ތ. ގުރައިދޫ ގެއެއް ރޯވެ، މީހުން ދިރިނޫޅެވޭ ވަރަށް އަނދާ ހުލިވެއްޖެ!
9 އޮކްޓޯބަރު 2020 | ހުކުރު 09:26އަލިފާން ހިފާފައިވަނީ އެރަށު ގާދިއްފުށި ނަމަކަށް ކިޔާ ގެއެއްގައި
ތ ގުރައިދޫ ގާދިއްފުށި ގޭގައި އަލިފާން ރޯވެފައި- އަލިފާންގަނޑު މިހާރު ނިއްވާލެވިފައިވާ ކަމަށް ކައުންސިލުން މައުލޫމާތުދޭ
ތ ގުރައިދޫ ގެއެއް ރޯވެ، މީހުން ދިރިނޫޅެވޭ ވަރަށް އަނދާ ހުލިވެއްޖެއެވެ.
ހުކުރު ދުވަހު ހިނގި މި ހާދިސާގެ މައުލޫމާތު ރާއްޖެއެމްވީ އަށް ދެއްވަމުން ގުރައިދޫ ކައުންސިލުގެ ރައީސް އަލީ ރަޝީދު ވިދާޅުވީ، ހާދިސާގެ ރިޕޯޓް ކައުންސިލަށް ލިބިފައިވަނީ ހުކުރު ދުވަހު މެންދުރު 11:35 ހާއިރު ކަމަށާއި، ގޭގެ ހަތަފު ފާރު ފިޔަވައި ހުރިހާ އެއްޗެއް އަނދާ ހުލިވެފައިވާ ކަމަށެވެ. އެގޮތުން އަލިފާން ހިފާފައިވަނީ އެ ރަށު ގާދިއްފުށި ނަމަކަށް ކިޔާ ގެއެއްގައި ކަަމަށް އޭނާ ވިދާޅުވިއެވެ.
ރަޝީދު ވިދާޅުވީ، މި ވަގުތު އެގޭގައި ދިރިއުޅެނީ އަންހެނަކާއި އޭނާގެ 18 އަހަރު ނުވާ އަންހެން ދަރިފުޅު އެކަނި ކަމަށާއި، ހާދިސާ ހިނގި ވަގުތު އެދެމައިން ގޭގައި ނޫޅޭ ކަމަށެވެ. އަދި އަލިފާނުގެ ޙާދިސާގެ ސަބަބުން ގޭގައި ބޭނުންކުރާ ސާމާނުތަކާއި، ކިޔަވާ ފޮތްތަކާއި، ޔުނިފޯމުތައްވެސް އަނދާ ހުލިވެފައިވާކަމަށް އޭނާ ވިދާޅުވިއެވެ.
އޭގެ އިތުރުން، މި ޙާދިސާގެ ޚަބަރު ލިބުމާއެކު އެރަށު ފުލުހުންނާއި އާންމުންވެގެން އަލިފާން ނިއްވާލާފައިވާއިރު، ޙާދިސާ ހިނގާފައިވަނީ ކަރަންޓް ޝޯޓެއް ވެގެން ކަމަށް ބެލެވޭކަމަށް އޭނާ ވިދާޅުވިއެވެ. އަދި މިކަން ތަހުޤީޤު ކުރުމަށް ފޮރެންސިކް ޓީމަކުން މަސައްކަތް ފެށުމަށް ތައްޔާރުވަމުންދާކަން އޭނާ ފާހަގަ ކުރެއްވިއެވެ.
އަލިފާނުގެ ޙާދިސާގެ ސަބަބުން ގެއަށް ދިރިނޫޅޭ ވަރަށް ގެއްލުން ލިބިފައިވާއިރު، އެ ދެމައިންގެ ބޯހިޔާވަހިކަމުގެ އިންތިޒާމުތައް ހަމަޖެއްސުމާގުޅޭ މަޝްވަރާތައް މިހާރު ކައުންސިލުން ދަނީ ކުރަމުންނެވެ.
