ތިނަދޫ ފުލެޓު ސަރަހައްދުގެ މަގުތައް ހެދުމަށް ބޭނުންވާ ސާމާނު އެ ރަށަށް ގެންގޮސްފި
މިއީ 4.7 މިލިއަން ރުފިޔާގެ މަޝްރޫއެއް
މަގުތައް ހެދުމަށް ބޭނުންވާ ސާމާނު ތިނަދޫއަށް ގެންދިއުން
ގދ. ތިނަދޫ ފްލެޓް ސަރަހައްދުގެ މަގުތައް ހެދުމަށް ބޭނުންވާ ސާމާނު އެ ރަށް ގެންގޮސްފިއެވެ.
ރޯޑް ޑިވެލޮޕްމަންޓް ކޯޕަރޭޝަނުން މައުލޫމާތުދިން ގޮތުގައި މިއީ 4.7 މިލިއަން ރުފިޔާގެ މަޝްރޫއެއް ކަމަށާއި މި މަޝްރޫއުގެ މަސައްކަތް ނިންމާލެވޭނެ ކަމަށް ލަފާކުރެވެނީ 4 މަސް ދުވަހުގެ މުއްދަތެއްގެ ތެރޭގައެވެ.
އަދި މި މަސައްކަތަށް ބޭނުންވާ ސާމާނު މިހާރު ތިނަދޫ އަށް ގެންގޮސްފައިވާއިރު، ސާމާނު ބަހައްޓާނެ ބިމެއް މިހާރު ހަމަޖެހިފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަނުން ވަނީ ބުނެފައެވެ.
މިވަގުތު ކުރިއަށްދަނީ ސާރވޭ ކުރުމުގެ މަސައްކަތް ކަމަށާއި އެމަސައްކަތް ވީހާވެސް އަވަހަށް ނިންމާލެވި އޮކްޓޯބަރު މަހުގެ 20 ވަނަ ދުވަހު މިމަޝްރޫއުގެ އަމަލީ މަސައްކަތް ފެށޭނެ ކަމަށްވެސް އާރްޑީސީން ވަނީ ބުނެފައެވެ.
އާރްޑީސީން ކުރިއަށް މިގެންދާ މަސައްކަތަކީ ތިނަދޫގައި އިމާރާތް ކޮށްފައިވާ 7 ފްލެޓް ހިމެނޭ ސަރަހައްދުގެ ލޭންޑްސްކޭޕިން އާއި ފެން ހިންދާ ނިޒާމްގެ މަސައްކަތް އިތުރުން މަގު ބައްތި ޖެހުމުގެ އިތުރުން ވެސް ބައެއް މަސައްކަތް ކުރުމަށް މި މަޝްރޫއުގެ ތެރޭގައި ވަނީ ހިމަނާފައެވެ.
އަދި މި މަސައްކަތް ކުރުމަށް ބޭނުންވާ މުވައްޒަފުން ވެސް މިހާރު ނަގާ ނިމިފައިވާ ކަމަށް އާރްޑީސީން ވަނީ ބުނެފައެވެ.
