ޔޫއެސް އޯޕަން: ފެޑެރާއާ ނަދާލްވެސް ދެވަނަ ބުރަށް

ނިއު ޔޯކުގައި މިހާރު ކުރިޔަށްދާ ޔޫއެސް އޯޕަން ޓެނިސް މުބާރާތުގައި ރަފައޭލް ނަދާލް އަދި ރޯޖާ ފެޑެރާވެސް ދެވަނަ ބުރުގެ ޖާގައެއް ކަށަވަރު ކޮށްފިއެވެ.

އޭޓީޕީ ރޭންކިންގެ އެއްވަނައިގާ މިވަގުތު އޮތް ސްޕެއިންގެ ރަފައޭލް ނަދާލް ދެވަނަ ބުރުގެ ޖާގައެއް ކަށަވަރު ކޮށްފައިވަނީ 85 ވަނައިގައި ރޭންކް ކުރެވިފައި އޮތް ސާބިއާގެ ޑޫސާން ލަޖޮވިޗް ސީދާ ތިން ސެޓުން ބަލިކޮށްގެންނެވެ. ނަދާލް ސެޓުތަށް ގެންގޮސްފައި ވަނީ 7-6، 6-2 އަދި 6-2 އަކުންނެވެ.

މެޗަށް ފަހު ވާހަކަ ދައްކަމުން ނަދާލް ވަނީ ވާރޭގެ ސަބަބުން ކުރިމަތިވި އުނދަގޫތަށް ހައްލު ކޮށްދިނުމަށް މުބާރާތް އިންތިޒާމް ކުރާ ފަރާތުގައި އެދިފައެވެ. ވާރޭގެ ސަބަބުން މުބާރާތުގެ 44 މެޗެއް ވަނީ ލަސް ކުރެވިފައެވެ.

މިއީ ނަދާލް މި ސީޒަނުގައި ކާމިޔާބުކުރި 50 ވަނަ މެޗެވެ. އޭނާއާ އެއް އަދަދަކަށް އެހެން އެއްވެސް ކުޅުންތެރިޔަކަށް މެޗުތަށް ކާމިޔާބު ކުރެވިފައި ނުވެއެވެ.

މި މުބާރާތުގައި ތިން ވަނައަށް ސީޑު ކުރެވިފައިވާ ރޯޖާ ފެޑެރާ ދެވަނަ ބުރުގެ ޖާގައެއް ކަށަވަރު ކުރީ އުނދަގޫ މެޗަކަށް ފަހު ފްރާންސްގެ ފްރާނަސެސް ޓިއަފޯ ތިން ސެޓު ދެ ސެޓުން ބަލިކޮށްގެންނެވެ.

ފެޑެރާއަށް 6-4 އަކުން ފުރަތަމަ ސެޓު ގެއްލުނު ނަމަވެސް އޭނާ ވަނީ ދެވަނަ ސެޓާއި ތިންވަނަ ސެޓު 6-2 އަދި 6-1 އަކުން ގެންގޮސްފައެވެ. އެހެން ނަމަވެސް ޓިއަފޯ ވަނީ ހަތަރު ވަނަ ސެޓު 6-1 ކާމިޔާބުކޮށް ފަސް ވަނަ ސެޓަކަށް މެޗު ގެންގޮސްފައެވެ. އެހެން ނަމަވެސް މެޗުގެ ނަތީޖާ ނެރެން ކުޅުނު ފަސް ވަނަ މެޗު ފެޑެރާ ވަނީ 6-4 އަކުން ގެންގޮސް މެޗު ކާމިޔާބު ކޮށްފައެވެ.

މުބާރާތުގެ އަންހެން ސިންގަލްސް އިވެންޓުގައި މިދިޔަ އަހަރުގެ ޗެމްޕިއަން ޖަރުމަނުގެ އެންޖެލިކް ކަރްބާ ވަނީ ޖަޕާނުގެ ނައޯމީ އޮސާކާއަތުން ސީދާ ދެ ސެޓުން ބަލިވެ މުބާރާތުން ކަޓާފައެވެ. އެހެން ނަމަވެސް އެއްވަނައަށް ސީޑު ކުރެވިފައިވާ ކެރޮލީނާ ޕްލިސްކޯވާ ވަނީ 6-2 އަދި 6-1 އަކުން ޕޮލެންޑުގެ މަގްޑާ ލިނެޓް ބަލިކޮށް ދެވަނަ ބުރުގެ ޖާގައެއް ކަށަވަރު ކޮށްފައެވެ.

ފެޑެރާ މި އަހަރުގެ މުބާރާތް ކާމިޔާބު ކޮށްފިނަމަ ވެގެންދާނީ އޭނާ ކާމިޔާބު ކުރާ ހަވަނަ ޔޫއެސް އޯޕަން ޗެމްޕިއަންޝިޕަށެވެ. އަދި އޭނާ ވެގެން ދާނީ އޯޕެން އެރާގައި މި މުބާރާތް ކާމިޔާބު ކުރާ އެންމެ އުމުރުން ދުވަސްވީ ކުޅުންތެރިޔާއަށެވެ.