މިނިސްޓްރީގެ މިންގަނޑުތަކަށް ހިދުމަތްދޭ ތަންތަން ފެތޭތޯ މިނިސްޓްރީން ބަލައި މޮނިޓަރ ކުރާނެ
ޓޫރިޒަމް މިނިސްޓަރ ޑރ. އަބްދުﷲ މައުސޫމް
މުސްތަގްބަލުގައި ރާއްޖޭގެ ފަތުރުވެރިކަން ކުރިއެރުވުމަށް އެންމެ މުހިންމު އެއް ކަމަކީ ފަތުރުވެރިންނަށް ހިދުމަތްދޭ ތަންތަން ސެލްފް ރެގިއުލޭޓް ކުރުން ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ޑރ. މައުސޫމް މިހެން ވިދާޅުވީ ރާއްޖެޓީވީގެ ފަަލަސުރުހީ ޕްރޮގްރާމްގައި ވާހަކަ ދައްކަވަމުންނެވެ. އެގޮތުން، މިނިސްޓްރީން ކަނޑައަޅާފައިވާ މިންގަނޑަށް ހިދުމަތްދޭ ތަންތަން ފެތޭތޯ މިނިސްޓްރީން ބަލައި މޮނިޓަރ ކުރާނެ ކަމަށާއި އެހެން ނަމަވެސް ގެސްޓްހައުސް ނުވަތަ ހޮޓާ ހިންގާ ފަރާތްތަކުން ވެސް އަމިއްލައަށް ސްޓޭންޑާޑްތަކެއް ސެޓްކޮށް އެ މިންގަނޑަށް އަމަލުތައް ބެހެއްޓުމަކީ މުހިންމު ކަމެއްކަމަށް މިނިސްޓަރު ވިދާޅުވިއެވެ.
މިނިސްޓަރ ވަނީ މިއަދު ވެސް ކުރިއަރާފައިވާ ވިޔަފާރިތަކަށް ބަލާލުމުން އެ ވިޔަފާރިތައް ކުރިއަރާފައި ވަނީ ސާފުތާހިރުކަމާއި ހިދުމަތުގެ ފެންވަރު ރަނގަޅުކުރުމަށް އަމިއްލައަށް މިންގަނޑުތަކެއް ކަނޑައަޅައިގެން މަސައްކަތަކެއް ކޮށްފައި އޮތުމުން ކަން ފާހަގަވެގެންދާނެ ކަމަށް ވިދާޅުވެފައެވެ. އަދި މިކަންތައްތައް ފުރިހަމަ ކުރަން އަތުން އިތުރަށް ޑޮލަރެއް ނުވަތަ ދެ ޑޮލަރެއް ވަރު ހަރަދުވި ނަމަވެސް ފަހުން ލިބޭ ފައިދާ މާ ބޮޑުވާނެ ކަމަށް މިނިސްޓަރ މައުސޫމް ފާހަގަކުރެއްވިއެވެ.
ޓޫރިޒަމް މިނިސްޓްރީން މިކަންކަމަށް ވަކި ގަވައިދުތަކެއް ނުހެދި ނަމަވެސް ހޭލުންތެރިކުރުމުގެ ޕްރޮގްރާމްތައް ކުރިއަށް ގެންގޮސް ފަތުރުވެރިންނަށް ހިދުމަތްދޭ ތަންތަނުގެ ފެންވަރު ރަނގަޅުކުުރުމުގެ މަސައްކަތް ކުރާނެ ކަމަށްވެސް މިނިސްޓަރ ވިދާޅުވިއެވެ. އެގޮތުން މިދިޔަ ހަފްތާގައި މިނިސްޓްރީން ފެށި ކޮމްޕްލަޔަންސް އޮފިސަރުން ޓްރެއިން ކުރުމުގެ ޕްރޮގްރާމް ފާހަގަކުރެއްވިއެވެ.
ކޮލިޓީ ދެމެހެއްޓުމުގެ ގޮތުން ހަރަދުކުރުމަކީ މުހިއްމު ކަމެއް ކަމަށް ދަައްކަވާ ވާހަކަ ތަކުރާރު ކުރައްވަމުން މައުސޫމް ވިދާޅުވީ، ވިޔަފާރީގައި ހަރަކާތްތެރިވާ ފަރާތްތަކުން މި ހަރަދުކުރަން އެއްވެސް ވަރަކަށް ފަސްޖެހިން ނުވާނެ ކަމަށެވެ.
