ބްރޯޑްކޮމްގެ މެމްބަރު ޒީނާ ވަކިކުރަން ކޮމިޓީން ފާސްކޮށްފި
މެމްބަރު ކަމަށް ޒީނާ އައްޔަނު ކުރީ 2016 ވަނަ އަހަރުގެ އެޕްރީލް މަހުގެ 5 ވަނަ ދުވަހު
ބްރޯޑްކޮމްގެ މެމްބަރު ޒީނާ ޒާހިރު - ޒީނާގެ މައްސަލައަކީ މީގެ ކުރިންވެސް ކޮމިޓީން ބަލަން ފަށާފައިވާ މައްސަލައެއް
މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ މެންބަރު ޒީނާ ޒާހިރު މަޤާމުން ވަކި ކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.
ހޯމަ ދުވަހު ކުރިއަށް ގެންދިޔަ ކޮމިޓީ ބައްދަލުވުމުގައި ޒީނާ މަޤާމުން ވަކިކުރަން ފާސް ކޮށްފައިވަނީ ކޮމިޓީއަށް ހާޒިރުވި ނުވަ މެމްބަރުންގެ ތެރެއިން ފަސް މެމްބަރުންގެ ވޯޓުންނެވެ. އެގޮތުން މެމްބަރު ޒީނާ މަޤާމުން ވަކި ކުރުމަށް ކޮމިޓީން ނިންމާފައިވަނީ އޭނާއަށް ޖަވާބުދާރީ ވުމުގެ ފުރުސަތު ކޮމިޓީން ދިނުމަށް ފަހުއެވެ.
ޒީނާގެ މައްސަލައަކީ ކޮމިޓީން މީގެ ކުރިން ވެސް ބަލަމުންދިޔަ މައްސަލައެކެވެ. ނަމަވެސް އޭރު ޒީނާ ބަލިވެ އިނުމުން، ޒީނާ ހާޒިރު ކުރުމަށް ނިންމުނު ބައްދަލުވުން ބާއްވާފައެއް ނުވެއެވެ. އެގޮތުން ޤާނޫނީ ވާޖިބު އަދާ ނުކުރުމާއި، ވަކި މީޑިއާތަކަކާ މެދު ކުރީގެ ސަރުކާރުގެ ދުވަސްވަރު ތަފާތުކޮށް އަމަލު ކުރި ކަމުގެ ތުހުމަތުތައް ޒީނާގެ އިތުރުން ބްރޯޑްކޮމްގެ ކުރީގެ މެމްބަރުންގެ މައްޗަށްވެސް ކުރެވެއެވެ.
އޭގެ އިތުރުން، ބްރޯޑްކޮމްއިން އަމިއްލަ އިސްނެގުމުގެ މަތިންނާއި ކޮމިޝަނުގެ ވަކިވަކި މެމްބަރުން ހުށަހަޅާ މައްސަލަތައް ބެލުުމުގައި ހަމަހަމަކަން ނެތް ކަމަށް ޤަބޫލު ކުރައްވާ ކަމަށާއި، ސިޔާސީ ނުފޫޒު އެ ބޭފުޅުންގެ މައްޗަށް އޮތް މިންވަރު އެނގޭނީވެސް ހަމަ އެ ބޭފުޅުންނަށް ކަމަށް ބްރޯޑްކޮމްގެ އޭރުގެ ރައީސް މުހައްމަދު ޝަހީބުވެސް ވަނީ ވިދާޅުވެފައެވެ.
ބްރޯޑްކޮމްގެ މެމްބަރުކަމަށް ޒީނާ އައްޔަނު ކުރީ 2016 ވަނަ އަހަރުގެ އެޕްރީލް މަހުގެ 5 ވަނަ ދުވަހުއެވެ. އެގޮތުން ޒީނާ ޒާހިރު މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރު ކަމަށް ޢައްޔަން ކުރެއްވުމުގެ ކުރިން ހުންނެވީ މޯލްޑިވްސް ޕޯޓްސް ލިމިޓެޑްގެ އެސިސްޓެންޓް މެނޭޖަރގެ މަޤާމްގައެވެ.
