ހޯމަ ދުވަހުގެ ޖަލްސާ އަށް ތިން ބިލަކާއި ދެ ކޮމިޓީ ރިޕޯޓެއް
އެންޓި-ކޮރަޕްޝަން ކޮމިޝަނުގެ ގާނޫނަށް އިޞްލާޙު ގެނައުމުގެ ބިލުގެ މަސައްކަތް ވަނީ އެޖެންޑާކޮށްފަ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
ހޯމަ ދުވަހުގެ ޖަލްސާއަށް ތިން ބިލަކާއި ދެ ކޮމިޓީ ރިޕޯޓެއްގެ މަސައްކަތް އެޖެންޑާ ކޮށްފިއެވެ.
ނުނިމި ހުރި މަސައްކަތްތަކުގެ ދަށުން ތިން ބިލެއް އެޖެންޑާ ކޮށްފައިވެއެވެ.
އޭގެ ތެރޭގައި ދިވެހިރާއްޖޭގެ ޤާނޫނުލްޢުޤޫބާތަށް އިޞްލާޙު ގެނައުމުގެ ބިލާއި އެންޓި-ކޮރަޕްޝަން ކޮމިޝަނުގެ ގާނޫނަށް އިޞްލާޙު ގެނައުމުގެ ބިލުގެ އިތުރުން ބިނާވެށި ޕްލޭން ކުރުމާއި ހިންގުމުގެ ބިލުގެ ބަހުސް ކުރިއަށް ގެންދިއުން ހިމެނެއެވެ.
މި ތިން ބިލަށް ބަހުސްކޮށް ނިމިއްޖެނަމަ ހޯމަ ދުވަހުގެ ޖަލްސާގައި މި ބިލުތައް ބަލައިގަތުމަށް ވޯޓަށް އަހާ، ކަމާގުޅޭ ކޮމިޓީ އަށް ދިރާސާ ކުރުމަށް ފޮނުވާނެއެވެ.
ދެ ކޮމިޓީ ރިޕޯޓެއް ވެސް އެޖެންޑާ ކޮށްފައިވާއިރު އޭގެތެރޭގައި ސަރުކާރުގެ އިދާރާތަކުން ޢަމަލު ކުރަމުންގެންދާ ގަވާއިދުތަކުގެ ދަށުން ފީ އަދި ޖޫރިމަނާ ނަގަމުންދާ ގަވާއިދުތައް ބަލައި އެ ފީތައް ނަގަމުންދަނީ ޤާނޫނާ އެއްގޮތަށްތޯ ބަލައިދިނުމަށް އެދި ކޮމިޓީއަށް ހުށަހެޅިފައިވާ މައްސަލަ ގަވާއިދު ކޮމިޓީން ދިރާސާކޮށް ނިންމިގޮތުގެ ރިޕޯޓު ހުށައަޅާ ބަހުސް ކުރުމުގެ މަސައްކަތް ވަނީ އެޖެންޑާ ކޮށްފައެވެ.
މީގެއިތުރުން ޖެނީވާގައި ހުންނަ އެކުވެރި ދައުލަތްތަކުގެ މަރުކަޒުތަކަށް، ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑޮކްޓަރ ޢާޞިމް އަޙްމަދު, ވަރލްޑް ޓްރޭޑް އޯގަނައިޒޭޝަނަށް ދިވެހިރާއްޖެއިން ކަނޑައަޅާ މަންދޫބުގެ މަޤާމަށް އައްޔަނު ކުރުމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު މަޖިލީހަށް ފޮނުއްވާފައިވާ މައްސަލަ ދިރާސާކޮށް އެކުލަވާލާފައިވާ ރިޕޯޓު ހުށައެޅުމަށް ވެސް ވަނީ އެޖެންޑާކުރެވިއެވެ.
ވޯޓަށް އެހޭނީ ދުވަހުގެ މަސައްކަތްތަކުގެ ތެރެއިން ވޯޓުން ނިންމާ ހިސާބަށް ގޮސްފައިވާ ކަންކަމަށެވެ.
