އެވިޑް ކޮލެޖްގެ 2021 ވަނަ އަހަރުގެ ޖެނުއަރީ ސެމެސްޓަރގެ ކޯސްތަކުގައި ބައިވެރިވުމަށް ހުޅުވާލައިފި
"ނައިބް ރަޝާދު ސްކޮލަރޝިޕް"ގެ 30 ފުރުޞަތު ހުޅުވާލާފައިވޭ
އެވިޑް ކޮލެޖްގައި އެކިއެކި ކޯސްތަކުގައި ދެހާހަށްވުރެ ގިނަ ދަރިވަރުން ކިޔަވަމުންދޭ
އެވިޑް ކޮލެޖްގެ 2021 ވަނަ އަހަރުގެ ޖެނުއަރީ ސެމެސްޓަރގެ ކޯސްތަކުގައި ބައިވެރިވުމުގެ ފުރުޞަތު ހުޅުވާލައިފި އެވެ.
ފޭސްބުކް ލައިވް މެދުވެރިކޮށް އަންގާރަ ދުވަހު ބޭއްވި ވާރޗުއަލް އޯޕަންޑޭގެ ޙަރަކާތް ފަށްޓަވައި ދެއްވުމުގެ ގޮތުން، ޗެއަރަމަން އަބްދުﷲ މުސްތާޤް ރަޝާދުވަނީ މިއަންނަ އަހަރުގެ ޖެނުއަރީ މަހުގެ ފުރަތަމަ ހަފްތާގައި އެވިޑް ކޮލެޖުން ފެށުމަށް ހަމަޖައްސާފައިވާ ކޯސްތަކުގައި ބައިވެރިވުމުގެ ފުރުޞަތު ލޯންޗްކޮށްދެއްވާފަ އެވެ.
އެވިޑް ކޮލެޖުން މަޢުލޫމާތު ދިން ގޮތުގައި ތަފާތު ގިނަ ދާއިރާތަކަކުން ހަތްދިހައަށް ވުރެ ގިނަ ކޯސް ޖެނުއަރީ މަހު އެވިޑް ކޮލެޖުގައި ކުރިއަށް ގެންދިއުމަށް ހަމަޖައްސާފަ އެވެ.
އެގޮތުން، ކޯސްތައް ހިންގާ ދާއިރާތަކުގެ ތެރޭގައި ބިޒްނަސް އެޑްމިނިސްޓްރޭޝަން، ޕްރޮޖެކްޓް މެނޭޖްމެންޓް، ހިއުމަން ރިސޯރސް މެނޭޖްމެންޓް، އެކައުންޓިންގ އެންޑް ފައިނޭންސް، އިންފޮރމޭޝަން ޓެކްނޮލޮޖީ، އޮފީސް މެނޭޖްމެންޓް، އެޑިޔުކޭޝަނަލް ލީޑަރޝިޕް، ޓީޗިންގ ސެކަންޑްރީ، ޓީޗިންގ ޕްރައިމަރީ، އާރލީޗައިލްޑްހުޑް އެޑިޔުކޭޝަން، ޝަރީއާ އެންޑް ލޯ، ޤުރުއާން ޓީޗިންގ، ސައިކޮލޮޖީއާއި ކައުންސެލިންގ އަދި އިންކްލޫސިވް އެންޑް ސްޕެޝަލް އެޑިޔުކޭޝަން ހިމެނެއެވެ.
މީގެ ގިނަ ދާއިރާތަކުން ސެޓްފިކެޓް ލެވެލް، ޑިޕްލޮމާ ލެވެލް، އެސޯސިއޭޓް ޑިގްރީ ލެވެލް، ބެޗްލަރސް ޑިގްރީ ލެވެލް އަދި މާސްޓަރސް ލެވެލްގެ ކޯސްތައް އެވިޑް ކޮލެޖްގައި ހިންގަމުންގެންދެއެވެ.
އެހެން އަހަރުތަކެކޭ އެއްފަދައިން މިއަންނަ އަހަރުގެ ޖެނުއަރީ މަހުގެ ސެމެސްޓަރއަށްވެސް އެވިޑް ކޮލެޖުން ސްކޮލަރޝިޕްގެ ފުރުޞަތުތައް ވަނީ ހުޅުވާލާފަ އެވެ.
އެވިޑްކޮލެޖްގެ ޗެއަރަމަންގެ ބައްޕާފުޅުގެ ނަންފުޅަށް ޚާއްޞަކުރައްވައިގެން ކުރިއަށްގެންދާ "ނައިބް ރަޝާދު ސްކޮލަރޝިޕް" ފުރުޞަތުގެ ގޮތުގައި މިފަހަރުވެސް 30 ފުރުޞަތު ހުޅުވާލާފައިވާ ކަމަށް އެވިޑް ކޮލެޖުން މަޢުލޫމާތުދެއެވެ.
އެއީ އެވިޑް ކޮލެޖް ތިނަދޫ ކެމްޕަހަށް ޚާއްޞަކޮށްގެން މާސްޓަރސް ފެންވަރުގެ 2 ފުރުޞަތާއި، ޑިޕްލޮމާ ފެންވަރުގެ 3 ފުރުޞަތު އަދި ފައުންޑޭޝަން ލެވެލްގެ ކޯސްތަކަށް 15 ފުރުޞަތާއި އަދި މާލޭގައި ހުންނަ އެވިޑް ކޮލެޖްގެ ޑައިމަންޑް ކެމްޕަހަށް ޚާއްޞަކޮށްގެން މާސްޓަރސް ލެވެލްގެ 2 ފުރުޞަތު، ޑިޕްލޮމާ ލެވެލްގެ 3 ފުރުޞަތު އަދި ފައުންޑޭޝަން ލެވެލްގެ ކޯސްތަކަށް 5 ފުރުޞަތު ކަމަށް އެވިޑުން ބުންޏެވެ.
މިހާރުވެސް އެވިޑް ކޮލެޖްގައި އެކިއެކި ކޯސްތަކުގައި ދެހާހަށްވުރެ ގިނަ ދަރިވަރުން މަތީ ތަޢުލީމު ހާޞިލްކުރަމުންގެންދެއެވެ.
