ޔުއެފާ ނޭޝަންސް ލީގުގެ ލީގު އޭ ގްރޫޕް ތިނެއްގައި ހިމެނޭ ފްރާންސާއީ ޕޯޗުގަލްވެސް ބުދަ ދުވަހުގެރޭ ކުޅުނު މެޗުތަކުން މޮޅުވެއްޖެއެވެ.
ދުނިޔޭގެ ޗެމްޕިއަނުން ކަމަށްވާ ފްރާންސް މޮޅުވީ ކްރޮއޭޝިއާ އަތުން 2-1 ންނެވެ.
ކްރޮއޭޝިއާގައި ކުޅުނު މި މެޗުގެ ވަރަށް ކުރީކޮޅު ފްރާންސްއިން ވަނީ ލީޑު ނަގާފައެވެ. މެޗުގެ އަށްވަނަ މިނެޓުގައި އޭރިއާ ތެރެއިން ލިބުނު ފުރުސަތެއްގެ ބޭނުންހިފާ މި ލަނޑު ފްރާންސަށް ކާމިޔާބުކޮށްދިނީ އެންޓޮއިން ގްރީޒްމަނެވެ.
ފުރަތަމަ ހާފު ލީޑުގައި އޮވެ ފްރާންސްއިން ނިންމާލި ނަމަވެސް، ދެވަނަ ހާފުގައި ކްރޮއޭޝިއާއިން ވަނީ ނަތީޖާ އެއްވަރުކޮށްފައެވެ. މެޗުގެ 64 ވަނަ މިނެޓުގައި އެ ގައުމަށް ނަތީޖާ އެއްވަރުކޮށްދިން ލަނޑު ކާމިޔާބުކޮށްދިނީ ނިކޯލާ ވްލަސިޗެވެ. އެކަމަކު މެޗު ނިމެން 11 މިނެޓަށް ވެފައި ވަނިކޮށް ކީލިއަން އެމްބާޕޭ ވަނީ ލަނޑެއް ޖަހާ މި މެޗުން ފްރާންސް މޮޅުކޮށްދީފައެވެ.
މީގެ އިތުރުން މި މުބާރާތުގެ އެންމެ ފަހުގެ ޗެމްޕިއަނުން ކަމަށްވާ ޕޯޗުގަލް ބުދަ ދުވަހުގެރޭ ކުޅުނު މެޗުން މޮޅުވީ ސްވިޑެން އަތުން 3-0 ންނެވެ.
އަމިއްލަ ގައުމުގައި ކުޅުނު މި މެޗުގައި ކޮވިޑް-19 އަށް ޕޮޒިޓިވްވެފައިވާތީ ޕޯޗުގަލުގެ ކެޕްޓަން ކްރިސްޓިއާނޯ ރޮނާލްޑޯ ކުޅެފައެއް ނުވެއެވެ. މެޗުގައި ޕޯޗުގަލުން ލީޑު ނަގާފައިވަނީ 21 ވަނަ މިނެޓުގައެވެ. މި ލަނޑު ކާމިޔާބުކޮށްދިނީ ބެނާޑޯ ސިލްވާއެވެ.
އަދި މެޗުގެ ފުރަތަމަ ހާފު ނިމެން މިނެޓަކަށް ވެފައިވަނިކޮށް ޑިއޯގޯ ޔޮޓާ ވަނީ ޕޯޗުގަލަށް ލީޑު ފުޅާކޮށްދީފައެވެ. އަދި މި މެޗުގައި ޕޯޗުގަލުން ޖެހި ތިންވަނަ ލަނޑު މެޗުގެ 72 ވަނަ މިނެޓުގައި ޖަހައިދިނީ ދެވަނަ ލަނޑުވެސް ޖެހި ޔޮޓާއެވެ.
މި ނަތީޖާތަކާއެކު ލީގު އޭ ގްރޫޕް ތިނެއްގެ އެއްވަނައިގައި އޮތް ޕޯޗުގަލާއި ދެވަނައިގައި އޮތް ފްރާންސަށްވެސް ވަނީ ކުޅުނު ހަތަރު މެޗުން ޕޮއިންޓް ލިބިފައެވެ. ޕޯޗުގަލަށް ކުރި ލިބެނީ ލަނޑުގެ ތަފާތުންނެވެ. ތިންވަނައިގައި އޮތް ކްރޮއޭޝިއާއަށް ހަތަރު މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ސްވިޑެނަށް ޕޮއިންޓެއް ލިބިފައެއް ނުވެއެވެ.
