ނިއު ނޯމަލްގެ އުސޫލުތަކަށް އަމަލު ކުރުމުގައި ރާއްޖެއިން ދަނީ އެހެން ގައުމުތަކަށް މިސާލު ދައްކަމުން: އެމްއެމްޕީއާރުސީ
14 އޮކްޓޯބަރު 2020 | ބުދަ 12:54ވައިރަސް ފެތުރުން ހުއްޓެންދެން ނިއުނޯމަލްގެ އުސޫލުތަކަށް އަމަލުކުރަން ޖެހޭ
މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިންގް ޑިރެކްޓަރ ތޮއްޔިބު މުހައްމަދު
ނިއުނޯމަލްގެ އުސޫލުތަކަށް އަމަލު ކުރުމުގައި ރާއްޖެއިން ދަނީ އެހެން ގައުމުތަކަށް މިސާލު ދައްކަމުން ކަމަށް މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިންގް ޑިރެކްޓަރ ތޮއްޔިބު މުހައްމަދު ވިދާޅުވެއްޖެއެވެ.
ބުދަ ދުވަހުގެ މަޖިލީހުގެ ސްޓޭޓް އޯންޑް އެންޓަރޕްރައިޒެސް ކޮމިޓީގައި ވާހަކަ ދައްކަވަމުން އޭނާ ވަނީ މިއީ ރާއްޖެއަށް އެކަނި ކުރިމަތިވެފައިވާ ހާލަތެއް ނޫން ކަން ފާހަގަކުރައްވާ، ރާއްޖޭގެ އިގްތިސާދު ބަރޯސާވެފައިވަނީ ފަތުރުވެރިކަމަށް ކަމަށްވާތީ އެކަމުގެ އަސަރު ވަރަށް ބޮޑަށް ކުރަމުންދާ ކަމަށް ވިދާޅުވެފައެވެ.
ތޮއްޔިބު ވިދާޅުވީ ރާއްޖޭގެ ފަތުރުވެރިކަމުގެ މުސްތަގުބަލަށް އުއްމީދު އެބައޮތް ކަމަށެވެ. ފަތުރުވެރިކަމުގެ ހާލަތު ރަނގަޅު ވާނީ ވައިރަސް ފެތުރޭ މިންވަރު ކުޑަވުމުން ކަމަށް ވިދާޅުވެ ތޮއްޔިބު ވިދާޅުވީ ވައިރަސް ފެތުރުން ހުއްޓެންދެން ނިއުނޯމަލްގެ އުސޫލުތަކަށް އަމަލު ކުރަން ޖެހޭ ކަމަށެވެ. އަދި މިކަމުގައި ރާއްޖެއިން ދަނީ އެހެން ގައުމުތަކަށް މިސާލު ދައްކަމުން ކަމަށް އޭނާ ވިދާޅުވިއެވެ.
ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރުތައް ހުޅުވާލުމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމެވި ނިންމެވުމަކީ އެއީ އެމަނިކުފާނު ނެންގެވި ވަރަށް ވަރުގަދަ ނިންމުމެއް ކަމަށް ތޮއްޔިބު ވިދާޅުވިއެވެ. އޭނާ ވިދާޅުވީ މިކަމުގެ ސަބަބުން ވާދަވެރި ގައުމުތަކުން ރާއްޖެ ވަރަށް ގާތުން ބަލަމުންދާ ކަމަށެވެ. ވަރަށް 'ޗެލެންޖެސް' ގިނަ ކަން ފާހަގަކުރައްވާ ތޮއްޔިބު ވިދާޅުވީ ހެދިފައިވާ މިހާލަތުގައި އެންމެ އެދެވޭ އަދަދަށް ފަތުރުވެރިން ނައިސްދާނެ ކަމަށެވެ. އެހެން ނަމަވެސް މި އަދަދުތައް މަޑުމަޑުން އިތުރުވަމުންދާ ކަން އޭނާ ފާހަގަކުރެއްވިއެވެ.
