އެމްޕީ އިކްރާމްގެ ސާމްޕަލް ނެގި މީހާއަށް ޙަމަލާދިންކަމަށް ބުނާ މައްސަލަ ފުލުހުން ތަހުޤީޤު ކުރަނީ
10 އޮކްޓޯބަރު 2020 | ހޮނިހިރު 07:08ނުރުހުމުގެ ރާގަކުން ސާމްޕަލް ނެގި ފަރާތުގެ ނަން ސާފުކުރުމަށް އެއްސެވި
ސާމްޕަލް ނެގި މީހާއަށް ޙަމަލާ ދިން ކަމުގެ ތުހުމަތު ކުރެވެނީ ދިއްގަރު ދާއިރާގެ މެމްބަރު އިކްރާމް ހަސަންއަށް
މާފަންނު މަދަރުސާގައި ދިއްގަރު ދާއިރާގެ މެމްބަރު އިކްރާމް ހަސަންގެ ކޮވިޑް-19 ސާމްޕަލް ނެގި މީހާއަށް އޭނާ ޙަމަލާދިންކަމަށް ބުނާ މައްސަލަ ފުލުހުން ތަހުޤީޤު ކުރަން ފަށައިފިއެވެ.
އެކަމާ ގުޅޭގޮތުން ފުލުހުން ބުނެފައިވަނީ، މި މައްސަލަ ހުކުރު ދުވަހުގެރޭ ފުލުހުންނަށް ހުށައެޅިފައިވާ ކަމަށެވެ. އަދި މި މައްސަލަ މިހާރު ފުލުހުން ތަހުޤީޤު ކުރަމުންދާކަމަށް ފުލުހުން މައުލޫމާތު ދެއެވެ.
މެމްބަރު އިކްރާމް މި މައްސަލައިގައި ފޭސްބުކްގައި ކުރެއްވި ޕޯސްޓެއްގައި މެމްބަރު އިކްރާމް ވަނީ އެ ތުހުމަތުތައް ދޮގު ކުރައްވާފައެވެ. އެ ހާދިސާ ހިނގައިދިޔަގޮތް ހިއްސާ ކުރައްވަމުން އިކުރާމް ވިދާޅުވީ ކޮވިޑް ސާމްޕަލް ނެގި ވަގުތު ތަދު އިހުސާސް ކުރެވުމުން ސާމްޕަލް ނެގުމަށް ބޭނުން ކުރާ ކަފަބުރު ނެގުމަށް ވިދާޅުވެ ސާމްޕަލް ނަގަން ހުރި ފަރާތުގެ އަތް ދުރުކޮށްލި ކަމަށެވެ. އަދި ނުރުހުމުގެ ރާގަކުން އެ ފަރާތުގެ ނަން ސާފު ކުރުމަށް އެއްސެވި ކަމަށެވެ.
އޭނާ ވިދާޅުވީ އެއަށް ވުރެ ބޮޑު ކަމެއް ނުހިނގާ ކަމަށާއި އެތަނުގައި ސީސީޓީވީ ކެމެރާ ހުރިނަމަ އެކަން ސާފުވާނެ ކަމަށެވެ. އަދި މީގެކުރިން އައިޖީއެމްއެޗް އިން ޕީސީއާރު ޓެސްޓެއް ހެއްދެވި ކަމަށާއި އެފަރާތްތަކުން ސާމްޕަލް ނެގީ ވަރަށް އޯގާތެރިކޮށް ކަމަށެވެ. އަދި މިހާތަނަށް ވެސް މެމްބަރުގެ މާރާމާރީގެ މައްސަލައެއް ނޯންނާނެ ކަމަށް އޭނާ ވިދާޅުވިއެވެ.
