އައްޑޫސިޓީ މަރަދޫ އިން ގޯތި ދޫކުރުން: ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލައިފި
9 އޮކްޓޯބަރު 2020 | ހުކުރު 03:27މަރަދޫ އަވަށުން ދިރިއުޅުމަށް ދޫކުރުމަށް ހަމަޖެހިފައިވަނީ 30 ބަންޑާރަ ގޯތި
އައްޑޫ ސިޓީ، ޝަކުވާ ހުށަހަޅަން ބޭނުންވާ ފޯމް ކައުންސިލްގެ ވެބްސައިޓުން ލިބޭނެ ކަމަށް ކައުންސިލުން ބުނޭ
އައްޑޫސިޓީ މަރަދޫ އަވަށުން ދިރިއުޅުމަށްޓަކައި ދޫކުރުމަށް ހަމަޖެހިފައިވާ ބަންޑާރަ ގޯއްޗަށް އެދި ހުށަހެޅި ފޯމްތަކަށް ޕޮއިންޓް ދެވުނު ގޮތުގެ ވަގުތީ ލިސްޓު އާންމުކޮށްފިއެވެ.
އައްޑޫސިޓީ ކައުންސިލުން ބުނީ މަރަދޫ އަވަށުން ދިރިއުޅުމަށް ދޫކުރުމަށް ހަމަޖެހިފައިވާ 30 ބަންޑާރަ ގޯއްޗަށް އެދި ހުށަހެޅި ފޯމްތައް އިވެލުއޭޓްކޮށް ނިމިފައިވާ ކަމަށެވެ. އަދި ޕޮއިންޓް ދެވުނު ގޮތުގެ ވަގުތީ ލިސްޓް އާންމުކޮށްފައިވާ ކަމަށް ކައުންސިލުން ބުނެއެވެ. ކައުންސިލުން ބުނީ ވަގުތީ ލިސްޓު އާންމުކުރުމަށް، 29 ސެޕްޓެންބަރު 2020 ވަނަ ދުވަހު ބޭއްވުނު ކައުންސިލްގެ 2020 ވަނަ އަހަރުގެ 24 ވަނަ ޖަލްސާގައި ނިންމަވާފައިވާތީ، މި ލިސްޓު އާންމުކުރީ ކަމަށެވެ.
މި ލިސްޓަށް ޝަކުވާ ހުށަހަޅަން ބޭނުންވާ ފަރާތެއްވާނަމަ، "ޝަކުވާ ހުށަހަޅާ ފޯމް" ފުރިހަމަ ކުރުމަށްފަހު 25 އޮކްޓޫބަރު 2020 ވާ އާދީއްތަ ދުވަހުގެ 13:00 ގެ ކުރިން މަރަދޫ އަވަށު އޮފީހަށް ހުށަހެޅުމަށް ކައުންސިލުން ވަނީ އެދިފައެވެ. އަދި maradhoo@adducity.gov.mv މި އީމެއިލް މެދުވެރިކޮށް ވެސް ހުށަހަޅާ ފޯމުތައް ވެސް ބަލައިގަނެވޭނެ ކަމަށް ކައުންސިލުން ބުނެއެވެ.
ކައުންސިލުން ބުނީ ޝަކުވާ ހުށަހަޅާ ފޯމު އެ އިދާރާގެ ވެބްސައިޓުންނާއި ދިވެހި ސަރުކާރުގެ ގެޒެޓުން ޑައުންލޯޑް ކުރެވޭނެ ކަަމަށެވެ. އަދި މަރަދޫ އަވަށު އޮފީހުން ލިބޭނެ ކަަމަށެވެ.
