ބިލްތަކާއި ރިޕޯޓްތަކާއި މަޖިލީހުގައި ލިޔާލިޔުންތައް އިސްތިރާކަށް އެދުމުގެ އިންތިޒާމު ހަމަޖައްސަނީ
މަޖިލީހުގެ ލައިބްރަރީއަކީ ރާއްޖޭގެ ރައްޔިތުންނަށާއި މަޖިލީހުގެ މެމްބަރުންނަށް ދިރާސާތައް ކުރުމަށް ރަނގަޅު ތަނެއްގެ ގޮތުގައި ބިނާކުރަމުން ގެންދިޔުމަކީވެސް ބޭނުމެއް
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ރައްޔިތުންގެ މަޖިލީހުގައި ލައިބްރަރީއެއް ހެދުމުގެ މަސައްކަތްކުރަމުން އަންނައިރު މަޖިލީހަށް ހުށަހެޅި ބިލްތަކާއި، މަޖިލީހުން އެކިކަންކަމުގައި ތައްޔާރުކުރަމުންދާ ރިޕޯޓްތަކާއި އެހެންވެސް ލިޔުންތަކާއި މައުލޫމާތުތައް އިސްތިރާކަށް އެދޭ ފަރާތްތަކަށް އެކަން ހަމަޖައްސައިދިނުމަކީ މިލައިބްރަރީން ކުރާނެ އެމަސައްކަތްކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ހޯމަ ދުވަހުގެ ޖަލްސާގައި މަޖިލީހުގައި ލައިބްރަރީއެއް ހެދުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން ރައީސް ނަޝީދު ވިދާޅުވީ މި މަސައްކަތް ކުރިޔަށް ގެންދިޔުމަށް މިހާރު ޑެޕިޔުޓީ ޑިރެކްޓަރ ކަމުގެ މަގާމަށް ބޭފުޅަކު ހަމަޖައްސާފައިވާކަމަށެވެ. މަޖިލީހުގައި ލައިބްރަރީއެއް ހެދުމުގެ ބޭނުމަކީ މަޖިލީހުގެ ޒަމާންވީ ލިޔުންތަކާއި އަދި މިހާރުވެސް މަޖިލީހުން ކުރަމުންދާ މަސައްކަތްތަކުގެ ޔައުމިއްޔާ، ރިޕޯޓް، ބިލް އަދި ޤާނޫނާއި މިބާވަތުގެ ހުރިހާ އެއްޗެއް އެއްތަނަކުން ފަސޭހައިން ފެންނާނެ ގޮތަކަށް އިންތިޒާމު ކުރުން ކަމަށް ނަޝީދު ވިދާޅުވިއެވެ.
ހަމައެއާއެކީގައި މަޖިލީހުގެ ލައިބްރަރީއަކީ ރާއްޖޭގެ ރައްޔިތުންނަށާއި މަޖިލީހުގެ މެމްބަރުންނަށް ދިރާސާތައް ކުރުމަށް ރަނގަޅު ތަނެއްގެ ގޮތުގައި ބިނާކުރަމުން ގެންދިޔުމަކީވެސް ބޭނުމެއް ކަމަށް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވިދާޅުވީ މަޖިލީހުން ފާސްކޮށްފައިވާ ޤާނޫނުތައް އެއް ފޮތްބައެއްގެ ގޮތުގައި ނެރުމުގެ މަސައްކަތް މިހާރު މަޖިލީހުން ކުރަމުން ގެންދާކަމަށެވެ. އަދި ލައިބްރަރީ މެދުވެރިކޮށް ޤާނޫނުތައް އެއް ފޮތްބަޔެއްގެ ގޮތުގައި ޤާނޫނުތަކުގެ ރިފަރަންސް ނަންބަރުތަކާއި ނޯޓްސްއާއި އެކީގައި ނެރެވޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާނެ ކަމަށް ވިދާޅުވިއެވެ.
ރާއްޖޭގެ ހުރިހާ ސްކޫލްތަކެއްގެ ލައިބްރަރީތަކާއި މަޖިލީހުގެ ލައިބްރަރީ އާއި ގުޅުން ބޭއްވުމަކީވެސް މިކަމުގެ ތެރެއިން ކުރަމުންދާ މަސައްކަތުގެ އަމާޒެއް ކަމަށްވެސް ރައީސް ނަޝީދު ވިދާޅުވިއެވެ.
