ކޮމިޓީ ރިޕޯޓުން ކުރިއަށް އޮތް ތިން އަހަރު ދަރަނި ދައްކަން ހޭދަކުރާނެ ވަރު ދެނެގަނެވޭނެ: ރައީސް ނަޝީދު
12 އޮކްޓޯބަރު 2020 | ހޯމަ 07:17މި މައްސަލަ މަޖިލީހުން ބަލަނީ ރައީސް ނަޝީދުގެ ހުށައެޅުވުމަކާއި ގުޅިގެން
ރައްޔިތުންގެ މަޖިލީހުގެ ޖަލްސާއެއްގައި ރައީސް ނަޝީދު ވާހަކަދައްކަވަނީ
ދައުލަތުގެ ދަރަންޏާއި ގުޅިގެން މުޅި މަޖިލީހުގެ ކޮމިޓީން އެކުލަވާލާ ރިޕޯޓުން ކުރިއަށް އޮތް ތިން އަހަރު ދަރަނި ދެއްކުމުގައި ހޭދަކުރާނެ ވަރު ދެނެގަނެވޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މި ރިޕޯޓު މަޖިލީހުގެ ކޮމިޓީން އެކުލަވާލުމަށް ނިންމީ ކުރީގެ ރައީސް އަބްދުﷲ ޔާމީންގެ ވެރިކަމުގައި ދައުލަތުގެ ނަމުގައި ގެރެންޓީ ދީފައިވާ ލޯނުތަކާއި 2013 ވަނަ އަހަރުން ފެށިގެން 2018 ވަނަ އަހަރާ ހަމައަށް ރާއްޖޭގެ ދަރަނީގެ މިންވަރު ހުރި މިންވަރު ސާފުނުވާތީ އެކަން ބެލުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ހުށައަޅުއްވާފައިވާތީއެވެ.
ހޯމަ ދުވަހުގެ ޖަލްސާގައި މަޖިލީހުގެ ރައީސް ވަނީ، އޮޑިޓަރ ޖެނެރަލްގެ ފަރާތުން ދައުލަތުގެ ދަރަންޏާއި ގުޅިގެން ދެ އޮޑިޓު ރިޕޯޓެއް ލިބިފައިވާ ކަން މެމްބަރުންގެ ސަމާލުކަމަށް ގެންނަވާފައެވެ. އަދި މި ދެ ރިޕޯޓު މަޖިލީހަށް ލިބިފައިވަނީ މުޅި މަޖިލީހުގެ ކޮމިޓީންވެސް އެކަން ބަލަމުން ދަނިކޮށްކަން ފާހަގަކުރައްވާ ނަޝީދު ވިދާޅުވީ މި ރިޕޯޓުގައި ހުރެދާނެ މައުލޫމާތަކާއި މެދު ބައެއް ފަރާތްތަކުން ކަންބޮޑުވުން ފާޅުކުރަމުންދާ ކަމަށެވެ.
އެ ފަރާތްތަކުން ކަންބޮޑުވަނީ ދަރަންޏާއި ގުޅިގެން ހުންނަ ކަންކަމުގައި ތަފާތުތަކެއް އުޅޭ ނަމަ ބައިނަލްއަގްވާމީ އިދާރާތަކުންވެސް އެކަން ފާހަގަކުރާނެތީ ކަމަށް މަޖިލީހުގެ ރައީސް ވިދާޅުވިއެވެ. ނަޝީދު ވިދާޅުވީ މި އަދަދުތަކުގައި ފަރަގެއްވާނަމަ، އެކަން ހޯދާ ދެނެގަތުމަކީ މަޖިލީހުގެ ޒިންމާއެއްކަމަށެވެ.
2012 ވަނަ އަހަރާއި 2018 ވަނަ އަހަރު ދައުލަތް އިންތިހާއަށް ދަރަނިވެރިވެފައިވާ ކަމަށެވެ. މި މައްސަލައާއި ގުޅިގެން މަޖިލީހުން އެކުލަވާލާ ރިޕޯޓުގައި ނަގާފައިވާ ކޮންމެ ބާވަތެއްގެ ދަރަނީގެ މިންވަރާއި 2021, 2022, އަދި 2023 ވަނަ އަހަރު ދަރަނި ދެއްކުމުގައި ހޭދަ ކުރާނެ ވަރުވެސް ދެނެގަނެވޭނެކަމަށެވެ. ރައީސް ނަޝީދު ވަނީ މި މަސައްކަތަކީ ދައުލަތުގެ މަސައްކަތެއްގެ ގޮތުގައި ދެކިގެން ކުރިއަށް ގެންދިއުމަށް އިލްތިމާސްކުރައްވާފައެވެ.
މިދިޔަ އަހަރުގެ އޮކްޓޯބަރު މަހު މަޖިލީހަށް ހާޒިރުވެ، ފިނޭންސް މިނިސްޓަރ އިބްރާހިމް އަމީރު ވިދާޅުވެފައިވަނީ ދަރަނި ދެއްކުމަށް (ޑެޓް ސަރވިސިންގ އަށް) ގާތްގަނޑަކަށް 4 ބިލިއަން ރުފިޔާ މި އަހަރު ހޭދަވާނެ ކަމަށް ބެލެވޭ ކަމަށެވެ. މިނިސްޓަރ ވިދާޅުވީ ޑެޓް ސަރވިސިންގްގައި އިންޓްރެސްޓް ޕޭމަންޓްސް އާއި ޕްރިންސިޕަލް ޕޭމަންޓްސްއަށް ދައްކާނެ އަދަދު ބަޖެޓުގައި ހިމަނާފައިވާނެ ކަމަށެވެ. އެގޮތުން ޑެޓް ސާރވިސިންގް އަށް ގާތްގަނޑަކަށް 4 ބިލިއަން ރުފިޔާ ދާނެ ކަމަށް ބެލެވޭ ކަމަށާއި އޭގެ ތެރެއިން 2.1 ބިލިއަން ރުފިޔާގެ އިންޓްރެސްޓް ޕޭމެންޓްސް ގޮތުގައި ދައްކާ، 2.1 ބިލިއަން ރުފިޔާ ޕްރިންސިޕަލް ޕޭމަންޓްސްގެ ގޮތުގައި ދައްކާނެ ކަމަށެވެ.
