ކުލިބާލީ ހޯދަން ސިޓީން މަސައްކަތް ކޮށްފައެއް ނުވޭ

ނާޕޮލީއަށް ކުޅެމުން އަންނަ ސެނެގާލުގެ ޑިފެންޑަރު ކަލިދޫ ކުލިބާލީ ހޯދަން މެންޗެސްޓާ ސިޓީން މަސައްކަތް ކޮށްފައިނުވާ ކަމަށް އެ ޓީމުގެ ޗީފް ފުޓްބޯލް އޮޕަރޭޝަންސް އޮފިސަރު އޮމަރު ބެރަޑާ ބުނެފިއެވެ.

ކުލިބާލީ އަކީ ނާޕޮލީން ފަހަކަށް އައިސް ނެރެމުން އަންނަ ނަތީޖާތަކުގައި އެންމެ މުހިންމު ދައުރެއް އަދާކުރާ އެއް ކުޅުންތެރިޔާއެވެ. އެއާއެކު މީގެ ކުރިން މެންޗެސްޓާ ޔުނައިޓެޑުންވެސް ފާރަލި އުމުރުން 29 އަހަރުގެ ކުލިބާލީ ހޯދުމަށް މެންޗެސްޓާ ސިޓީ އާއި ޕީއެސްޖީންވެސް މަސައްކަތް ކުރި ކަމަށް ވަނީ ރިޕޯޓުކޮށްފައެވެ. އަދި ނާޕޮލީއާއެކު ސިޓީން ކުލިބާލީ ހޯދުމުގެ މަޝްވަރާތައް ކުރިއަށްގެންދިޔަ ކަމަށާއި، ނާޕޮލީ ދޫކޮށް ސިޓީއަށް ބަދަލުވާން ކުލިބާލީ ބޭނުންވާ ކަމަށްވެސް މީގެ ކުރިން މީޑިއާތަކުން ވަނީ ރިޕޯޓުކޮށްފައެވެ.

އެކަމަކު މި ނިމުނު ޓްރާންސްފާ ބާޒާރުގައި ކުލިބާލީ ނާޕޮލީ ދޫކޮށްލާފައިނުވާއިރު، ދާދި ފަހުން ސިޓީގެ ޗީފް ފުޓްބޯލް އޮޕަރޭޝަންސް އޮފިސަރު އޮމަރު ބެރަޑާ ބުނީ ކުލިބާލީއަށް ސިޓީން ޝައުގުވެރިކަން ފާޅުކުރި ނަމަވެސް، އޭނާ ހޯދުމުގެ މަސައްކަތް އެ ކުލަބުން ކޮށްފައިނުވާ ކަމަށެވެ. އަދި ނާޕޮލީއާއެކުވެސް ކުލިބާލީއާ ގުޅޭ އެއްވެސް މަޝްވަރާއެއްވެސް ކޮށްފައިނުވާ ކަމަށްވެސް އޭނާ ބުންޏެވެ.

ގެންކް ދޫކޮށް 2014 ވަނަ އަހަރު 6.5 މިލިޔަން ޕައުންޑަށް ނާޕޮލީއާ ގުޅުނު ކޫލިބަލީ އަންނަނީ އެ ޓީމުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް ކޫލިބަލީ ވަނީ ނާޕޮލީއަށް ކުޅެދިން 248 މެޗުގައި 10 ލަނޑު ޖަހާފައެވެ. އަދި އޭނާ ވަނީ ނާޕޮލީއާއެކު އިޓާލިއަން ކަޕްގެ އިތުރުން އިޓާލިއަން ސުޕަ ކަޕް ކާމިޔާބުކޮށްފައެވެ. މީގެ އިތުރުން ސެނެގާލްގެ ގައުމީ ފުޓްބޯޅަ ޓީމަށްވެސް ކުޅެމުން އަންނަ ކުލިބާލީ ވަނީ މިހާތަނަށް ގައުމީ ޓީމުގެ ޖާޒީގައި 42 މެޗު ކުޅެފައެވެ.

ކުލިބާލީ ހޯދުމަށް ސިޓީން މަސައްކަތް ކޮށްފައިނުވާކަން ހާމަކުރިއިރު، މި ނިމުނު ޓްރާންސްފާ ބާޒާރުގައި އެ ޓީމުން ވަނީ ދެ ޑިފެންޑަރެއްގެ ސޮއި ހޯދާފައެވެ. އެއީ ބޯންމަތުގެ ޑިފެންޑަރު ނޭތަން އަކޭ އާއި ބެންފީކާގެ ޑިފެންޑަރު ރުބެން ޑިއާސްއެވެ.