މާޒިޔާއިން ހޮނިހިރު ދުވަހު ފަރިތަކުރުންތައް ފަށަނީ

ފަރިތަކުރުންތައް ފެށުމުގެ ހުއްދަ ފުރަތަމަ ޑިވިޝަނުގެ ކުލަބުތަކަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ދިނުމާއެކު ހޮނިހިރު ދުވަހު ފަރިތަކުރުންތައް ފަށަން މާޒިޔާ ސްޕޯޓްސް އެންޑް ރެކްރިއޭޝަނުން ނިންމައިފިއެވެ.

މި މަހުގެ އެއްވަނަ ދުވަހު އެޗްޕީއޭއިން ވަނީ ފުރަތަމަ ޑިވިޝަނުގެ ޓީމުތަކަށް ފަރިތަކުރުންތައް ފެށުމުގެ ހުއްދަ ދީފައެވެ. އަދި ބުރާސްފަތި ދުވަހު ޑިރެކްޓާ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރާއި، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ގެ އިތުރުން އެ އިދާރާގެ އޮފިޝަލުންނާއި، ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު އަސްހަދު އަލީގެ އިތުރުން ޓެކްނިކަލް އެޑްވައިޒަރީ ގްރޫޕް (ޓެގް) އާއި ފުލުހުން އެކުގައި ބޭއްވި ބައްދަލުވުމުގައި ވަނީ ނިއު ނޯމަލްގައި ފަރިތަކުރުންތައް ކުރިއަށްގެންދާނެ ގޮތުގެ ގައިޑްލައިން ފައިނަލް ކޮށްފައެވެ.

މާޒިޔާގެ އޮފިޝަލަކު "ރާއްޖެ.އެމްވީ" އަށް މައުލޫމާތުދެމުން ބުނީ އެފްއޭއެމާއި އެޗްޕީއޭއިން އެކުލަވާލާފައިވާ ގައިޑްލައިންތަކާ އެއްގޮތަށް ހޮނިހިރު ދުވަހުގެ ހަވީރު މާޒިޔާއިން ކުރިއަށް އޮތް ސީޒަނަށް ފަރިތަކުރުންތައް ފަށާނެ ކަމަށެވެ. އެހެންކަމުން އައު ސީޒަނަށް ފަރިތަކުރުންތައް ފަށާނެ ފުރަތަމަ ޓީމަކަށް މާޒިޔާ ވާނެއެވެ.

މުޙައްމަދު ނިޒާމް (ނިޒާމްބެ) ގެ އިރުޝާދުގެ ދަށުން މާޒިޔާއިން ފަރިތަކުރުންތައް ފަށާއިރު، މިދިޔަ އޮގަސްޓް މަހުވެސް އެ ޓީމުން ވަނީ ފަރިތަކޮށްފައެވެ. އެ ފަހަރު މާޒިޔާއިން ފަރިތަކުރީ ހާއްސަ ހުއްދައެއްގެ ދަށުން އޭއެފްސީ ކަޕަށް ތައްޔާރުވުމަށެވެ. އެކަމަކު ފަހުން އޭއެފްސީ ކަޕް ކެންސަލް ކުރުމުންް މާޒިޔާއިން ފަރިތަކުރުންތައް ހުއްޓާލިއެވެ.

ކޮވިޑް-19 އާ ގުޅިގެން އައު ސީޒަން ފެށުން ލަސްވެފައިވާއިރު، އަންނަ ޑިސެމްބަރު މަހު ފުޓްބޯޅަ ސީޒަން ފަށަން އެފްއޭއެމުން އަންނަނީ މަސައްކަތް ކުރަމުންނެވެ. އެކަމަކު ދާދި ފަހުން ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވަނީ މާލެ ސަރަހައްދުގައި އަޅާފައިވާ ފިޔަވަޅުތަކަށް ލުދިނުމުގެ ތެރެއިން ކުޅިވަރު ހަރަކާތްތަކަށް ހުއްދަ ދެވޭނީ ފެންނަ ކޭސްތަކުގެ އަދަދަށް ބެލުމަށްފަހުގައި ކަމަށް ވިދާޅުވެފައެވެ.