ރަޝިއާގެ 2 ވަނަ ކޮވިޑް ވެކްސިން ނިމުމަކާ ގާތަށް
9 އޮކްޓޯބަރު 2020 | ހުކުރު 18:48އޮކްޓޫބަރު މަހުގެ 15 ވަނަ ދުވަހު ވެކްސިން ރެޖިސްޓަރ ކުރެވިގެންދާނެ ކަމަށް ލަފާކުރޭ
ރަޝިއާއިން ތައްޔާރުކުރަމުން އަންނަ ދެވަނަ ވެކްސިންގެ ނަމަކީ އެޕިވެކްކޮރޯނާ
ކޮވިޑް-19 އަށް ރަޝިއާއިން ތައްޔާރުކުރަމުން އަންނަ ދެ ވަނަ ވެކްސިން ނިމުމަކާ ގާތްވެއްޖެއެވެ.
ސައިބީރިއާގެ ވެކްޓޯ ސްޓޭޓް ރީސާޗް ސެންޓަރ އޮފް ވައިރޮލޮޖީ އެންޑް ބަޔޯޓެކްނޮޮލޮޖީ އިން ތައްޔާރުކުރަމުން އަންނަ ވެކްސިންގެ އިންސާނީ ޓްރަޔަލްތަކުގެ އަރލީ ސްޓޭޖް ޓްރަޔަލްތައް މިހާރު ނިމިފައިވާ އިރު، އޮކްޓޫބަރު މަހުގެ 15 ވަނަ ދުވަހު ވެކްސިން ރެޖިސްޓަރ ކުރެވިގެންދާނެ ކަމަށް އެކުންފުނިން ވަނީ ލަފާކޮށްފައެވެ. ރަޝިއާގެ ހެލްތު މިނިސްޓަރ މީކައިލް މުރަޝްކޯ ވެސް ވަނީ ދެވަނަ ވެކްސިނަށް އޮކްޓޫބަރު މަހުގެ މެދުތެރޭގައި ހުއްދަ ދެވިގެން ދާނެ ކަމަށް އުންމީދު ކުރައްވާ ކަމަށް ވިދާޅުވެފައެވެ.
އެޕިވެކްކޮރޯނާ ގެ ނަމުން ނަން ދީފައިވާ މި ވެކްސިންގެ ކްލިނިކަލް ޓްރަޔަލްތަކުުގެ މަސައްކަތް މިހާރު ވެސް ކުރިއަށްދާ އިރު، ކަމާ ބެހޭ އިދާރާތަކުގެ ހުއްދަ ލިބުމާއެކު ވެކްސިންގެ ތިން ވަނަ ފޭސްގެ ޓްރަޔަލްތައް ފެށިގެން ދާނެ ކަމަށް އެކުންފުނިން ފާހަގަކުރެއެވެ. އަދި މިހާތަނަށް ކުރިއަށް ގެންގޮސްފައިވާ ޓްރަޔަލްތަކުން ވެކްސިންގެ ރައްކާތެރިކަން ފެނިގެން ގޮސްފައިވާ ކަމަށް އެ ކުންފުނިން ފާހަގަކުރެއެވެ.
ރަޝިއާ އިން އުފައްދަމުން މިއަންނަ ދެވަނަ ވެކްސިންގެ މަރުހަލާތައް ވީހާ ވެސް އަވަހަށް އެގައުމުން ކުރިއަށް ގެންދަނީ ކޮވިޑް-19 ގެ ދެވަނަ ރާޅެއް އެ ގައުމަށް އަންނަން ވާއިރަށް ރައްޔިތުން ބަލިން ރައްކާތެރި ކުރުމަށް ކަމަށް އެ ގައުމުން ފާހަގަކުރެއެވެ. އެގޮތުން 10 ވަރަކަށް ހަފްތާގެ ތެރޭގައި ދެވަނަ ވެކްސިންގެ މަސައްކަތް އެ ގައުމުން ކުރިއަށް ގެންގޮސްފައިވާއިރު، މިކަމާ ގުޅިގެން ގިނަ އަދަދެއްގެ ޑޮކްޓަރުންނާއި ކަމާބެހޭ މާހިރުން ވަނީ ކަންބޮޑުވުން ފާޅުކޮށްފައެވެ.
