ކޭޕް ޓައުން އެއްބަސްވުމާއެކު ރާއްޖޭގެ ކަނޑުގެ ސަރަހައްދުގައި ގަވާއިދާ ހިލާފަށް ކުރާ މަސްވެރިކަން ވަރަށް ބޮޑަށް ހުއްޓުވިގެންދާނެ ކަމަށް ފިޝަރީޒް މިނިސްޓަރު ޒަހާ ވަހީދު ވިދާޅުވެއްޖެއެވެ.

ކަނޑުތަކުގެ ރައްކާތެރިކަން ކަށަވަރުކޮށް ގަވާއިދާ ހިލާފަށް ކަނޑުތަކުގައި ކުރަމުންދާ ކަންކަން ހުއްޓުވުމަށް ގައުމުތަކުން ގުޅިގެން މަސައްކަތް ކުރުމަށް އެކުލާވާފައިވާ އެއްބަސްވުމުގައި މިހާރު ވެސް 50ށްވުރެ ގިނަ ގައުމުތަކުން ވަނީ ސޮއި ކޮށްފައެވެ. އެގޮތުން ރާއްޖޭގެ ވެސް ކަނޑުތައް ރައްކާތެރި ކުރުމަށް ކުރަމުންދާ މަސައްކަތުގެ ތެރެއިން މިހާރު އެ އެއްބަސްވުމުގައި ސޮއިކުރުމަށް ކުރަންޖެހޭ ކަންކަން ކުރުމުގެ މަސައްކަތް ސަރުކާރުން ވަނީ ފަށާފައެވެ.

މި އެއްބަސްވުމާ ގުޅިގެން މިނިސްޓަރު ޒަހާ ވިދާޅުވީ އެއްބަސްވުމުގައި ވީހާ ވެސް ގިނަ ގައުމުތަކުން ސޮއި ކުރުމަކީ މުހިންމު ކަމެއް ކަމަށެވެ. އަދި ސޮއި ކުރުމުން މިހާރު ވެސް މަސްވެރިކަމުގައި ހިނގަމުންދާ ގަވާއިދާ ހިލާފު ބައިވަރު ކަންތައްތައް ހުއްޓިގެންދާނެ ކަމަށް މިނިސްޓަރު ވިދާޅުވިއެވެ.

ފިޝަރީޒް މިނިސްޓްރީން ބުނީ ކޭޕް ޓައުން އެއްބަސްވުމުގެ ސަބަބުން ކަނޑު ފޭރޭ މީހުންގެ ކިބައިން މަސްވެރިން ސަލާމަތް ކުރުމަށް ބޮޑަށް ބާރު އެޅިގެންދާނެ ކަމަށެވެ. އަދި ތިމާވެށި ސަލާމަތް ކުރުމަށްޓަކައި ނެތި ދިއުމުގެ ބިރު އޮންނަ ބާވަތްތައް ހިމާޔަތް ކުރުމުގެ އިތުރުން ގަވާއިދާ ހިލާފަށް ދާ ޖަހައިގެން މަސްވެރިކަން ކުރާ މީހުން ވެސް ހުއްޓުވޭނެ ކަމަށެވެ.

މަސްވެރިން މުޅި ދުނިޔޭގައި އެކި ކަހަލަ ހާދިސާތަކުގައި ކޮންމެ އަހަރަކު ގާތްގަނޑަކަށް 2000 މަރުވެއެވެ. ކޭޕް ޓައުންގެ އެއްބަސްވުމުގެ ސަބަބުން ދުނިޔޭގެ ހުރިހާ ދިމާލެއްގައި މަސްވެރިކަން ކުރާ މީހުންނަށް ވެސް ރައްކާތެރިކަން ޔަގީން ކޮށްދެވޭނެއެވެ. ކަނޑު ފޭރޭ މީހުންގެ ކިބައިން އަދި މަސްވެރިކަން ކުރުމުގައި ވެސް ސޭފްޓީ މިންގަނޑުތައް ވެސް އިތުރަށް ހަރުދަނާ ކުރުވޭނެއެވެ.

ބޭރުގެ ރިޕޯޓުތަކުގައި ބުނާ ގޮތުން ގަވާއިދާ ހިލާފަށް ކުރާ މަސްވެރިކަމަކީ ވަރަށް ބޮޑަށް އެކަމުގެ ނޭދެވޭ އަސަރު މަސްވެރި ކަމަށް ކުރާ ކަމެކެވެ. އަދި ހިސާބުތައް ބުނާ ގޮތުން ގަވާއިދާ ހިލާފަށް ކުރާ މަސްވެރިކަމުގެ އިންޑަސްޓްރީގައި އަހަރަކަށް 20 ބިލިއަން އަރާ ކަމަށެވެ.