އެއްވެސް ވަޒީރެއްގެ އިތުބާރު ނެތް ކަމުގެ މައްސަލައެއް މަޖިލީހަށް ހުށައަޅާފައެއް ނުވޭ
އިކޮނޮމިކް މިނިސްޓަރ ފައްޔާޒުގެ މައްސަލަ މަޖިލީހަށް ހުށައަޅާފައެއް ނުވޭ
އިކޮނޮމިކް މިނިސްޓަރ ފައްޔާޒް އިސްމާއިލް އަދި މަޖިލީހުގެ ރައީސް މުހައްމަދު ނަޝީދު
އެއްވެސް ވަޒީރެއްގެ އިތުބާރު ނެތް ކަމުގެ މައްސަލައެއް ރައްޔިތުންގެ މަޖިލީހަށް ހުށައަޅާފައި ނުވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ އިކޮނޮމިކް މިނިސްޓަރުކަމުގެ މަގާމުގައި ހުންނެވި ފައްޔާޒު އިސްމާއީލްގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ވެއްދުމުގެ މަސައްކަތް ޚުދު އެމަނިކުފާނު ނިސްބަތްވެވަޑައިގަންނަވާ އެމްޑީޕީގެ ބައެއް ޕާލިމެންޓް މެމްބަރުން މަސައްކަތް ކުރައްވާތީ، އެކަމާ ގުޅިގެން ކުރެވުނު ސުވާލަކަށް ޖަވާބުދެއްވަމުންނެވެ.
އެގޮތުން މިހާތަނަށް އައި އިރު މަޖިލީހުން އެފަދަ މައްސަލައެއް ބަލާފައިނުވާ ކަމަށް ވިދާޅުވިއެވެ. މަޖިލީހުގައި އެ މަސައްކަތް ނުކުރެވުނު ނަމަވެސް، އެމްޑީޕީގެ އެތެރެއިން ކުރަންޖެހޭ މަސައްކަތްތައް ކުރަމުންދާ ކަމަށް ވިދާޅުވިއެވެ.
މިނިސްޓަރ ފައްޔާޒުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމަށް ކުރެވެމުންދާ މަސައްކަތް ހުއްޓާލުމަށް އެއްވެސް އިރަކު ރައީސް އިބްރާހިމް މުހައްމަދު ސޯލިހު އެންގެވިތޯ ކުރެވުނު ސުވާލަށް ޖަވާބުދެއްވަމުން ރައީސް ނަޝީދު ވަނީ އެކަން އިންކާރު ކުރައްވާފައެވެ.
މީގެ އިތުރުން ރައީސް ނަޝީދު ވިދާޅުވީ ދެ ކަމަކަށް ދިވެހި ރައްޔިތުންގެ ޕާޓީ އަބަދުވެސް ވަކާލާތު ކުރާނެ ކަމަށެވެ. އެއީ އަނިޔާއިން ދިވެހިން ސަލާމަތް ކުރުމަށާއި ކޮރަޕްޝަނާއި ދުރުވުން ކަމަށް ވިދާޅުވިއެވެ. މި މައްސަލައިގައި މިނިސްޓަރ ފައްޔާޒު އާއި ކޮރަޕްޝަނާ ގުޅުވާ ބައެއް ވާހަކަތައް ދެކެވިފައި ވެއެވެ. ނަމަވެސް، މިނިސްޓަރ ފައްޔާޒު ވަނީ އެކަހަލަ ކަމެއް ނުކުރައްވާ ކަމަށް ވިދާޅުވެ މި މައްސަލައިން ދިފާއުވެވަޑައިގެންފައެވެ.
ފައްޔާޒުގެ މައްޗަށް އިތުބާރު ނެތްކަމުގެ މައްސަލައެއް ހުށައެޅުއްވުމަށް މަސައްކަތް ކުރައްވާފައި ނުވާނެކަމަށް ރައީސް ނަޝީދު ވިދާޅުވިއިރު، މިކަމުގައި މިހާތަނަށް ރަސްމީ ސިފައެއްގައި އެމްޑީޕީގެ އެއްވެސް ގުނަވަނަކުން މައުލޫމާތު ހާމަކޮށްފައެއް ނުވެއެވެ.
