ސަފާރީ ކޭސް: ވިކްޓިމްގެ ބަޔާން ބަދަލުކުރަން އުޅުނު މައްސަލައެއް ފެންމަތިވެއްޖެ!

ހުޅުމާލޭގެ ފަޅުތެރޭގައި އޮތް ސަފާރީއެއްގައި ކެންޔާގެ އަންހެނަކަށް މިދިޔަ ޖޫން މަހުގެ ތެރޭގައި ޖިންސީ ގޯނާކުރި މައްސަލައިގައި އޭނާ ފުލުހުންނަށް ދިން ބަޔާނަށް, އެ މައްސަލަ ބަލާ އޮފިސަރުން އުނި އިތުރު ގެނެސް ބަދަލުކޮށްފައިވާ ކަމުގެ ތުހުމަތުކޮށް މައްސަލަ ބަލައިދޭން ފުލުހުންނާއި ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ހުށަހަޅައިފިއެވެ.

މި ބަޔާން ބަދަލު ކުރަން އޭގައި ހުރި ބައެއް ބައިތައް އުނި އިތުރު ގެންނަން މަސައްކަތް ކުރާ ވީޑިއޯއެއް ވަނީ ޓުވިޓަރގައި އާންމުވެފައެވެ. އެ ވީޑިއޯގައި މި މައްސަލަ ބަލާ އިންވެސްޓިގޭޓިވް އޮފިސަރަކު ބަޔާނުގައި ހުރި ބައެއް ވާހަކަތައް ކިޔައި، އުނިކުރަންވީ ކޮން ބައެއްތޯ ސުވާލުކުރެއެވެ. އަދި ހުރިހާ ވާހަކައެއް ވެސް ލިއެފައި ހުންނާނެ ކަމަށް ފިރިހެން ފުލުހަކު ބުނާ އަޑު އިވެއެވެ.

މި މައްސަލައާއި ގުޅިގެން ކެންޔާގެ އަންހެން މީހާގެ ވަކީލެއްގެ ގޮތުގައި މަސައްކަތް ކުރައްވާ ނޫރުބާން ފަހުމީ ރާއްޖެއެމްވީއަށް މައުލޫމާތު ދެއްވަމުން ވިދާޅުވީ އެ މައްސަލައިގެ އޮންލައިން ބައްދަލުވުމެއް ބާއްވާ ވަކި ހިސާބަކުން މީޓިން މެދުކަނޑާލިއެވެ. އަދި ވިކްޓިމްގެ ވީޑިއޯ އިންޓަރވިއުއެއް ދައްކާނެ ކަމަށް އިންވެސްޓިގޭޓްކުރާ އޮފިސަރުން ބުނި ކަމަށާއި، އިރުކޮޅެއް ނަގާނެ ކަމަށް ބުނި ނަމަވެސް އެކަންތައް ދިގުލައިގެން ދިޔަކަމަށް ނޫރުބާން ވިދާޅުވިއެވެ.

ކެންޔާ އަންހެން މީހާގެ ވީޑިއޯގެ ބަދަލުގައި އެ މައްސަލަ ބަލާ އޮފިސަރުން އެ ބަޔާނުގައި ހުރި ބައިތައް ބަދަލުކޮށް އުނި އިތުރު ގެންނަން މަސައްކަތް ކުރި ވީޑިއޯ ހިއްސާކުރެވުނީ އޮޅުމަކުންނެވެ. މި މައްސަލައިގައި ފުލުހުން ބުނެފައިވަނީ، ކަން ހިނގައިދިޔަގޮތް ބެލުމަށް ފަހު އެ މައުލޫމާތު ހިއްސާކުރާނެ ކަމަށެވެ.

ނޫރުބާން ވިދާޅުވީ ވިކްޓިމްގެ ބަޔާން އޮންނަން ޖެހޭނީ ވިކްޓިމް ކިޔައިދިން ގޮތަށް ކަމަށާއި ފުލުހުންނަށް އެ ބަޔާނަކަށް އުނިއިތުރެއް ނުގެނެވޭނެ ކަމަށެވެ. އަދި ފެންނަ ނުފެންނައަށް، ފުލުހުންނަށް ފެނުނީމަ ވަކި ބަސްތަކެއް ލާފައި ވަކި ތަންތަން އުނިކޮށްފައި ނުހެދޭނެ ކަމަށާއި، ފުލުހުންނަކީ ވިކްޓިމްގެ ހައްގުތައް ހިމާޔަތްކޮށް، ވިކްޓިމްގެ މަސްލަހަތު ރިޕްރެޒެންޓް ކޮށްދޭން ޖެހޭ ފަރާތް ކަމަށް ވިދާޅުވިއެވެ.

އޭގެ އިތުރުން، ވަކީލުންނާ ބެހޭގޮތުން ވާހަކަ ދައްކާފައި ވިކްޓިމްގެ ބަޔާނަށް ބަދަލުގެންނަން އުޅޭކަމަށް ވާހަކަތަކެއް ހުރުމުން މި ކޭސްގައި ފުލުހުންގެ ނިޔަތް ސާފުވާ ކަމަށް ނޫރުބާން ވިދާޅުވިއެވެ.

ކެންޔާ އަންހެން މީހާގެ މައްސަލައިގައި ފުލުހުން މީގެ ކުރިން ވެސް ބައެއް ކަންކަން އޮޅުވާލާ ފޮރުވަން މަސައްކަތް ކުރިކަމުގެ އެތައް ތުހުމަތުތަކެއް ވަނީ ކުރެވިފައެވެ. އަދި މި މައްސަލަ ދިގުލައިގެން ގޮސް މައްސަލަ އަދިވެސް އޮތީ ނުނިމިއެވެ.