ރިކޯޑާ އެއްވަރުކުރުމުން ނަޑާލަށް ފެޑެރާ ހިތްވަރުދީފި

ގްރޭންޑް ސްލޭމް ޓެނިސް މުބާރާތް 20 ފަހަރު ކާމިޔާބުކޮށްގެން ހަދާފައިވާ ރިކޯޑާއި އަރާ ހަމަކުރުމުން ރަފައެލް ނަޑާލަށް ޓެނިސް ލެޖެންޑް ރޮޖާ ފެޑެރާ ހިތްވަރުދީފިއެވެ.

މީގެ ކުރިން 2018 ވަނަ އަހަރު ފެޑެރާ ވަނީ ގްރޭންޑް ސްލޭމް 20 ތަށި ކާމިޔާބުކޮށް، އެންމެ ގިނައިން ގްރޭންޑް ސްލޭމް މުބާރާތް ކާމިޔާބުކުރި ކުޅުންތެރިޔާގެ ރިކޯޑު ހަދާފައެވެ. އެ ރިކޯޑާ ފްރެންޗް އޯޕަނުގެ އެންމެ ކާމިޔާބު ކުޅުންތެރިޔާ ނަޑާލް އެއްވަރުކުރީ އާދީއްތަ ދުވަހު ކުޅުނު ފައިނަލް މެޗުގައި ދުނިޔޭގެ ރޭންކިން އެއްވަނައިގައި އޮތް ނޮވަކް ޖޮކޮވިޗް ބަލިކުރުމަށްފަހުއެވެ. އެއާއެކު އުމުރުން 34 އަހަރުގެ ނަޑާލްވެސް ވަނީ ގްރޭންޑް ސްލޭމްގެ 20 ތަށި މިހާތަނަށް ކާމިޔާބުކޮށްފައެވެ.

ނަޑާލަށް މަރުހަބާ ކިޔަމުން ފެޑަރާ ބުނީ ގްރޭންޑް ސްލޭމް 20 ތަށި ހަމަކުރުމަކީ އުނދަގޫ ކަމެއް ކަމަށާއި، ގްރޭންޑް ސްލޭމް 20 ތަށި ހަމަކޮށް އޭނާ ހަދާފައިވާ ރިކޯޑާއި ނަޑާލް އަރާ ހަމަކުރުމުން އެކަމާ އުފާކުރާ ކަމަށެވެ. އަދި އޭނާ އާއި ނަޑާލުގެ ވާދަވެރިކަން އިތުރު ހަރުފަތަކަށް ގެންދެއްވިއްޖެ ކަމަށް އުންމީދުކުރާ ކަމަށާއި، ކުރިއަށް އޮތްތަނުގައި އިތުރު ތަށި ކާމިޔާބުކުރުމަށް އިތުރަށް މަސައްކަތް ކުރަން ޖެހޭ ކަމަށްވެސް ވަނީ ބުނެފައެވެ.

މި ފަހަރުގެ ފްރެންޗް އޯޕަން ނަޑާލް ކާމިޔާބުކުރިއިރު، މި މުބާރާތުގައި އަނިޔާގެ ސަބަބުން ފެޑެރާ ކުޅެފައެއް ނުވެއެވެ.

ޖޮކޮވިޗް ބަލިކޮށް ފްރެންޗް އޯޕަންގެ ޗެމްޕިއަންކަން ނަޑާލް 13 ވަނަ ފަހަރަށް ހޯދިއިރު، އޭނާ ވަނީ މިހާތަނަށް މި މުބާރާތުގެ ފައިނަލުގައި ސައްތަ އިން ސައްތަ ރިކޯޑެއް ދަމަހައްޓާފައެވެ. އަދި މިއީ ނަޑާލް މި މުބާރާތުގެ ފައިނަލުގައި ޖޮކޮވިޗް ބަލިކުރި ތިންވަނަ ފަހަރެވެ. މީގެ ކުރިން ނަޑާލް ވަނީ 2012 އަދި 2014 ވަނަ އަހަރުގެ ފައިނަލުގައި ޖޮކޮވިޗް ބަލިކޮށްފައެވެ.

އަދި އާދީއްތަ ދުވަހުގެރޭގެ މޮޅާއެކު ނަޑާލް ވަނީ ފްރެންޗް އޯޕަނުގައި 100 މޮޅު ހަމަކޮށްފައެވެ. އޭނާ މި މުބާރާތުގައި މިހާތަނަށް ބަލިވީ އެންމެ ދެ މެޗުންނެވެ.