަން ނިންމާފައިވަނީ މި މަހުގެ 16 ވަނަ ދުވަހުން ފެށިގެން
އޭޑީކޭ ހޮސްޕިޓަލު
އޭޑީކޭ ހޮސްޕިޓަލުން ޕިސީއާރް ޓެސްޓު ހެދޭ އަގު ހެޔޮކޮށްފިއެވެ.
އެ ހޮސްޕިޓަލުން ބުނީ އެ ހޮސްޕިޓަލުން ޕީސީއާރް ޓެސްޓް ހަދަމުން ދިޔަ ލެބޯޓަރީގައި ޤާއިމު ކުރެވިގެންދިޔަ ފުރިހަމަ އޮޓޯމޭޓެޑް ރޯޗް ސައިކްލަރ 480 ޕީސީއާރް ސިސްޓަމްއާއެކު ކޮވިޑް ޓެސްޓް ހެދުމުގެ ޙަރަދު ކުޑަވެގެން ގޮސްފައިވާ ކަަމަށެވެ. އަދި އެ އަގު ދަށްވުމުގެ ފައިސާ ހިދުމަތް ހޯދާ ފަރާތްތަކާއި ހިއްސާ ކުރަމުން ބޭނުންވާތީވެ 16 އޮކްޓޯބަރުން ފެށިގެން ޕީސީއާރް ޓެސްޓް ހެދޭ އަގު ހެޔޮކޮށްފައިވާ ކަމަށް އޭޑީކޭއިން ބުންޏެވެ.
އެގޮތުން މިހާރު ދިވެހިން އަދި ވާރކްޕާމީޓް ހޯލްޑަރުންނަށް 1200ރ. އަށް ޕީސީއާރް ޓެސްޓް ހެދޭނެ ކަމަށާއި ފަތުރުވެރިންނަށް 80 ޑޮލަރަށް ޓެސްޓް ހެދޭނެ ކަމަށް ވަނީ ބުނެފައެވެ. އޭޑީކޭއިން މީގެ ކުރިން ދިވެހިން އަދި ވާރކްޕާމީޓް ހޯލްޑަރުން އަތުން ޓެސްޓް ހެދުމަށް ނަގަމުން ދިޔައީ 1500ރ. އެވެ. އަދި ފަތުރުވެރިންގެ އަތުން ނަގަމުންދިޔައީ 110 ޑޮލަރެވެ. އޭޑީކޭ ހޮސްޕިޓަލުން ޕީސީއާރް ޓެސްޓް ހެދޭ އަގު ހެޔޮކޮށްފައިވާއިރު ޓްރީޓޮޕް ހޮސްޕިޓަލުން ވެސް ވަނީ ޕިސީއާރް ޓެސްޓު ހެދޭ އަގު ހެޔޮކޮށްފިއެވެ.
އެ ހޮސްޕިޓަލުން ބުނީ ކޮވިޑް-19 ޕީ.ސީ.އާރް ޓެސްޓު ކުރެވޭ އަދަދު އިތުރުކޮށް، އޮކްޓޯބަރު 8 ވަނަ ދުވަހުން ފެށިގެން ކޮންމެ ދިވެއްސަކަށް އަދި ވާރކްޕަރމިޓް އޮންނަ ބިދޭސީންނަށް 1,399ރ. އަށް ޕީސީއާރް ޓެސްޓް ހެދޭނެ ކަމަށެވެ. އަދި ފަތުރުވެރިން 1,499ރ. އަށް ޕީސީއާރް ޓެސްޓް ހެދޭނެ ކަމަށް ވެސް ޓްރީޓޮޕުން ބުންޏެވެ.
ފަތުރުވެރިންނަށް ކޮވިޑް-19 އަށް ޕީސީއާރް ޓެސްޓް ހެދޭނެ އިންތިޒާމް ފަސް ހޮސްޕިޓަލެއްގައި މިހާރު ހަމަޖައްސާފައިވާއިރު، ސަފާރީ ބޯޓުތަކުން ދަތުރު ކުރާ ފަތުރުވެރިންނަށް ޕީސީއާރް ޓެސްޓް ހެދޭނެ އިންތިޒާމު ހުޅުމާލޭ ފެރީ ޓަރމިނަލް ހިމެނޭ ސަރަހައްދުގައި ދާދި ފަހުން ވަނީ ހަމަޖައްސާފައެވެ.
