''ލޮނުޒިޔާރަތް ބަގީޗާ'' އަންނަ މަހު އާންމުންނަށް ހުޅުވާލަނީ
ލަސްވީ ކޮވިޑް-19 ގެ ހާލަތާއި ގުޅިގެން
ލޮނިޒިޔާރަތް ބަގީޗާ އަކީ ގިނަ އަދަދެއްގެ ގަސް ހިމެނޭ ގޮތަށް ހަދާފައިވާ ބަގީޗާއެއް
މާލޭގެ ލޮނުޒިޔާރަތް ކޮޅުގައި ސިޓީ ކައުންސިލުން ހަދާފައިވާ ''ލޮނުޒިޔާރަތް ބަގީޗާ'' އަންނަ ނޮވެމްބަރު މަހު އާންމުންނަށް ހުޅުވާލާނެ ކަމަށް ސިޓީ ކައުންސިލުން ބުނެފިއެވެ.
ސިޓީ ކައުންސިލުން ކުރިން ނިންމާފައި އޮތީ ޖުލައި މަހު ބަގީޗާ ހުޅުވުމަށެވެ. އެކަމަކު އެ މުއްދަތު ފަހަނަ އަޅާ ދިޔައިރުވެސް ''ލޮނި ޒިޔާރަތް'' ބަގީޗާއެއް ނުހުޅަވައެވެ. ސިޓީ ކައުންސިލުން ބުނެފައިވާ ގޮތުން ބަގީޗާ ހުޅުވުން ލަސްވަނީ މާލޭގައި ކޮވިޑުގެ ހާލަތު ގޯސްވުމުގެ ސަބަބުންނެވެ.
ނަމަވެސް އަންގާރަ ދުވަހު ''ރާއްޖެ.އެމްވީ'' އަށް ދެއްވި ހާއްސަ އިންޓަވިއުއެއްގައި މާލެ ސިޓީގެ މޭޔަރު ޝިފާ މުހައްމަދު ވިދާޅުވީ، ބަގީޗާ ހުޅުވުން ލަސްވަނީ، ބަގީޗާ ހުޅުވަން މަސައްކަތް ކުރާ ކޮންމެ ފަހަރަކު ބަޔަކު ހުރަސް އަޅަމުން އަންނާތީ ކަމަށެވެ. އެކަމަކު ހުރިހާ މަސައްކަތް ނިމިފައިވާ ކަމަށާއި، މިހާރު މަސައްކަތް ކުރަނީ ނޮވެމްބަރު މަހު ބަގީޗާ ހުޅުވަން ކަމަށެވެ. ނަމަވެސް ސީދާ ތާރީހެއް ޝިފާ ވިދާޅެއް ނުވެއެވެ.
"ލޮނުޒިޔާރަތް ބަގީޗާ"އަކީ ގިނަ އަދަދެއްގެ ގަސްތައް ހިމެނޭ ގޮތަށް ތަރައްގީ ކޮށްފައިވާ ރާއްޖޭގައި މިވަގުތު ހުރި އެންމެ ބޮޑު ބަގީޗާއެވެ. އަދި ބަގީޗާގެ ހިތްގައިމުކަން އިހުސާސް ކުރެވޭނީ، އެތަން ޒިޔާރަތް ކޮށްލުމުން ކަމަށާއި، އެ ބަގީޗާގައި ތިބޭއިރު، ބޭރުން ދުއްވާ ވެހިކަލްތަކުގެ އަޑުތައް ކޮންޓްރޯލް ކުރުމަށް ސައުންޑް ޕްރޫފް ކުރުމުގެ ގޮތުން ވެސް ބައެއް ކަންކަން ކޮށްފައިވާނެ ކަމަށް ސިޓީ ކައުންސިލުން ބުންޏެވެ.
ލޮނު ޒިޔާރަތްކޮޅުގައި ޕާކެއް ގާއިމު ކުރުމުގެ މަސައްކަތް ފެށީ، މާލެ-ހުޅުމާލެ ބްރިޖްގެ މަސައްކަތް ނިމި، ހުޅުވި ފަހުންނެވެ. ބްރިޖްގެ މަސައްކަތް ކުރިއަށް ދިޔައިރު، އެތަނަކީ، ކޮންޓްސްޓްރަކްޝަން ސައިޓެކެވެ. އެތަން ޕާކެއްގެ ގޮތަށް ތަރައްގީ ކުރުމުގެ މަސައްކަތް ފެށީ މިދިއަ އަހަރުން ފެށިގެންނެވެ.
