ޓޭބަލް ޓެނިސް އެސޯސިއޭޝަން އޮފް މޯލްޑިވްސްއިން ބެލި މައްސަލަތަކުގެ އިތުރު ތަފުސީލު ދިނުމަށް ޓީޓީ އެސޯސިއޭޝަނުގެ ކުރީގެ ހިންގާ ކޮމިޓީގައި ހިމެނިވަޑައިގެންނެވި އަދި މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) އެދިވަޑައިގެންފިއެވެ.

ޓީޓީ އެސޯސިއޭޝަނުން އަލިބެގެ މައްސަލައެއް ބެލީ އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އަސާސީ ގަވާއިދާ ޚިލާފަށް ޓީޓީ އެސޯސިއޭޝަނާއި ދެކޮޅަށް ސިވިލް ކޯޓުގައި ދައުވާ ކުރުމުންނެވެ.

މި މައްސަލައިގައި ޓީޓީ އެސޯސިއޭޝަނުން ވަނީ މިކަމަކީ އަލިބެގެ ފަރާތުން މިފަދަ ކަމެއް ފެނުނު ފުރަތަމަ ފަހަރު ކަމަށްވުމުން، ކުރިއަށް އޮތް ތަނުގައި މިފަދަ އަމަލެއް ތަކުރާރު ނުކުރުމަށް ވަނީ ނަސޭހަތްތެރިވެފައެވެ. އަދި ޓީޓީ އެސޯސިއޭޝަނަށް މާފަށް އެދި ލިޔުމުން ހުށަހެޅުމުން، ޓީޓީ އެސޯސިއޭޝަނުގެ އެހެން މެންބަރުންނެކޭ އެއްގޮތަށް، އެހިނދުން ފެށިގެން އެ އެސޯސިއޭޝަނުގެ ހަރަކާތްތަކުގައި ބައިވެރިވުމާއި، ވަސީލަތްތައް ބޭނުންކުރުމަކަށް ހުރަހެއް ނެތް ކަމަށްވެސް ވަނީ އަންގާފައެވެ.

ޓީޓީ އެސޯސިއޭޝަނުން ފޮނުވި ސިޓީގެ ޖަވާބުގައި އަލިބެ ވަނީ އަންގާރަ ދުވަހު ސިޓީއެއް ފޮނުވާފައެވެ. އަލިބެ ފޮނުވި ސިޓީގައި އޭނާ ވަނީ މައިގަނޑު ހަ ނުކުތާއެއް ފާހަގަކުރައްވާފައެވެ.

އެގޮތުން ސިވިލް ކޯޓަށް މައްސަލަ ހުށަހެޅީ ޓީޓީ އެސޯސިއޭޝަނާ ގުޅުން ހުރި މީހުންނާއި، އަމިއްލަ ހައްގުގައި ކަމަށާއި، ކޯޓަށް މައްސަލަ ހުށަހަޅައިގެން ކުރިއަށްގެންދިޔައީ ޤާނޫނު އަސާސީންވެސް އެ ފުރުސަތު އޮތުމުންކަން ކޯޓުން ފުރަތަމަ ބޭއްވި އަޑުއެހުމުންވެސް އެނގެން އޮތް ކަމަށް އަލިބެ ވަނީ ފާހަގަކުރައްވާފައެވެ. އަދި ކޯޓަށް މައްސަލަ ހުށަހެޅުމުން އެސޯސިއޭޝަނުން އަމަލުކުރީ ކޯޓުގެ ނިންމުމަށްވެސް އިހުތިރާމު ކުޑަވާ ގޮތަށް، މައްސަލަ ހުށަހެޅި މީހާއަށް އަމާޒުކޮށް، ވަކި ކަމެއް ހާސިލުކުރަން ބޭނުންވާ ގޮތަށް ކަމަށްވެސް އަލިބެ ވަނީ ބުނެފައެވެ.

އެ ސިޓީގައި އަލިބެ އިތުރަށް ބުނީ ޓީޓީ އެސޯސިއޭޝަނުން އޭނާގެ މައްސަލަ ބެލީ ހީލަތްތެރި ގޮތަކަށް އޭނާއަށް ބަލަމުންދާ މައްސަލައިގެ ތަފްސީލެއް ދިނުމެއް ނެތި ކަމަށެވެ. އެގޮތުން މީގެ ކުރިން އަލިބެ ބަލީ ޓީޓީ އެސޯސިއޭޝަނުން ބެލި މައްސަލައިގެ ތަފުސީލު ހާމަކުރައް އެކި ފަހަރު މަތިން އެދެފައެވެ. އަދި އޭގެ ފަހުންވެސް ޓީޓީ އެސޯސިއޭޝަނުން މައުލޫމާތު ހާމަނުކުރުމުން އަލިބެ އެ މައްސަލައިގެ ތަފުސީލު ހޯދަން ސަރުކާރުގެ އިދާރާތަކުގައިވެސް އެދިވަޑައިގަތެވެ.

އަލިބެ މާފަށް އެދުމަށް ޓީޓީ އެސޯސިއޭޝަނުން އެންގިއިރު، އެ އެސޯސިއޭޝަނުން ވަނީ އަލިބެ ހިމެނިވަޑައިގަތް ހުސްވި ދައުރުގެ ހިންގާ ކޮމިޓީގައި ނިންމާފައިވާ ނިންމުންތަކާއި، ހިއްސާކޮށްފައިވާ މައުލޫމާތާ ބެހޭގޮތުން ހަގީގަތާ ޚިލާފު މައުލޫމާތު މީޑިއާތަށް މެދުވެރިކޮށް އާންމުކުރުމާއި، ޓޭބަލް ޓެނިހުގެ އަރަމުން އަންނަ ހަގު ކުޅުންތެރިންނަށް ނަމޫނާ ދައްކަންޖެހޭ ފަދަ މަގާމެއްގައި ހުރެ، އެކުޅުންތެރިންގެ ހިތްވަރު އެލޭ ފަދަ ކަންކަން އަލިބެ ކޮށްފައިވާ ކަމަށް ބުނެފައެވެ.

އެހެންކަމުން އަލިބެ ވަނީ ޓީޓީގެ ކުރީގެ ހިންގާ ކޮމިޓީއާ ގުޅޭ ކަންތައްތަކަކާ ބެހޭގޮތުން މީޑިއާގައި ދެއްކި ހަގީގަތާ ޚިލާފު ވާހަކަ އަކީ ކޮބައިތޯ ސާފުކުރަންވެސް އެދިވަޑައިގެންފައެވެ. އަދި ޓީޓީގެ ހަގު ކުޅުންތެރިންގެ ހިތްވަރު އެލޭ ގޮތަށް އަލިބެ ކަންތައްތައް ކޮށްފައިވާ ކަމަށް އެސޯސިއޭޝަނުގެ ސިޓީގައި ބުނެފައިވާތީ، އެ ކަމަށް އިންކާރުކުރައްވާ އަލިބެ ވިދާޅުވީ އެއީ އެސޯސިއޭޝަނުން އޭނާ ބޮލުގައި އަޅުވާ ތުހުމަތެއް ކަމަށާއި، އޭނާ އަކީ ދުވަހަކުވެސް ހަގު ކުޅުންތެރިންގެ ހިތްވަރު އެލޭނެ ފަދަ ކަމެއް ކުރާނެ މީހެއް ނޫން ކަމަށެވެ. އަދި ހަގު ކުޅުންތެރިންގެ ހިތްވަރު އެލޭ ގޮތަށް އަލިބެއަށް ކުރެވުނު ކަންތައްތައްވެސް އޮޅުންފިލުވައިދޭން ވަނީ އެދިވަޑައިގެންފައެވެ.

ޓީޓީ އެސޯސިއޭޝަނާއި ދެކޮޅަށް ސިވިލް ކޯޓުގައި ދައުވާ ކުރި މައްސަލައިގައި އަލިބެއަށް ނަސޭހަތްތެރިވެ، މާފަށް އެދެން އެންގިއިރު، އަލިބެ ސިވިލް ކޯޓަށް ހުށަހެޅުއްވި މައްސަލައިގެ އަޑުއެހުމެއް މިދިޔަ މަހުގެ 17 ވަނަ ދުވަހަށް ތާވަލުކުރިއެވެ. އެކަމަކު ޓީޓީ އެސޯސިއޭޝަނުގެ އިންތިޚާބު ނިމިފައިވުމުން، އެ މައްސަލައިގެ މުއާލާތް މިހާރު ކެނޑިފައިވާ ކަމަށް ކޯޓުގައި ވިދާޅުވެ އަލިބެ ވަނީ މިދިޔަ މަހުގެ 16 ވަނަ ދުވަހު އަމިއްލަފުޅަށް އެމައްސަލަ އަނބުރާ ކޯޓުން ނަންގަވާފައެވެ.