ހެލްތް މިނިސްޓްރީގެ ކޮރަޕްޝަން: މިނިސްޓަރ އަމީން ގޭގައި ހުންނެވީ އަމިއްލަފުޅަކަށް ނޫން، ރައީސް އެންގެވުމުން!
14 އޮކްޓޯބަރު 2020 | ބުދަ 13:19ހެލްތް މިނިސްޓްރީގެ ކޮރަޕްޝަނާއި ގުޅިގެން މިނިސްޓަރު އަމީން، އޮފީހަށް ނިކުމެވަޑައިނުގެން މަޑުކޮށްލެއްވުމަށް، އެންގެވީ ރައީސް އޮފީހުން ލިޔުމުން
ރައީސް ޞާލިހު އާއި މިނިސްޓަރ އަމީން، ނޭޝަނަލް އިމަޖެންސީ އޮޕަރޭޝަން ސެންޓަރު ހިންގަމުންދިޔައިރު ދަރުބާރުގޭގައި-
ހެލްތް މިނިސްޓްރީގެ ކޮރަޕްޝަނުގެ ބޮޑެތި މައްސަލަތަކެއް ފެންމަތިވެ، އެ މައްސަލަތައް ތަހުގީގު ކުރަމުންދާތީ، ގޭގައި މަޑުކުރައްވަން ނިންމެވި ނިންމެވުމަކީ ހެލްތް މިނިސްޓަރު އަބްދުﷲ އަމީންގެ އަމިއްލަފުޅު އިސްނެގުމާއި އަމިއްލަފުޅަށް ނިންމެވި ނިންމުމެއް ކަމަށް ބުނެ، ފެތުރެމުންދާ ޚަބަރަކީ ހަގީގަތެއް ނެތް ދޮގު މައުލޫމާތުތަކެއް މައްޗަށް ބިނާކޮށް ދެކެވެމުންދާ ވާހަކަތަކެއްކަން "ރާއްޖެއެމްވީ"އަށް ހާމަވެއްޖެ އެވެ.
"ރާއްޖެއެމްވީ"އަށް ކަށަވަރުކަމާއެކު ލިބިފައިވާ މައުލޫމާތުތަކަށް ބަލާއިރު، ހެލްތް މިނިސްޓަރު އަމީން ގޭގައި މަޑު ކުރައްވަން އަންގަވާފައިވަނީ ސީދާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އެންގެވުމަކަށް ރައީސް އޮފީހުންނެވެ.
ކޮވިޑް-19އާ ގުޅޭ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓްގައި ފާހަގަ ކުރައްވާފައިވާ މައްސަލަތަކާއި ގުޅިގެން، 17 އޮގަސްޓް 2020 ވަނަ ދުވަހުން ފެށިގެން، ރައީސް އޮފީސް އޮފީހުން ވަކި ގޮތެއް އަންގަންދެން އޮފީހަށް ނިކުމެވަޑައިނުގެން މަޑުކޮށްލެއްވުމަށް، ލިޔުމުން ރައީސް އޮފީހުން ވަނީ ހެލްތް މިނިސްޓަރު އަމީންއަށް އަންގަވާފައެވެ.
ނަމަވެސް، ހަމަ އެދުވަހު، ނޫސްތަކުގައި ހެލްތް މިނިސްޓަރު އަމީންއާ ހަވާލާ ދެއްވައި ރިޕޯޓްކޮށްފައިވަނީ، ހެލްތް މިނިސްޓަރު އަމީން މަސައްކަތުން އެކަހެރިވެ ވަޑައިގަތުމަށް ގަސްތު ކުރައްވާކަން ހާމަ ކޮށްފައެވެ. އަދި އެކަން ހަމަކުރައްވައި ރައީސް ޞާލިހުއަށް ސިޓީއެއް ފޮނުއްވި ކަމަށްވެސް ނޫސްތަކުގައި ރިޕޯޓް ކޮށްފައި ވެއެވެ.
ހެލްތް މިނިސްޓަރ އަމީން، ރައީސް ޞާލިހްއަށް ފޮނުއްވި ސިޓީގައި ވިދާޅުވެފައިވަނީ ކޮވިޑް-19 އާއިގުޅޭ މިނިސްޓްރީ އޮފް ހެލްތުގެ ޚަރަދުތަކުގެ ކޮމްޕްލައަންސް އޮޑިޓް ރިޕޯޓްގައި ފާހަގަކޮށްފައިވާ ކަންތައްތަކާއިގުޅިގެން، ކަމާބެހޭ މުއައްސަސާތަކުން އެ މައްސަލަ ތަހުގީގުކޮށް ގޮތެއް ނިންމަންދެން ނުވަތަ ރައީސް ވަކި ގޮތެއް އަންގަވަންދެން، މިނިސްޓްރީ އޮފް ހެލްތުގެ މަސައްކަތްތަކުން އެކަހެރިވުމަށް ގަސްތު ކުރައްވާ ކަމަށެވެ.
އަމީންގެ އެ ސިޓީއާއެކު، މިއަދާ ހަމައަށްވެސް، ރައްޔިތުންނަށް ހީވެފައި އޮތީ، ހެލްތް މިނިސްޓްރީގެ މަސައްކަތުން އަމީން އެކަހެރިވެ ވަޑައިގެންނެވީ އަމީންގެ އަމިއްލަފުޅު އިސްނެންގެވުމާއި އަމިއްލަފުޅަށް ނިންމެވި ނިންމުމެއްގެ ގޮތުގައެވެ.
އެގޮތުން، ހެލްތް މިނިސްޓްރީން މިހާބޮޑު ކޮރަޕްޝަނުގެ އަމަލެއް ހިންގާފައިވާތީ، ރައީސް ޞާލިހު އަމީން އާއެމެދު އެއްވެސް ފިޔަވަޅެއް އަޅުއްވާފައި ނުވާކަމަށް ބުނެ ބައެއް ފަރާތްތަކުން ކަންބޮޑުވުންވެސް ފާޅުކޮށްފައި ވެއެވެ. ނަމަވެސް ހަގީގަތަކީ އޮޑިޓް އޮފީހުން، ހެލްތް މިނިސްޓްރީގެ ކޮވިޑް-19ގެ ކޮމްޕްލަޔަންސް އޮޑިޓް ރިޕޯޓް ނެރުމާއެކު ރައީސް ޞާލިހު ވަނީ ހެލްތް މިނިސްޓަރު އަމީން މަސައްކަތުން އެކަހެރިވެ ވަޑައިގަތުމަށް އަންގަވާފަ އެވެ. އޮޑިޓް އޮފީހުން އެ ރިޕޯޓް ނެރެފައިވަނީ 16 ޖުލައި 2020 ވަނަ ދުވަހު އެވެ.
ވެންޓި ލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާ ކަމަށް އޮޑިޓް ރިޕޯޓްގައި ފާހަގަ ކޮށްފައިވާތީ، އެންޓި ކޮރަޕްޝަން ކޮމިޝަން (އޭސީސީ)އިން އެމައްސަލަ ތަހުގީގު ކުރުމަށްފަހު، ބުދަ ދުވަހު (މިއަދު) މިވަނީ، ހެލްތް މިނިސްޓަރު އަމީން އާއި އެމިނިސްޓްރީގެ އިތުރު 10 މީހެއްގެ މައްޗަށް ދައުވާ ކުރުމަށް ޕްރޮސެކިއުޓަރ ޖެނެރަލް (ޕީޖީ)ގެ އޮފީހަށް ފޮނުވާފަ އެވެ.
ކޮވިޑް-19ގެ ފަރުވާއަށް 75 ވެންޓިލޭޓަރު ގަތުމަށް ދުބާއީ މީހެއް ކަމަށްވާ، ޑރ. އަލީ އަލް ތަޚުމަތީގެ ކުންފުނި ކަމަށްވާ، އެގްޒެކިއުޓާރސް ޖެނެރަލް ޓްރޭޑިންގއާ ހަވާލުކުރުމުގައި ހެލްތް މިނިސްޓަރު އަމީންގެ ދައުރު ވަރަށް ބޮޑަށް ފާހަގަ ކުރެވިފައިވާއިރު، މަގާމުގެ ނުފޫޒުން މިނިސްޓަރު އަމީން ކަންތައްތަކެއް ކުރައްވާފައިވާކަމުގެ ވަރަށް ބޮޑެތި ތުހުމަތުތަކެއް އޭސީސީގެ ތަހުގީގު ރިޕޯޓްގައި ފާހަގަކޮށްފައި ވެއެވެ.
ވެންޓިލޭޓަރުތައް ހޯދުމަށް ހަވާލު ކުރި އެއް ކުންފުނި ކަމަށްވާ ދުބާއީގެ އެގްޒެކިއުޓާރސް ޖެނަރަލް ޓްރޭޑިންގއަށް އެޑްވާންސް ފައިސާގެ ގޮތުގައި، ވެންޓިލޭޓަރުތައް ގަތުމުގެ އަގުގެ ޖުމްލަ ފައިސާގެ 90 ޕަސެންޓް ވަނީ ދީފަ އެވެ. އެއީ 75 ވެންޓިލޭޓަރުގެ ޖުމްލަ އަގު ކަމަށްވާ 34 މިލިއަން ރުފިޔާގެ ތެރެއިން 30.9 މިލިއަން ރުފިޔާ އެވެ. މި 75 ވެންޓިލޭޓަރު ރާއްޖެ ގެނައުމުގެ އެއްބަސްވުމުގައި އެގްޒެކިއުޓާރސްއާއެކު ހެލްތް މިނިސްޓްރީން ސޮއި ކުރީ އޭޕްރީލް މަހުގެ ދެވަނަ ދުވަހު އެވެ. އަދި ހަމަ އެމަހުގެ ތެރޭގައި ދެފަހަރެއްގެ މަތިން އެޑްވާންސަށް ދޭން އެއްބަސްވެފައިވާ 30.9 މިލިއަން ރުފިޔާ ވަނީ އެކުންފުންޏަށް ފޮނުވާފައެވެ. އަދި އެއްބަސްވުމުގައިވާ ގޮތުން 14 ދުވަހުގެ ތެރޭގައި 75 ވެންޓިލޭޓަރު ހުންނަން ޖެހޭނީ ރާއްޖޭގައެވެ. އެހެންކަމުން އޭޕްރީލް 16 ވަނަ ދުވަހު އެ ވެންޓިލޭޓަރުތައް ރާއްޖޭގައި ހުންނަން ޖެހެއެވެ. ނަމަވެސް މިއަދާ ހަމައަށް އެ ވެންޓިލޭޓަރުތައް ރާއްޖެއަށް ގެނެވިފައި ނުވެއެވެ.
އެ ބުނާ އެއްބަސްވުމުގައި ސޮއި ކުރި ކަމަށް ބުނާ ދުވަހާއި، އެޑްވާންސަށް ފައިސާ ދޫކުރުމުގައި ހެލްތް މިނިސްޓަރު އަމީންގެ މައްޗަށް ބޮޑެތި ތުހުމަތުތަކެއް ކުރެވިފައިވެއެވެ. އެގޮތުން، އެގްޒެކިއުޓާރސްއާ އެކު ސޮއިކުރީ، އެޕްރީލް، ދެ ވަނަ ދުވަހު ކަމަށް ހެލްތް މިނިސްޓްރީގެ ލިޔުންތަކުގައި ހާމަކޮށްފައިވީނަމަވެސް، ފައިނަލް އެއްބަސްވުމުގައި އެގްޒެކިއުޓާރސް އިން ސޮއިކޮށް ހެލްތް މިނިސްޓްރީއަށް ފޮނުވީ، 16 އެޕްރީލް 2020 ވަނަ ދުވަހުއެވެ. އެދުވަހާ ހަމައަށް އައިރު، އެޑްވާންސަށް ދޭން އެއްބަސްވެފައިވާ 30.9 މިލިއަން ރުފިޔާ ވަނީ ދީ ނިންމާފައެވެ.
