ސީރިއާގެ ހަނގުރާމައިގައި ބައިވެރިވުމަށްފަހު ރާއްޖެއަށް އައި ދިވެއްސަކު ހައްޔަރުކޮށްފި
15 އޮކްޓޯބަރު 2020 | ބުރާސްފަތި 16:23ހައްޔަރު ކުރީ 34 އަހަރުގެ ފިރިހެނެއް
ސީރިއާގެ ހަނގުރާމައިގައި ބައިވެރިވުމަށްފަހު ހައްޔަރުކުރި މީހާ ސީރިޔާގައި ނަގާފައިވާ ކަމަށް ބުނާ ފޮޓޯއެއް
ސީރިއާގައި ހިންގަމުންދާ ދާހިލީ ހަނގުރާމައިގައި ބައިވެރިވުމަށްފަހު ރާއްޖެއަށް އައި ޒުވާނަކު ހައްޔަރުކޮށްފިއެވެ.
ފުލުހުން ބުނީ ހަނގުރާމައިގައި ބައިވެރިވުމަށްފަހު އެނބުރި ރާއްޖެއައި 34 އަހަރުގެ ދިވެހި ފިރިހެނަކު ބުރާސްފަތި ދުވަހުގެ ރޭ ހައްޔަރުކޮށްފައިވާ ކަމަށެވެ. އަދި މި މައްސަލަ ފުލުހުންގެ ސީރިއަސް އެންޑް އޯގަނައިޒްޑް ސްރައިމް ޑިޕަރޓްމެންޓުން އިތުރަށް ތަހުގީގު ކުރަމުން އަންނަ ކަމަށް ވަނީ ހާމަކޮށްފައެވެ.
މި މީހާ ހައްޔަރުކޮށްފައިވާ ކަން ޕޮލިސް ކޮމިޝަނަރު މުހައްމަދު ހަމީދު ވެސް ކަށަވަރު ކޮށްދެއްވާފައިވާ އިރު، ސީރިއާއަށް ހަނގުރާމައަށް ދިޔަ ދިވެހިންގެ ތެރެއިން މިހާރު ސީރިއާގައި ތިބި ދިވެހިން ބޭރުގެ އެހެން ދަޢުލަތަކާއި ގުޅިގެން ރާއްޖެ ގެނެސް ރިހިބިލިޓޭޓް ކުރުމުގެ މަސައްކަތް ކުރިޔަށް ގެންދިއުމުގެ މަސައްކަތް ސަރުކާރުން ވަނީ ފަށާފައެވެ.
އެންމެ ފަހުން ފުލުހުން ހާމަކޮށްފައިވާ މައުލޫމާތަށް ބަލާއިރު، ސީރިޔާގައި ހިނގަމުންދާ ދާހިލީ ހަނގުރާމައިގައި އެކި ޖަމާއަތްތަކާ ގުޅިގެން ހަނގުރާމަ ކުރުމަށް ދިޔަ 173 ދިވެއްސަކު ގޮސްފައިވާ ކަން ކަށަވަރުވެފައިވާ ކަމަށެވެ. މިހާރު ރާއްޖެ އަންނަން ބޭނުންވެފައި ތިބި މީހުންގެ ތެރޭގައި ހުވަފަތްވެފައިވާ އަންހެނުންނާއި ޔަތީމް ކުދިން ހިމެނޭ ކަމަށް ވަނީ މައުލޫމާތު ލިބިފައެވެ.
